2 Coríntios 6:10 - Kaxinawá Bíblia (BR)

¹⁰ Ha inũ, habũ nuku xinã nũ punu nuka dabanẽ xinãkanikiki, Cristo txibaĩ nũ xinãtxãkaĩ nũ benimabiakũkainaya nũ hamẽ nia nuitapai keska xinãmisbuki, nũ hatu tapĩmai itxapa enayabiakenã. Nukuburã, nũ hawa hayama keskabia dasibi Deusũ nuku haya wamiski.

Kashinawa : Diosun Jesúswen taexun yuba bena yiniki

¹⁰ Ja inun, jabun nuku shinan nun punu nuka dabanen shinankanikiki, Cristo chibain nun shinanchankain nun benimabiakunkainaya nun jamen nia nuitapai keska shinanmisbuki, nun jatu tapinmai ichapa enayabiakenan. Nukubudan, nun jawa jayama keskabia dasibi Diosun nuku jaya wamiski.

2 Coríntios 6:10 Referencias Cruzadas

Salmos 84:11

Senhor Deusũ hawẽ bĩ nuku peshashũkĩ hawẽ nuku mekekubaĩmiski. Tsuabura hawa txakabuuma hiweabu Senhor Deusũ hatu betxipaikĩ hatu duawakubaĩmiski, hawa hawẽ pepa yaushiamarã.

Provérbios 13:7

Huni betsabu hawa hayamabia: “Ẽ mabuyaki”, iki kẽmisbuki. Hakia tsuara mabu itxapa hayabia shabakabi yuiama nuitapai keska hiwemisbuki.

Provérbios 16:16

Mane ouro karuhairabiakẽ shinã unanepatũ binuaki. Mane prata karuhairabiakẽ tapinikatũ binuriaki.

Mateus 5:12

Hanua Deusũ hãtxa yuishunikabu itxakawanibu keska wakĩ maturi itxakawaibu nai anushũ Deusũ matu duawashanaiwẽ taea hawa dateama xinã txãkãkubaĩshãkãwẽ— itã,

Mateus 5:4

—Ha inũ, tsuabũra hatũ huĩti nixma kashakatsis ikaibuwẽ taeshũ Deusũ hatu xinã txãkãwã benimapaketi xinaĩ benimakubaĩkanikiki.

Lucas 6:21

Ha inũ, tsuabura hawara pepa besti abutxakayamai hawẽ nuihairaiwẽ kupikĩ Deusũ hatu yaniwama keska washanaiwẽ taea benimapaketi xinaĩ benimakubaĩkanikiki. Ha inũ, tsuabũra matũ txakabu xinaĩ huĩti nixma mã kashakatsis imisbuwẽ taeshũ Deusũ matũ huĩti xinã txãkãwã mã benimakũkaĩmiski.

João 16:22

Habiaskariai ikis mã punu nukaki. Hakia ẽ ana huaya mã benimahairaya matũ benima pae tsuã matu mebĩtirubumaki.

Hechos 16:25

ha haska wabu habias mexu yamenapũ Deus dayuikĩ Paulo inũ Silasĩ hawẽ kẽwãti Deuskiri nawaibũ ha habu dukũ hatu bitximabũ hatu nĩkaibũ

Hechos 3:6

hanushũ Pedrõ ana yuikĩ: —Ẽ peiumaki. Hakia ẽ ha hayarã, ẽ mia inaiĩ. Deusũ kuxipa ẽ hayawẽ taeshũ ẽ mia shushawatiruki. Jesus Cristo Nazaré anuatũ kena kuxipawẽ taea benitã niriwe— atã

Hechos 5:41

shanẽ ibubũ besuuria Jesusũ kuxipayabu kaĩbaini yuinamei: “Hawẽ bake Jesus Cristõ kakapekiri nũ yusĩayã Deusũ hawẽ nuku unãti watã nuku duawakatsi hatu yunua habuwẽ datei nũ beshtekẽnũ nuku akanikiki”, iki benimabaini buxĩshũ

Romanos 11:12

Haskakẽ hawara Deusũ abuai Israelbũ danãkĩ betsa betsapa wabiaibũ ha habu Israelbumã hawẽ bake Jesus Cristo danãma habũ abukĩ Deusũ kakape Cristokiri nĩkatã habũ akai Israelbũ xinaĩ txanima habuwẽ taeshũ Israelĩ baba mirimabũri hawẽ hãtxa ikũwaĩ bepesheshãkanikiki, Deusũ hatu ana duahairawakĩ ibu wayarã.

