ПСАЛТЫР 116 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 116

¹ Алілуя. Палюбіў я, бо выслухаў Госпад голас малення майго.

² Бо нахіліў вуха Сваё да мяне, калі прызываў я ў дні мае.

³ Ахуталі мяне путы смерці і пакуты пякельныя нахлынулі на мяне. Натрапіў я на бяду і пакуту.

⁴ І стаў я прызываць імя Госпада: «О Божа, вызвалі душу маю».

⁵ Міласэрны Бог і справядлівы, і Бог наш літасцівы.

⁶ Сцеражэ Госпад малых; быў я прыніжаны, а Ён даў мне збаўленне.

⁷ Вярніся, душа мая, да спачынку твайго, бо Госпад дабро ўчыніў табе;

⁸ бо вырваў Ён душу маю ад смерці, вочы мае — ад слёз, ногі мае — ад падзення.

⁹ Буду хадзіць перад Госпадам у краіне жывых.

¹⁰ Паверыў я, і таму прамовіў: «Прыніжаны я вельмі».

¹¹ Я ў страху сваім сказаў: «Кожны чалавек ашуканец».

¹² Чым жа я аддам Госпаду за ўсё, што Ён аддаў мне?

¹³ Вазьму келіх збаўлення і прызаву імя Госпада.

¹⁴ Аддам абяцанні мае Госпаду перад усім народам Яго.

¹⁵ Дарагая ў вачах Госпада смерць Яго святых.

¹⁶ Госпадзе, я слуга Твой, і сын служанкі Тваёй. Ты разарваў путы мае.

¹⁷ Злажу я Табе пахвальную ахвяру і прызаву імя Госпада.

¹⁸ Аддам абяцанні мае Госпаду перад усім народам Яго

¹⁹ на панадворку дому Госпада, пасярод цябе, Ерузалім.