Efésios 1:18 - Kashinawa : Diosun Jesúswen taexun yuba bena yiniki

¹⁸ Dios matu yukaxunkinan, Diosun jau matun shinan junemawatan xabakabi ninkamakin manakamanun inun, jau tsuabuda jawenabu kayabi katutan jawen pepawen duajaidawakin matu unanmaxanun en matu yukaxunmiski.

Kaxinawá Bíblia (BR)

¹⁸ Deus matu yukashũkinã, Deusũ hau matũ xinã hunemawatã shabakabi nĩkamakĩ manakamanũ inũ, hau tsuabura hawenabu kayabi katutã hawẽ pepawẽ duahairawakĩ matu unãmashanũ ẽ matu yukashũmiski.

Efésios 1:18 Referencias Cruzadas

Marcos 10:17

Janua Jesús ana kainkainaya juni betsa kushikidan jaki nukutan ja bebun danti itan yukakin: —Yusinan pepaan, ¿Mia yukapa? Jiwea kayabi bikinan, ¿jaska kayatan en bitidumen? Ea yuiwe— aka

Lucas 24:45

ja kenenibu una jau ninka pewanunbun

Hechos 16:14

ja ainbuaibu icha betsan Dios kenwanmis jawen kena Lidia mae betsa Tiatira anua junixun tadi pepa bixun tashi jushinipa wamis nukun Xanen Ibun medabewakin ninka pewamakin jawen shinan betsa wamaya Pablon janchawen Jesús Lidian ikunwanyan

Hechos 26:18

Jabu anu en mia yunua kaxun jatu shinan betsa wamakin jau unainsmapakin Satanás ana chibanyamanunbun en Epa Diosun jancha min jatu yusinkubaunun judiobuma betsa betsapabu anu en mia yunuaii. Jadixun jatu bedu bepexa keska watan ana meshu medan kama keska jakia binwen kai keskaibu min jatu waya jatiditun ea ikunwainbun jatun chakabu en jatu buaxunaya Diosun jatu jiwekuinmaxanikiki, jawa jatu kupiamadan, jawenabu medibi wakinan”, ea waniki.

Romanos 2:4

Jakia Dios pepajaida man dananbiaya matun chakabu tanabiakubainkin jau ana ja shinanma Diosun buanun tsuabuda jakidi kakin shinan betsa watan man yukaxanunbun matu shinain matuwen nuikin jatianda man jakidi yukaxanai jin jin ikama Diosun manakubainikiki.

2 Coríntios 4:4

Tsuabunda jabun ikunwanbumadan, na mai anuxun jatun xanen ibu Satanásan jatu padankin jatun shinan nemakin bekun keska jatu wamiski. Jaskawen taexun Cristo, Dios itsa jiwea mekenika kushipa yudabu mawaxuntan jatun chakabu ana shinanma buakatsis ini ninkabiakin kaka pepa xabakabi ikunwantidubumaki.

Gálatas 5:5

Janua nukunan, Jesúski dasitan nun ikunwainwen taexun Diosun Yushin Pepatun nuku medabewaya Dios kaneismatun nukun chakabu nuku buaxuniwen pepai nun jabe jiwekuinxanai jawa teama nun manayukubainaii.

Efésios 1:11

Jaska wanunbadikatsi Diosun bebunkidi Cristowen nun judiobu dukun nuku katuniki, jaska Diosun jamebi shinain keskawen nuku duawaya nun jawenabu ipakexanunbunan.

Efésios 1:7

Jaskaken Jesús mawakin jawen jimi jabaniwen taexun Dios nuku daewaxunkin nukun chakabu ana shinanma buaniki, jawen shinan duapa nun jaya tsuan bextetiduma jawen taexun nuku mekekinan.

Efésios 2:12

Uatian matu jiweadan, Cristouma inun, Israelbube danananain inun, jawa Diosun jatu yubakin matu yubama iniki. Jaska man jiwea iyuniki, shinankanwen. Jaskawen taea Dios unanma inun jawa manakati pepa jayama na mai anu man jiwepauniki.

Efésios 3:16

Dios matu yukaxunkinan, jau jawen shinan ewapa keyuisma matu anu yunukin jawen Yushin Pepawen matu kushipa wakin jau matu mestenwanmakubainun en matu axunkubainmiski.

