Isaías 44:28 - Kaxinawá Bíblia (BR)

²⁸ Hanushũ Pérsia shanẽ ibuhaira Ciro yuikĩ: ‘Miarã, mĩ ẽ hatu mekeshunikaki. Dasibi haska ẽ betxipaiai miã mĩ ea ashũshanaii’, akĩ ẽ yunushanaii. Ha inũ, Jerusalém yuikĩ: ‘Miarã, mĩ ana mae benikishanaii’, akĩ ẽ yuishanaii. Ha inũ, Templo yuikĩ: ‘Mĩ mestẽwãti mishki habũ buyabirãshãkanikiki’, akĩ ẽ yuiriashanaii.”

Isaías 44:28 Referencias Cruzadas

Esdras 1:1

Pérsia nawa shanẽ ibuhaira Cirõ hatu shanẽ ibushuni taekaĩkĩ ano bestitxai yunukĩ taewabaĩkĩ haska Senhor Deusũ hãtxa yuishunika Jeremias Deusũ yuimani keska hau Cirõ ashanũ Deusũ hawẽ shinã unãmaiwẽ taeshũ shanẽ ibuhaira Cirõ hawẽ yunuti hãtxa hau dasibibũ nĩkanũbũ hãtxawẽ hatu yuitã keneri hatu buma akeakekĩ Cirõ hatu yuikĩ:

Esdras 1:2

“Earã, Pérsia nawa shanẽ ibuhaira Ciro eska matuki txanikĩ ẽ matu yuiai ea nĩkakãwẽ. Nawa shukuabu tibi mai hirabi anua shanẽ ibubu ẽ hatu yunukubaĩshanũ mekenika Senhor Deus nai anu hiweatũ ea katukĩ kushipa waniki. Ea haska watã Judá enabũ mai pakea anu Jerusalém anu hawẽ kẽwãti hiwe wanibu ẽ hatu ana amashanũ Senhor Deusũ ea yunuimaki.

Esdras 1:3

Haskakẽ mã tsuabura Senhor Deusũ enaburã, hau Deusũ matu merabewakubaĩshanũwẽ. Tsuara mã Judá mai pakea anu hiwea hunirã, Jerusalém anu butãkãwẽ. Ha Jerusalém anurã, hanu Israelĩ enabu mekenika Senhor Deus hiweaki. Harishũ hawẽ kẽwãti hiwe bena hawẽrua washuni burishãkãwẽ.

Isaías 41:27

Hakia ea Senhor Deusũnã, bebũkiri Sião anuabu hatuki txanikĩ ẽ hatu unãmaniki. Jerusalém anu ẽ hãtxa yuishunika ẽ yununiki, ha Israelĩ enabu hawaira txĩtũshanaibu hau hatu yuinunã.

Isaías 42:15

Mati keyatapabu inũ mati hatiubuma yamawakĩ dasibi ni hukũmisbu ẽ tsusĩwãkĩ keyushanaii. Dasibi hene netsukĩ mai tsusĩwãkĩ ẽ hawa hayama washanaii. Iã tibiri ẽ netsu keyuriashanaii.

Isaías 45:1

Senhor Deusũ Ciro katukĩ shanẽ ibuhaira watã hawẽ mekẽ yusiuri tsumatã hau mai pakea betsa betsapa maemakĩ hawena watã shanẽ ibu betsa betsapabũ detenameti yamawakĩ hau mebĩshanũ yununikiaki. Hanushũ mae tibitũ beputi Ciro Senhor Deusũ bepẽshũtã hau tsuã ana bepuyamanũbũ nemashũkubainikiaki. Ha haska wanishũ natiã Senhor Deusũ Ciro yuikĩ:

Isaías 45:13

Ha dikabi eãri Ciro ẽ tashnimaniki, hau hatu maemanunã. Hawẽ kati bai dasibi ẽ hawama washũshanaii. Hanushũ hatũ ẽ maewã ea benishũshanikiki. Haska watã enabu habũ hatu iyunibu hatu mebikinãkĩ hatu henematã hatu ea akĩ pakamama manakuti yukama ishanikiki”, iki Senhor Deus dasibi binua hãtxashuki.

Isaías 45:3

Ea ẽ Israelbũ Senhor Deusũ mĩ kenawẽ ẽ mia kenai mĩ ea unãshanũ mabu karuhaira inũ pei hune aru pehaira wanibu mia betximatã inãkĩ ẽ mia haya wakubaĩshanaii.

Isaías 46:11

Bari huaikiria huni betsa ẽ ma kenaniki. Txaihairakea nawa tete keska hushũ haska ẽ yununi hatũ ea ashũshanikiki. Haska ẽ yubakani ẽ hãtxa menekĩ ẽ haska yuini dasibi hatũ ea ashũshanikiki.

Isaías 54:11

Ana mia yuikĩ: “Mae danãkĩ mia itxakawakĩ nuitapawanishũ tsuã mia daewai miwẽ nuisbumabiakẽ, eã mĩ mishki bemaki mia hawẽrua wakĩ bui nãke dekẽ hi hi ikaiwẽ ẽ mia bepush shanaii. Mishki hawẽ mestẽwãti safira nãke txashakapawẽ ẽ mia mabuyashanaii.

Isaías 58:12

Matunabũ mae tekekĩ di anibu nawasãtã ana benishãkanikiki. Ha mishki matũ shenipabũ anibu nenumahairarã, ha mishki tsamabaunibu ana matu pewashũshãkanikiki. Ha matũ mae ana pewakĩ ma haska waibũ matunabu hatu kenakĩ: ‘Mae sheni pewakĩ kenebaunibu beninikabu inũ hiwe tekekĩ di anibu ana benibaunikabuki’, hatu washãkanikiki”, itã,

Isaías 63:11

Ẽ hatu haska wakubirana Israelbũ hatũ shenipabu Moisĩ hatu merabewakĩ Egito anua tashnimani habũ shinaĩ hatumebi yuka ikĩ: ‘Ha Moisés hawẽ txashuwã mekenika wakatsi ianẽwã anua neshenirã, hanimẽ, ha Deusrã? Hatũ hawẽ Yushĩ meribi kushipa Moisés inãnirã, hanimẽ?