24 Matu anua ẽ yunuti pepa kaiaĩ ẽ matu uĩkatsis ikaii, hene habai heneisma keskarã. Huni pepakĩ mã ana hatu parãbuma ẽ matu uĩkatsis iriaii, matũ pepa txatxa ũpash hawa netsuisma keskarã.
Hiwei pekaĩkĩ Deusũ yunuti kushipa inũ dasibi haska betxipaiai tibi tsuãra hawẽ yunua ashuainã, daewakĩ inabu kuashũmisbu binuhairamiski.
Ha mã ea kẽwaĩ kãtai matũ hui kaiainã, ea nĩkamai ikama hamakiri besua ikãwẽ. Ha matũ mimawati harpa hui kaiainã, ẽ nĩkakatsi ikamariki.
Maturã, mã peirashãkãwã! Deusũ yunuti kushipa pepa betsa wai mã hawẽ Deus sinatamamisbuki. Yusĩti txanima kayabi betsa wakĩ mã txakabuwakubaĩmisbuki, hawara hawẽ hiweti pepabiakẽ mai anu txaka ureã keska wakinã.
Hunibuũ, Senhor Deus daewakĩ mã haska watirumahairaki. Hawara pepakiri Senhor Deusũ ma matu yuinishũ matu manaikiki. Hawẽ yunuti kushipa kaneama inũ, pepa aki betxipainamei yura betsabuwẽ nuikũkaini inũ, ibubis keãma matũ mekenika Deusũ hãtxa nĩkakĩ ha besti txibãkubaĩkãwẽ, matu waniki.