ПСАЛТЫР 144 - Біблія (пераклад В. Сёмухі) Біблія (пераклад В. Сёмухі)
ПСАЛТЫР 144

¹ Хвала Давідава. Хваліць буду Цябе, Божа мой, Цару мой, і дабраслаўляць імя Тваё векі вечныя.

² Кожны дзень дабраслаўляць буду Цябе і хваліць імя Тваё векі вечныя.

³ Вялікі Гасподзь і праслаўлены вельмі, і веліч Ягоная недасьледная.

⁴ Род у род будзе хваліць дзеі Твае і абвяшчаць магутнасьць Тваю.

⁵ А я буду разважаць пра высокую славу велічы Тваёй і пра высокія чыны дзеі Твае.

⁶ Буду казаць пра моц страшных дзеяў Тваіх, і я буду абвяшчаць веліч Тваю.

⁷ Будуць абвяшчаць памяць вялікай даброці Тваёй і распавядацьмуць праўду Тваю.

⁸ Шчодры і міласэрны Гасподзь, вельмі цярплівы і вельмі мілажальны.

⁹ Добры Гасподзь да ўсіх, і шчадроты Ягоныя на ўсіх дзеях Ягоных.

¹⁰ Хай славяць Цябе, Госпадзе, усе дзеі Твае, і хай дабраслаўляюць Цябе сьвятыя Твае;

¹¹ хай прапаведуюць славу царства Твайго і распавядаюць пра магутнасьць Тваю,

¹² каб перадаць сынам чалавечым пра моц Тваю і пра слаўную веліч царства Твайго.

¹³ Царства Тваё - царства ўсіх вякоў, і валадарства Тваё - ва ўсе роды.

¹⁴ Гасподзь падтрымлівае ўсіх, хто падае, і падымае ўсіх, хто ўпаў.

¹⁵ Вочы ўсіх спадзяюцца на Цябе, і Ты даеш ім ежу сваім часам;

¹⁶ адкрываеш руку Тваю і корміш усіх жывых па добрай волі.

¹⁷ Праведны Гасподзь на ўсіх дарогах Сваіх і добры ва ўсіх дзеях Сваіх.

¹⁸ Блізкі Гасподзь да ўсіх, хто кліча Яго, да ўсіх, хто кліча Яго ў праўдзе.

¹⁹ Жаданьне тых, што баяцца Яго, Ён выконвае, скаргі іхнія чуе, і ратуе іх.

²⁰ Асланяе Гасподзь усіх, хто любіць Яго, а ўсіх бязбожных зьнішчае.

²¹ Вусны мае вымавяць хвалу Гасподнюю, і хай дабраслаўляе ўсякае цела сьвятое імя Ягонае вечна.