ПСАЛТЫР 115 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Не нам, Госпадзе, не нам, але імю Свайму дай хвалу за Тваю міласэрнасць і за Тваю праўду.

² Чаму мелі б казаць паганы: «Дзе ж Бог іх?»

³ Бог наш на небе, усё, што захацеў, зрабіў.

⁴ Ідалы іх срэбра і золата, стварэнне людскіх рук.

⁵ Вусны маюць, ды не гавораць, вочы маюць, ды не бачаць.

⁶ Вушы маюць, ды не чуюць, ноздры маюць, ды не адчуваюць паху.

⁷ Рукі маюць, ды не ўспрымаюць на дотык, ногі маюць, ды не ходзяць; горлам сваім не пададуць голасу.

⁸ Будуць падобныя да іх тыя, што майструюць іх [балванаў], і ўсе, што вераць у іх.

⁹ Дом Ізраэля мае надзею ў Госпадзе: Ён іх успамога і абарона.

¹⁰ Дом Аарона мае надзею ў Госпадзе: Ён іх успамога і абарона.

¹¹ Тыя, што шануюць Госпада, ускладаюць надзею на Госпада: Ён іх успамога і абарона.

¹² Госпад памятаў пра нас і будзе дабраслаўляць нас: будзе дабраслаўляць Ён дом Ізраэля, будзе дабраслаўляць Ён дом Аарона,

¹³ будзе дабраслаўляць Ён усіх, хто шануюць Госпада, — як малых, так і вялікіх.

¹⁴ Хай Госпад памнажае вас, вас і сыноў вашых.

¹⁵ Дабраславёныя вы Богам, Які стварыў неба і зямлю.

¹⁶ Нябёсы, нябёсы — у Бога, зямлю ж даў для сыноў чалавечых.

¹⁷ Не мёртвыя хваліць будуць Цябе, Госпадзе, ані ўсе тыя, што сыходзяць у маўчанне,

¹⁸ а мы, жывыя, дабраслаўляем Госпада з гэтага [часу], цяпер і вечна.