ПСАЛТЫР 65 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 65

¹ Клікніце Богу, уся зямля.

² Сьпявайце славу імю Ягонаму; гонар славе Ягонай, хвала Яму.

³ Скажэце Богу: грозны Ты ў дзеях Тваіх! У вялікай сіле Тваёй упакорацца Табе ворагі Твае.

⁴ Хай паклоніцца Табе ўся зямля і сьпявае Табе, хай сьпявае імю Твайму, Усявышні!

⁵ Прыйдзеце і гляньце на дзеі Бога, грознага ў дзеях супроць сыноў чалавечых.

⁶ Ён мора ў сушу ператварыў: раку перайшлі нагамі; там радасьць была нам у Ім.

⁷ Магутнасьцю Сваёю ўладарыць Ён вечна; вочы Ягоныя глядзяць на народы, хай ня ўзносяцца бунтаўшчыкі.

⁸ Дабраславеце, народы, Бога нашага і ўзнясеце славу Яму.

⁹ Ён жыцьцё захаваў душы нашай, і назе нашай ня даў пахіснуцца.

¹⁰ Ты нас выпрабаваў, Божа, ператапіў нас, як топяць срэбра.

¹¹ Ты ўвёў нас у сетку, аковы паклаў нам на сьцёгны нашыя,

¹² пасадзіў чалавека на галаву нам. Мы ўвайшлі ў вагонь і ў ваду, і Ты вывеў нас на волю.

¹³ Увайду ў дом Твой з цэласпаленьнямі, аддам Табе зарукі мае,

¹⁴ якія вымавілі вусны мае і сказаў язык мой у скрусе маёй.

¹⁵ Цэласпаленьні тлустыя прынясу я Табе, з дымам ахвярным з авечага лою; ахвярую валоў і казлоў.

¹⁶ Прыйдзеце, паслухайце ўсе, богабаязныя, і я абвяшчу вам, што стварыў Ён душы маёй.

¹⁷ Я паклікаў Яго вуснамі маімі і ўславіў Яго языком маім.

¹⁸ Калі б угледзеў я беззаконьне ў сэрцы маім, дык не пачуў бы мяне Гасподзь.

¹⁹ Але Бог пачуў, уважыў голасу маленьня майго.

²⁰ Дабраславёны Бог, Які не адкінуў малітвы маёй і не адвярнуў ад мяне ласкі Свае.