ПСАЛТЫР 107 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Вызнавайце Госпада, бо Ён добры, бо на векі міласэрнасць Яго.

² Хай скажуць тыя, якія былі адкуплены Госпадам, якіх Ён адкупіў з рукі праціўніка.

³ і сабраў іх з [розных] краін, з усходу і з захаду, з поўначы і ад мора.

⁴ Яны блудзілі па пустыні, па бязлюддзі, не знаходзілі дарогі да горада абжытага.

⁵ Адчувалі голад і смагу, душа іх змарнела ў іх.

⁶ І пачалі яны ўсклікаць да Госпада, калі прыцяснялі іх, і Ён вызваліў іх з няшчасцяў іх.

⁷ І вывеў іх простай дарогай, каб дайшлі да горада абжытага.

⁸ Хай вызнаюць Госпада за Яго міласэрнасць і за Яго цуды для сыноў чалавечых,

⁹ бо насыціў Ён душу таго, хто адчуваў смагу, і напоўніў дабротамі душу, што моцна прагне.

¹⁰ Сядзелі яны ў цемры і ў цені смерці, звязаныя галечай і жалезам,

¹¹ бо паднялі яны бунт супраць слоў Бога і пагардзілі парадай Найвышэйшага.

¹² І ўпакорыў Ён сэрца іх пакутамі, саслабелі яны і не было нікога, хто ўспамог бы.

¹³ І пачалі яны ўсклікаць да Бога, калі прыцяснялі іх, і Ён вызваліў іх з няшчасцяў іх.

¹⁴ І вывеў іх з цемры і з ценю смерці ды паламаў іх путы.

¹⁵ Хай вызнаюць Госпада за Яго міласэрнасць і за Яго цуды для сыноў чалавечых,

¹⁶ бо разбіў Ён бронзавыя брамы і выламаў жалезныя запоры.

¹⁷ Сталіся яны бязглуздымі на шляху несправядлівасці сваёй і за беззаконнасці свае былі прыніжаны;

¹⁸ ад любой ежы адмовілася душа іх і наблізіліся яны да самых брамаў смерці.

¹⁹ І пачалі яны ўсклікаць да Бога, калі прыцяснялі іх, і Ён вызваліў іх з няшчасцяў іх.

²⁰ Паслаў Сваё слова і аздаравіў іх і вырваў іх з пагібелі іх.

²¹ Хай вызнаюць Госпада за Яго міласэрнасць і за Яго цуды для сыноў чалавечых,

²² хай складаюць ахвяру падзякі і хай абвяшчаюць справы Яго з радасцю.

²³ Тыя, што на караблях пусціліся ў мора, тыя, што займаюцца працай на вялікіх водах,

²⁴ самі бачылі справы Госпада і цуды Яго ў глыбінях.

²⁵ Сказаў Ён і ўзняў віхуру навальніцы, і пачалі ўздымацца хвалі Яго.

²⁶ Уздымаліся аж пад неба і ападалі зноў на ніз, душа іх млела ў ліхой прыгодзе.

²⁷ Устрывожыліся яны і захісталіся, як п’яны, і паглынута была ўся іх мудрасць.

²⁸ І пачалі яны ўсклікаць да Бога, калі прыцяснялі іх, і Ён вывеў іх з няшчасцяў іх.

²⁹ І асадзіў Ён навальніцу Яго ў лёгкі ветрык, і суцішыліся хвалі Яго.

³⁰ І ўзвесяліліся, што яны сціхлі, і вывеў Ён іх у гавань іх жадання.

³¹ Хай вызнаюць Госпада за Яго міласэрнасць і за Яго цуды для сыноў чалавечых.

³² І хай узносяць Яго на сходзе народа ды на пасяджэнні старшынаў хай хваляць Яго.

³³ Рэкі змяніў Ён у пустыню, а аазісы — у пустую зямлю,

³⁴ урадлівую зямлю — у салёны стэп дзеля ліхасці жыхароў яе.

³⁵ Змяніў Ён пустыню ў вадаёмы, а зямлю сухую — у аазіс.

³⁶ І сабраў там прагнучых, і заснавалі яны горад абжыты.

³⁷ Засеялі палі і насадзілі вінаграднікі, і здабылі яны плады для пажытку свайго.

³⁸ І дабраславіў Ён іх, і памножыліся яны надзвычайна, і жывёлы іх не паменшыў.

³⁹ І засталося іх мала, і змарнелі яны ад прыгнёту ліхіх і ад пакуты.

⁴⁰ Праліў Ён пагарду на князёў і прымусіў іх блудзіць па пустыні бездарожнай.

⁴¹ І падняў беднага з убогасці, і разрасціў сем’і, як стада.

⁴² Убачаць справядлівыя і ўзвесяляцца, і ўсякая несправядлівасць зацісне вусны.

⁴³ Хто ж мудры і будзе трымацца гэтага, зразумее міласэрнасць Божую.