ПСАЛТЫР 29 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 29

¹ Давідаў. Прыносьце Госпаду, сыны Божыя, прыносьце Госпаду хвалу і магутнасць.

² Прыносьце Госпаду хвалу імя Яго, услаўляйце Госпада ў святым ззянні.

³ Голас Госпада над водамі, загрымеў Бог велічы: Госпад над бязмежнымі водамі.

⁴ Голас Госпада магутны! Голас Госпада велічны.

⁵ Голас Госпада, Які ламае кедры; і паламае Госпад кедры Лібана,

⁶ змушае скакаць Лібан, нібы цялятка, а Сірыён, нібы маладога адзінарога.

⁷ Голас Госпада, Які выкрасае агністае полымя.

⁸ Голас Госпада, Які трасе пустыню, і патрасе Госпад пустыню Кадэс.

⁹ Голас Госпада, Які хутка дасць абрадзініцца аленіхам і аголіць гушчары, і ў святыні Яго ўсе прамовяць: «Хвала!»

¹⁰ Госпад трывае па-над патопам, і будзе сядзець Госпад як Валадар вечна.

¹¹ Госпад дасць сілу Свайму народу, Госпад дасць дабраславенне народу Свайму ў супакоі.