ВЫСЛОЎІ 16 - Біблія (пераклад В. Сёмухі) Біблія (пераклад В. Сёмухі)
ВЫСЛОЎІ 16

¹ Чалавеку належаць намеры сэрца, а адказ языка ад Госпада.

² Усе шляхі чалавека чыстыя ў ягоных вачах, а Гасподзь выпрабоўвае душы.

³ Даручы Госпаду дзеі твае, і намеры твае зьдзейсьняцца.

⁴ Усё зрабіў Гасподзь дзеля Сябе; і нават бязбожнага на дзень гневу.

⁵ Агіднае Госпаду сэрца пыхліўца; можна паручыцца, што ён не застанецца без пакараньня.

⁶ Міласэрнасьцю і праўдаю ачышчаецца грэх, і страх Гасподні адводзіць ад ліха.

⁷ Калі Госпаду падабаюцца шляхі чалавека, Ён і ворагаў яго прымірае зь ім.

⁸ Лепш нямногае з праўдаю, чым вялікія прыбыткі з крыўдаю.

⁹ Сэрца чалавека абдумвае свой шлях, а Гасподзь кіруе шэсьцем ягоным.

¹⁰ У вуснах у цара - слова натхнёнае; вусны яго не павінны грашыць на судзе.

¹¹ Правільныя вагі і вагавыя шалі - ад Госпада; ад Яго ж усе гіры ў торбе.

¹² Агідная царам - дзея беззаконная, бо праўдай мацуецца трон.

¹³ Прыемныя цару вусны праўдзівыя, а таго, хто гаворыць праўду, ён любіць.

¹⁴ Царскі гнеў - весьнік сьмерці; а мудры чалавек умілажальвае яго.

¹⁵ У ясным позірку цара - жыцьцё, і ўпадабаньне ягонае - як воблака з позьнім дажджом.

¹⁶ Здабыць мудрасьць намнога лепш за золата, і здабыць розум лепш за чыстае срэбра.

¹⁷ Шлях у праведных - унікаць зла; той ратуе душу сваю, хто зважае на шлях свой.

¹⁸ Пагібелі папярэднічае гонар, і падзеньню - пыха.

¹⁹ Лепей упакорвацца духам з лагоднымі, чым дзяліць здабычу з гардзеямі.

²⁰ Хто вядзе справу разумна, той знойдзе дабро, а хто спадзяецца на Госпада, той шчасны.

²¹ Мудры сэрцам разумным назавецца, і салодкая мова дадасьць да навукі.

²² Розум таму, хто мае яго, - крыніца жыцьця, а вучонасьць дурных - дурнота.

²³ Сэрца мудрага язык ягоны ўмудрае і памнажае веды ў вуснах ягоных.

²⁴ Прыемная мова - сотавы мёд, салодкая душы і гойная касьцям.

²⁵ Ёсьць шляхі, якія здаюцца чалавеку простымі, але канец іх - да сьмерці.

²⁶ Працаўнік працуе на сябе, бо панукае яго рот ягоны.

²⁷ Чалавек падступны намышляе благое, і на вуснах у яго нібы агонь палючы.

²⁸ Чалавек хітры сее разлад, а нагаворшчык разлучае сяброў.

²⁹ Чалавек зь нядобрымі намерамі разбэшчвае блізкага свайго і вядзе яго на дарогу благую;

³⁰ прыплюшчвае вочы, каб прыдумаць падступства; закусваючы губы сабе, чыніць зладзейства.

³¹ Вянок славы - сівізна на дарозе праўды.

³² Доўгацярплівы лепшы за адважнага, і той, хто валодае сабою, лепшы за заваёўніка горада.

³³ На падлогу кідаюць жэрабя, але ўвесь вырак ягоны - ад Госпада.