ПСАЛТЫР 108 - Кнігі Святога Пісання - Біблія - Біблія — пераклад Чарняўскага (выданне 2017 года) Кнігі Святога Пісання - Біблія - Біблія — пераклад Чарняўскага (выданне 2017 года)
ПСАЛТЫР 108

¹ Песня. Псальм. Давідаў.

² Прыгатавана сэрца маё, Божа, прыгатавана сэрца маё, буду спяваць і граць псальмы. Добра, хвала мая!

³ Прабудзіся, гуслі і цытра, абуджу я зараніцу.

⁴ Буду вызнаваць Цябе, Госпадзе, між народамі, буду Табе граць псальмы сярод людзей,

⁵ бо міласэрнасць Твая вялікая аж да нябёсаў і аж да воблакаў праўда Твая.

⁶ Падыміся над нябёсамі, Божа, і над ўсёй зямлёю — слава Твая.

⁷ Каб вызваліліся ўмілаваныя Твае, дай збаўленне правіцай Тваёй і выслухай мяне.

⁸ Прамовіў Бог у святыні Сваёй: «Узрадуюся і падзялю Сіхэм і памераю лагчыну Сукот;

⁹ мой Галаад і мой Манасэс, і Эфраім — цвярдыня галавы маёй, Юда — скіпетр мой.

¹⁰ Моаб — конаўка для абмывання Майго, над Ідумеяй узнясу чаравік мой, над Філістэяй усклікаць буду».

¹¹ Хто давядзе мяне ў абаронны горад? Хто давядзе мяне аж да Ідумеі?

¹² Хіба Ты, Божа, Які адпіхнуў нас? Ці ўжо не выйдзеш, Божа, з нашымі сіламі?

¹³ Дай нам успамогу ад прыгнёту, бо марны ратунак людскі.

¹⁴ З Богам праявім магуцце, і Ён стопча нашых непрыяцеляў.