ПСАЛТЫР 91 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 91

¹ Псальма. Песьня на дзень суботні.

² Дабро ёсьць - славіць Госпада і сьпяваць імю Твайму, Усявышні,

³ абвяшчаць раніцай ласку Тваю і праўду Тваю ўначы,

⁴ на дзесяціструнным і на псалтыры, зь песьняю на арфе.

⁵ Бо Ты ўсьцешыў мяне, Госпадзе, тварэньнем Тваім; я захапляюся дзеямі рук Тваіх.

⁶ Якія вялікія дзеі Твае, Госпадзе! дзівосна глыбокія помыслы Твае:

⁷ Чалавек няцямны ня ведае, і недавумак не разумее таго.

⁸ Тым часам як бязбожныя растуць, бы трава, і ліхадзеі квітнеюць, каб зьнікнуць навечна, -

⁹ Ты, Госпадзе, высокі векавечна!

¹⁰ Бо вось, ворагі Твае, Госпадзе, - вось, ворагі Твае гінуць, і рассыпаюцца ўсе ліхадзеі;

¹¹ а мой рог Ты падымаеш, як рог аднарога, і я ўмашчаны сьвежым алеем;

¹² і вока маё глядзіць на ворагаў маіх, і вушы мае чуюць пра паўсталых на мяне злыдняў.

¹³ Праведнік цьвіце, як пальма, узвышаецца, быццам кедр на Ліване.

¹⁴ Пасаджаныя ў доме Гасподнім, яны цьвітуць на падворках Бога нашага;

¹⁵ яны і ў старасьці пладаносныя, сакавітыя і сьвежыя,

¹⁶ каб абвяшчаць, што Гасподзь справядлівы, цьвярдыня мая, і няма ў Ім няпраўды.