ЛІКІ 13 - Біблія (пераклад В. Сёмухі) Біблія (пераклад В. Сёмухі)
ЛІКІ 13

¹ Пасьля гэтага народ рушыў з Асірота і спыніўся ў пустыні Фаран.

² І сказаў Гасподзь Майсею, кажучы:

³ Пашлі ад сябе людзей, каб яны агледзелі зямлю Ханаанскую, якую Я дам сынам Ізраілевым; па адным чалавеку ад племені бацькоў іхніх пашлеце, галоўных зь іх.

⁴ І паслаў іх Майсей з пустыні Фаран, па загадзе Гасподнім, і ўсе яны мужы галоўныя ў сыноў Ізраілевых.

⁵ Вось імёны іхнія: з племені Рувімавага Самуа, сын Закхураў,

⁶ з племені Сымонавага Сафат, сын Харыеў,

⁷ з племені Юдавага Халеў, сын Ефаніін,

⁸ з племені Ісахаравага Ігал, сын Язэпаў,

⁹ з племені Яфрэмавага Асія, сын Наваў,

¹⁰ з племені Веньямінавага Фалтый, сын Рафуеў,

¹¹ з племені Завулонавага Гадыіл, сын Садыеў,

¹² з племені Язэпавага ад Манасіі Гадый, сын Сусіеў,

¹³ з племені Данавага Амііл, сын Гемаліеў,

¹⁴ з племені Асіравага Сэтур, сын Міхаілеў,

¹⁵ з племені Нэфталімавага Нахбій, сын Вофсіеў,

¹⁶ з племені Гадавага Геуіл, сын Махіеў.

¹⁷ Вось імёны мужоў, якіх пасылаў Майсей агледзець зямлю. І назваў Майсей Асію, сына Нававага, Ісусам.

¹⁸ І паслаў іх Майсей агледзець зямлю Ханаанскую і сказаў ім: ідзеце ў гэтую паўднёвую краіну, і падымецеся на гару,

¹⁹ і агледзьце зямлю, якая яна, і народ, які жыве на ёй, ці моцны ён, ці слабы, ці малы ён лікам, ці вялікі?

²⁰ і якая зямля, на якой ён жыве, ці добрая яна, ці благая? і якія гарады, у якіх ён жыве? ці ў намётах ён жыве, ці ва ўмацаваньнях?

²¹ і якая зямля, ці тлустая яна, ці пустая? ці ёсьць на ёй дрэвы, ці няма? будзьце адважныя і вазьмеце ад пладоў зямлі. І было гэта ў пару пасьпяваньня вінаграду.

²² Яны пайшлі і агледзелі зямлю ад пустыні Сін нават да Рэхова, непадалёк ад Эмата;

²³ і пайшлі ў паўднёвую краіну і дайшлі да Хэўрона, дзе жылі Ахіман, Сэсай і Талмай, дзеці Энакавы: а Хэўрон пабудаваны быў на сем гадоў раней за Цоан Егіпецкі;

²⁴ і прыйшлі да даліны Эсхол, і зрэзалі там вінаградную галінку з адной гронкаю ягад, і панесьлі яе на жардзіне двое; узялі таксама гранатавых яблыкаў і смокваў;

²⁵ мясьціну гэтую назвалі далінаю Эсхол, з прычыны вінаграднай гронкі, якую зрэзалі там сыны Ізраілевыя.

²⁶ І агледзеўшы зямлю, вярнуліся яны праз сорак дзён.

²⁷ І пайшлі і прыйшлі да Майсея і Аарона і ад усяго супольства сыноў Ізраілевых у пустыню Фаран, у Кадэс, і прынесьлі ім і ўсяму супольству адказ, і паказалі ім плады зямлі;

²⁸ і расказвалі яму і казалі: мы хадзілі ў зямлю, у якую ты пасылаў нас; у ёй сапраўды цячэ малако і мёд, і вось плады яе;

²⁹ але народ, які жыве на зямлі той, моцны, і гарады ўмацаваныя, даволі вялікія, і сыноў Энакавых мы бачылі там.

³⁰ Амалік жыве на паўднёвай частцы зямлі, Хэтэі, Евусэі і Амарэі жывуць на гары, Хананэі жывуць каля мора і на беразе Ярдана.

³¹ Але Халеў супакойваў народ перад Майсеем, кажучы: пойдзем і завалодаем ёю, бо мы можам адолець яе.

³² А тыя, якія хадзілі зь ім, казалі: ня можам мы ісьці супроць народу гэтага, бо ён мацнейшы за нас.

³³ І распускалі благія чуткі пра зямлю, якую яны аглядалі, сярод сыноў Ізраілевых, кажучы: зямля, якую праходзілі мы для агляду, ёсьць зямля, якая паядае тых, што жывуць на ёй, і ўвесь народ, які мы бачылі сярод яе, людзі рослыя;

³⁴ там бачылі мы і волатаў, сыноў Энакавых, ад валатоўскага роду; і мы былі ў вачах нашых перад імі, як саранча, такімі самымі былі мы і ў вачах іхніх.