Romanos 12:15

Ha inũ, tsuara huĩti benimai xinã txãkaĩbube habiaskariai hatuberi benimai xinã txãkãkubaĩkãwẽ. Ha inũ, tsuara bika teneai huĩti nixma punu nukakẽ habiaskari habetã xinãriakubaĩkãwẽ.

Romanos 15:13

Haska hakiri kenenibu keska wakĩ mã Jesus ikũwaĩbu Deusũ hawẽ Yushĩ Pepatũ kuxipawẽ unãnuma matu hiwemakĩ benimawaya hawa txikixama hawẽ matu duawashanai pepa manakakubaĩkãwẽ.

Romanos 8:32

Haska inũ, hawẽ bake hawa yauxitaskama yunua tashnitã mawakĩ nukubu nukũ txakabu nuku buashuniwẽ taeshũ nũ habu Jesus Cristoki dasiabu hawẽ taeshũ nuku duawakĩ hamapai tibi hawẽ bakewẽ nuku ashunishũ Deusũ nuku ashũkubainikiki.

Romanos 9:2

Eskaki, matu yuinũ ea nĩkakãwẽ. Enabu judeubuwẽ hatuwẽ nuihairai huĩti nixma punu nuka ẽ hatuwẽ kashakatsis ikũkainaii.

1 Coríntios 1:5

Ha inũ, Cristokiri nũ matu yusĩtani mã ma ikũwãkĩ txibãkubainaya Deusũ shabakabi matu unãmakĩ pe hãtxamakĩ hakiri matu tapĩmakĩ hawẽ pepawẽ Deusũ matu duahairawakubainikiki.

2 Coríntios 4:15

Haska inũ, Deusũ matu pepawaya mirimabũ Jesus Cristo ikũwãtã benimakĩ mã Deus kẽhairawanũbũ hawara matuwẽ taea bika tenekĩ matu merabewanũ ika nũ ikũkainaii.

2 Coríntios 4:7

Ha inũ, Deusũ yusĩkĩ hawẽ pepakiri nuku tapĩmaya dasibi kuxipa Deusuna inũ nukũmebi nũ hawauma hau mã unãnũbũ nukũ yura babuhaira, mai xumu pusimis keskabianu hawẽ kakape nukũ huĩti merã nuku netãtã hawẽ tsumabu Deusũ nuku waniki.

2 Coríntios 8:9

Ha inũ, nukũ Shanẽ Ibu Jesus Cristo nai anua hawẽ Epa Deusbe hiwea habe shanẽ ibuhairabia dasibi hawenabia henebirã hawẽ pepawẽ matu pepawanũ ika matuwẽ taea nuitapai matuwẽ nui mawaniki, hawẽ taea mã nuitapama dasibi haska yubakani mã ibu washanunã. Haska matu washuniwẽ taeshũ mã hatu merabewatiruki.

Efésios 3:16

Deus matu yukashũkinã, hau hawẽ xinã ewapa keyuisma matu anu yunukĩ hawẽ Yushĩ Pepawẽ matu kuxipa wakĩ hau matu mestẽwãmakubainũ ẽ matu ashũkubaĩmiski.

Efésios 3:8

Hamẽ ẽ ikairã, Cristo txibaĩbu meranua ẽ beshmashaira hawamabiakẽ haskaraki watã Deusũ ea benimawakĩ duawakĩ hau hawẽ bake Cristokiri hawẽ pepa betsa betsapa hayawẽ nuku pehaira mekekubaĩtiru matu judeubumaki ẽ txanikũkaĩshanũ ea katutã nitxĩniki.

Filipenses 2:17

Ẽ hiwea ẽ matu inãni keska wakĩ ẽ matu ikũwãmaniki. Matũri ikũwãkĩ matũ hiwea mã Deus inãkuĩyaiĩ. Haskawẽ taea ẽ hiwea yauxiama mawakinã, hau mã ikũwãkĩ heneyamanũbũ ẽ hiwea Deus ẽ matu inãkuĩshũtiruki. Ẽ matu haskashuni ẽ benima paewẽ dasibi ẽ matu yuiaii.