Efésios 3:8

Jamen en ikaidan, Cristo chibainbu medanua en bexmasjaida jawamabiaken jaskadaki watan Diosun ea benimawakin duawakin jau jawen bake Cristokidi jawen pepa betsa betsapa jayawen nuku pejaida mekekubaintidu matu judiobumaki en chanikunkainxanun ea katutan nichiniki.

Efésios 4:1

Nenu eska en bika tenei jiweyuxun meaidan, nukun Xanen Ibun ea yununi en akubainaiwen taexun ea achitan ea mekeimaxun ea jeneabumaken jau man ikunwainbu Diosun matu kenani jiwei pepai jaskakin man unankubainunbun en matu yunuai shinaindakubainkanwen.

Efésios 4:4

Matudan, jabias yuda matu wakatsis ikin Diosun matu kenanixun jabias Yushin Pepa matu inantan jawen kushipawen jabias jiwekuian matu manakamaikiki, Jesús man ikunwainbudan.

Efésios 5:8

Ja inun, uatianan, nukun Xanen Ibu unankin ikunwandiama chakabui meshu medan ika keska man jiwenibuki. Jamen eskatianan, Cristo ikunwain jaki dasitan matun shinan maewatan man betsajaidawa man ma xabaki pesea keska jiweabuki. Jaska man ma tapian shinain pe jiwekubainkanwen.

Filipenses 3:14

Jaska Jesucristowen nuku Diosun yubani jaska nai anua jaki nukukin jadia bixanun ika ninkamas Jesús en dayaxunkunkainaii.

Colosenses 1:12

Epa Dios kenwankubainkanwen. Jatun matu katunixun ikunwainbu dasibibube nuku mekekubainkin nai anuxun jawada nukuki tanani nuku inankuian jawen xabaki pesetan nun bixankanaii.

Colosenses 1:23

Man jaskakatsi ikaidan, matu tibidan, Diosun kakapekidi ninkatan man ma Cristo ikunwani jenekin putai chintuanma juinti mestentan jaska man ikunwainbu manakakubainkanwen. Jaska Diosun jawen bakekidi jawen kakape yudabu mai pakea ichapa anuabun jau unanunbun yusinkin ea en Pablon en jatu medabewakubaunmiski.

Colosenses 1:27

Tsuabuda man judiobuma Diosun jawen shinan duapa jaska bebunkidi Cristokidi yubakabiatan juneni ja xabakabi wakin matu unanmakatsis ikikiki, jau mai jidabi anuabun matundi man unanunbun jaska ja jawen shinan dasibikidi junenidan, jadan, Criston aniki. Jaska matundi man Cristo ikunwainwen taea man judiobumabia Cristo ma matuki dasiaki. Jaska inun, nai anu Diosun mae pepajaida anu Dios inun Cristobe matudi man jiwexanaii, man jaskakidi shinankin manakaibudan.

Colosenses 1:5

Man jaskaidan, Jesucristokidi kakape chanima ninkatan benimakin matun jiwea nai anu Dios anu man jaya man manakaibu nun matu unaiin.

Colosenses 2:2

Jau man shinan chankain jenetima binunbun inun, jawa betsa shinanma ikunwain betsabube ketaxamei nuinamei man bechipainamenunbun inun, unanepakin Diosun jawen yuba betsa juneni Cristokidi natian jau xabakabi man ninka pejaidawanunbun en matu dayai jenexunamaki.

Colosenses 3:15

Jakia Criston unanuma matu jiwemayadan, ja matun juinti uke medan xanen ibu wamakanwen. Matu jaska wakatsi ikin Diosun ma matu katunixun jabias yuda matu wakatsis ikikiki. Dasibi ma jatun matu axuni shinankin kenwankubainkanwen.

1 Tesalonicenses 5:8

Jakia nukubudan, nun ma meshua anua xabaki taxnia keskabu nun ikunwankin pewakubainmiswen taea nukun Xanen Ibu ana juxanai jawa jakimama manakubainankanwen. Nun jabubetan ikunwain betsabube duapai bechipainamei medabenankin nukun Epa Dios ja bestiki chiti ikubainankanwen. Nun jaskaibudan, romano soldadobun jawen yuda junenun, iwanan, mane tadi manankidia sawemis keskai jawaki dateama nun pe mekea jiwetidubuki. Jaskai jawa dateama nukun Xanen Ibu manakin jatun besti nuku mekexanai nun manaii. Jaskakin jau soldadobu tsuan jatu deteyamanunbun jatun buxka mekekin junekin mane maiti sawemisbu keskai nukudi dateama pe mekea nun jiwetidubuki.

