ЭФЭСЯНАЎ 3 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ЭФЭСЯНАЎ 3

¹ Дзеля гэтай справы я, Паўла, – вязень Хрыстоў дзеля вас, паганаў.

² Хіба чулі вы аб распарадкаванні ласкі Божай, што дадзена мне адносна вас,

³ што праз аб’яўленне абвешчана мне таямніца, аб чым коратка я ўжо вышэй напісаў.

⁴ Чытаючы тое, можаце зразумець маё разуменне таямніцы Хрыста.

⁵ Не была яна абвешчана сынам чалавечым у іншых пакаленнях, як цяпер аб’яўлена святым Апосталам Яго і прарокам у Духу,

⁶ што пагане маюць быць спадкаемцамі, і членамі аднаго цела, і ўдзельнікамі абяцанняў Яго ў Хрысце Ісусе праз Евангелле,

⁷ паслугачом якога я стаўся паводле дару ласкі Божай, дадзенай мне паводле дзеяння магутнасці Яго.

⁸ Мне, найменшаму з усіх святых, дадзена гэтая ласка: абвяшчаць добрую вестку паганам аб неабсяжным багацці Хрыста

⁹ і выясніць усім, як павінна здзейсніцца домаўладкаванне таямніцы, скрытай ад вякоў у Богу, Які ўсё стварыў праз Ісуса Хрыста,

¹⁰ каб цяпер сталася вядомай начальствам і ўладам нябесным праз Царкву разнастайная мудрасць Бога

¹¹ паводле адвечнай пастановы, што ўчыніў у Хрысце Ісусе, Госпадзе нашым,

¹² у Якім маем адвагу і доступ у надзеі праз веру ў Яго.

¹³ Таму вось прашу вас, не падайце духам з-за турбот маіх пра вас, якія ёсць слава ваша.

¹⁴ Дзеля гэтай справы схіляю калені мае перад Айцом Госпада нашага Ісуса Хрыста,

¹⁵ ад Якога называецца ўсякае айцоўства на небе і на зямлі,

¹⁶ каб даў вам паводле багацця славы Сваёй умацавацца сілай праз Духа Яго ва ўнутраным чалавеку,

¹⁷ каб Хрыстос абжыўся праз веру ў сэрцах вашых і каб вы, укараніўшыся і ўмацаваўшыся ў любові,

¹⁸ разам з усімі святымі маглі зразумець, якая ёсць шырыня і даўжыня, вышыня і глыбіня,

¹⁹ а таксама пазнаць любоў Хрыста, найвышэйшае веданне, каб напоўніліся вы ўсёю поўняй Бога.

²⁰ А Таму, Які можа многа больш зрабіць, чым усё, што мы просім або разумеем, магутнасцю, якая дзейнічае ў нас,

²¹ Яму хвала ў Царкве і ў Хрысце Ісусе праз усе пакаленні на векі вечныя. Амін.