Filipenses 4:4

Nukũ Shanẽ Ibu ikũwaĩnã, benimarikãwẽ. Ana habias ẽ matu yuaii. Heneama benimarikãwẽ!

Colosenses 1:24

Natiã matuwẽ taea nuitapairã, ẽ benimaii. Hau hawẽ taea nũ bika tenekũkaĩshanũ Cristõ nuku yunutã ha dukũ txanima hawẽ yurawẽ ha ikũwãshanaibu merabewanũ ika hatu bika teneshũkĩ haskawẽ taea eari ibubis ẽ yurawẽ menei ẽ ishũriaii, mã ha ikũwaĩbuwẽ taearã.

Colosenses 3:16

Matubunã, Cristõ kakape hiwetikiri itxapa mã ma tapianã, heneama akubaĩkãwẽ. Eskairã, hawẽ yusĩnanaĩnã, hawẽ unãnepakĩ betsabũ kaneaibu hatu ha akĩ pewakubaĩkinã, matũ huĩtĩ benimai xinã txãkãkĩ: “Peki”, ikĩ Deus kẽwaĩ Deuskiri nawati betsa betsapawẽ nawakubaĩkãwẽ.

1 Tesalonicenses 1:6

Txanima nuku nũ ikai keskai inũ nukũ Shanẽ Ibu Jesus hiweni keskai matũri mã nuku txibãyã matu itxakawakĩ matu nuitapawabiaibũ Deusũ Yushĩ Pepatũ matu benimawakubainaya Deusũ kakape mã ikũwãkubainimabuki.

1 Tesalonicenses 5:16

Haskakubaini benimai heneyamakubaĩkãwẽ.

1 Timóteo 4:8

Hunĩ hawẽ yura kuxipa wai pebiakẽ Deus hiweakiri yubakani hãtxa unãkĩ txibãkĩ hawẽ huĩti kuxipa wairã, ha binua pehairaki, natiã nũ hiwea inũ txipu uatiã Deusbe nũ hiweshanai nũ manakairã.

1 Timóteo 6:18

Haska inũ, hatũ hamapai mabu haya betsaburi pashkashũti xinãkĩ haska Deusũ abuai aki hau pepakubainũbũ hatu yunuriawe.

Hebreus 10:34

Jesusunabu betsabu hatuki sinatakĩ bitxiti hiwe merã hatu bitxiabu nuitapaibuki mã batãtanaya matũ mabu inũ matũ hiwe matu biãbũ hawa yuiama benimakĩ matũ hamapai hatu heneshũkĩ Deus kẽwãkĩ hawẽ mae pepa nai anu hawa txapuisma hanu hiwei ikibi iki mã kashanai haska mã xinãkubaĩyamaki.

Santiago 2:5

Ẽ betsabu inũ ẽ puibuũ, matuwẽ nuikĩ ẽ matu abuai ẽ hãtxa nĩkairakãwẽ. Na mai anua tsuabura nuitapaibu Deusũ katua habũ Deus ikũwã kayabiaibu pepakanikiki. Hanua txipu haska hiwekũkainaiwẽ taeshũ niti akama nai anu habe hiwemashanai Deus yubakanishũ danãma hatu abumisshũ hatu manakushanikiki, nai anu hatu hiwemakinã.

1 Pedro 4:13

Haska matu memabiabu Cristo ani keska wakĩ habiaskarianiwẽ taeshũ matu tenemariakanikiki. Haskawẽ taea Cristo shanẽ ibuhairai ana tashnikirã matu benimahairawashanai xinaĩ natiã haskawẽ benimatimabiakẽ Cristowẽ taea benimayukubaĩkãwẽ.

Apocalipse 2:9

Natiã bika betsa betsapa tenei hawauma mã nuitapaibu ẽ unaiĩ. Haskabia txanima matũ manakuti itxapa nai anu matuki nũ tana mã hayaki. Ha inũ, habu matukiri hãtxa atimapa hãtxai inũ ibubiskiri yui: Ẽ judeuki, ibiai ikũ kayabiwama haska Satanásã abuai besti txibãmisbu ẽ hatu unãriaii.

Apocalipse 21:7

Ha inũ, tsuabũra ea danãma habũ maemakĩ binumisburã, ea ẽ hatũ mekenika Deus ikaya habu ẽ bakebu na mae bena anu hawa benuama ebe hiwei ikibi ipakeshãkanikiki.