2 Tesalonicenses 1:11

Jaskawen taea Diosbe janchakin matukidi yukakin nun jeneismaki. Diosun matu kenakin katunixun pepabu matu wakatsis ikaikidi matu yukaxunkinan, man ikunwainwen taexun jawen kushipawen jamapai pepa akin betsabube medabenamei man jiwekubainunbun en matu ea axunkubainaii.

2 Tesalonicenses 2:16

Januxun nukun Xanen Ibu Jesucristo jamebi inun nukun Epa Dios nukuwen nuikin bechipaikin nuku duawakin nuku shinan chankanwan niti ikama nai anu nun jatube jiwexanai manakamakin nuku yubaniki. Janua mestenwantan matun juinti shinan chankanwankin matu kushipa wai jeneama jamapai yuikin man akai pepas jau matu amakubainunbunwen.

1 Timóteo 6:12

Jaska min jiwea ikibi ika bibiatan min benutiduma Diosun mia inankatsi mia kenakin katuniwen taexun jaska min ikunwain min ma ichabu anua xabakabi chanini jatu unanmakubainwen, Jesucristo chibain chintuanma dasibi Diosun mia yunumis dateama shinankin akubainkinan.

Tito 2:13

Jaska jiwekunkainkin nukun Dios binua inun nukun mekenan pepa kushipa Jesucristo xanen ibujaidai ana nuku chintunxunkidanxanai manai nun benimaii.

Tito 3:7

Nukunmebi nun Dios jawa pepa axuntidumabiaken duapa nukuwen nuikin nukun chakabu nuku buaxuntan jawen pepawen jawen jiwekuinti nun bixanai nun jawen manakanun jawen Yushin Pepa nukuki dasiwaniki.

Hebreus 10:32

Janu man Jesús ikunwankin taewaitian man ini shinankanwen. Jabun ikunwankatsi ikabuman matu bika tenemabiabu mestentan man binukubainyamaki.

Hebreus 6:4

Tsuabuda Diosun jawenabu wakatsi jatu katuxun jawen Yushin Pepa jatu inankin jatu medabewamapakeaya jawen jancha pepa unain Jesús ana juaitian jaskasnunbadiai keskai jiwei taekin jabun Jesús ikunwankin chibanbiai putai chintuntan jatunmebi ana shinan betsa watidubumaki. Jabu Diosun baken janchaki kaxekin danankin ana cruzki masta keska wakin jatunabudi Jesúski kaxemaibuwen taexun jatu yusinkin nukundi jatun shinan jatu betsa wamakin nun jatu pewatidumaki.

1 Pedro 1:3

Nun jawen bakebus pepawen nuku kupia nun jabe jiwexanunbun nukun Xanen Ibu Jesucristo nukuwen nuijaidaya Diosun ana bestenwankin nuku bake kain bena keskati waniki, ja shinankin jiwea ikibi ika betsa ja manakai jiweti nuku inankinan. Jaskawen taexun nukun Xanen Ibu Jesucriston mekenika Dios, jawen Epadan, kenwandiakubainankanwen.

1 Pedro 3:9

Ja inun, matu chakabuwabu jatubebis ana chakabuwama inun matu ichabu jatubebis ana manakunain ichakananma ikubainkanwen. Jakia matu duawakatsi Diosun matu katuniwen taexun matu ichakawabiaibun ja shinanma pepakidi besti jatu yuikubainkanwen, jau Diosun jatu medabewakin duawadiakubainunan.

1 Pedro 5:10

Ja dukunan, badi ichapama man nuitapayuaii. Diosun jaska matu memabiatan jabiatundi matu kushipa wakin paxkatima watan ja jawen mestenwantiwen matu pepa wakin keyuxanikiki. Jesucristobe nun jaki dasitan jiwea ikibi iki nun pepai kushipaxanunbun jabias Dios nuikipatun jawena wakatsi ikin nuku katuniki.