Jueces 10:6 - Qullan Arunaka DC

⁶ Israelitanakax wasitatampiw Tatitun nayraqatapan jan walinak lurapxäna, ukatsti Baal, Astarté diosanakan kunayman uñtasitanakaparuw yupaychapxäna, ukhamaraki Siria, Sidón, Moab, Amón, filisteonakan diosanakaparusa. Diosaru taqi chuyma yupaychañxa apanukxapxänwa.

Aymar Bibliia 1986

⁶ Israelitanacasti wastatampiw Dios nayrakatana jan walinac lurjjapjjaraquiquïna cunayman Baal Astarté sat c'ari diosanacar yupaychasina. Uqhamarac Siria, Sidón, Moab, Amón uca marcanquirinacan diosanacaparu, filisteonacan diosanacapar yupaychasinjja Diosaru take chuyma yupaychañjja apanucjjapjjänwa.

Qullan Arunaca

⁶ Israelitanacasti wastatampiw Dios nayrakatana jan walinac lurjjapjjaraquiquïna cunayman Baal Astarté sat c'ari diosanacar yupaychasina. Uqhamarac Siria, Sidón, Moab, Amón uca marcanquirinacan diosanacaparu, filisteonacan diosanacapar yupaychasinjja Diosaru take chuyma yupaychañjja apanucjjapjjänwa.

Jueces 10:6 Jak'a apnaqawi uñst'ayäwi

1 Reyes 11:33

Salomonax nayar apanukutuwa, sidonionakan Astarté sat diosaparuw yupaychxi; moabitanakan Quemós sat diosaparu; amonitanakan Milcom sat diosaparuw yupaycharaki. Jupan luratanakapasti nayan nayraqataxan janiw sumäkiti, janirakiw kamachinakaxsa, arsüwinakaxsa phuqkiti, kunjämtix David awkipax lurkän ukhama.

1 Reyes 11:5

Salomonax sidonionakan Astarté sat diosapampiru, amonitanakan Milcom sat axtkañ diosapampiruw yupaychäna.

1 Reyes 11:7

Khä urunakansti Salomonax Jerusalenat inti jalsu tuqinkki uka qullun, mä yupaychäwi chiqa Quemós sat Moab markan axtkañ idolopatak luräna, ukhamaraki amonitanakan Moloc sat axtkañ idolopatakisa.

1 Reyes 16:31

jupatakix Jeroboam reyin pachpa juchanakap lurañax janis kunäkaspa ukhamänwa. Jupasti Sidón chiqankir Et-baal reyin Jezabel phuchhapampiw jaqichasïna, ukatsti Baal diosatakiw alt'asïna, ukaruw yupaycharakïna,

2 Reyes 17:16

Tatit Diosapan kamachi arunakap apanukusasti, broncet pä vaca qallu lursusipxäna, ukhamarus Astarté diosar uñtatanak lurapxäna, ukatsti Baal diosaru, intiru, phaxsiru, warawaranakaruw yupaychapxäna.

2 Reyes 23:13

Ukatsti Josías reyix, Jerusalén markat inti jalsu tuqin utjkatayna uka yupaychañ utanak takichasirakïna, Olivos qullut aynach tuqina, ukanaksti Israelan Salomón reyipaw luratayna sidonionakan Astarté sat axtkañ diosapataki; moabitanakan Quemós sat uñiskañ idolopataki; amonitanakan Milcom sat uñiskañ idolopataki.

2 Crónicas 28:23

Jupax Damasco chiqankir diosanakaparuw wilañchanak luqtäna, jupar aynacht'ayki uka diosanakaru. Jupax akham amuyäna: “Siriankir diosanakax reyinakaparux yanapt'iwa, uka diosanakaparutix wilañchanak luqtä ukaxa, nayarux yanapapxarakitaniwa” sasa. Ukampis uka luratanakapaw juparu, Israel markpacharux aynacht'ayäna.

Salmos 106:36

diosanakaparuw yupaychapxäna, ukat jan walt'añanakar puripxäna,

Isaías 23:4

Jichhasti Sidón markankirinaka, p'inqachjatäñampiw phuqhantasipxäta; jumanakax quta taypinjam sum sarnaqañ yatipxtaxa, ukampis lamar qutax janiw qamir yänak churxapxätamti, wawanakamas janirakiw suma yänak jikxatxapxaniti.

Jeremías 2:13

“Markaxax pä jach'a juchanak luri: Naya suma jakañ umarusti, apanukuwayapxituwa, ukatsti jupanakax pachpa phuch'unakap allisipxi, uka phuch'unakaparusti umax janiw sayt'karakiti.

Jeremías 2:20

“Nayratpach nayatakix sayt'astaxa, janiw nayar jayskarakistati. ‘Janiw luqtañ munkti’ saraktawa. Taqi alay qullunakana, jach'a quqanak k'uchunakan yaqhampi jucha luras sarnaqtaxa.

Jeremías 32:23

Ukampis kunapachatix jupanakax aka uraqir utjantañatak mantanipkäna ukapachasti, janiw jumarux ist'apkäyätamti, kuna arunaktix siskäyäta ukanaksa janirakiw phuqhapkäyätamti. Ukat jichhax taqi aka t'aqhisiñanak apayantaxa.

Ezequiel 27:16

Aljañ yänakamax kunaymanïnwa, ukat Siria markas jumampix alakipa lurarakïna, suma qalanakampi, linot lurat suma isinakampiw alasïyätamxa.

Deuteronomio 13:6

6 (7) “Juman jilamatixa, pachpa jilamäkasina, jan ukax yuqall wawamasa, imill wawamasa, munat warmimasa, wali munat masimasa, jamasat jumar yaqha diosanakar yupaychayañ amtayätam, kawkïr diosanakarutix jumasa, awkinakamas jan uñt'kän ukaru,

Deuteronomio 13:8

8 (9) janipuniw jupanakan munañanakap lurätati janiw ist'ätasa; janirakiw jupanakat khuyapayasïtati, jupat khuyapt'ayasisas imt'amti,

Deuteronomio 31:16

Ukat Tatitux Moisesar säna: “Niyaw jumax jiwxäta, ukapachasti aka markax aka uraqin utjir jaqinakan k'ari diosanakaparuw yupaychani; ukapachasti apanukxitaniwa, jupampi lurat suma arust'äwirux p'akintarakiniwa.

Deuteronomio 31:17

Ukampis q'apisiñaxaw jupanakatak aqtani, jupanakarusti apanukurakïwa; janiw kunatakis jupanakat amtaskäti, jan walt'añanaka, llakisiñanak jupanakxar apayanï, ukat jupanakax sapxani: ‘¿Tatit Diosasasti janit jiwasampïkxpacha, ukatti aka t'aqhisiñanakan jikxataspachätansti?’ sasa.

Deuteronomio 32:15

“Ukampis israelitanakax jach'aptxänwa, Diosat armasxapxarakïnwa; irnuqasir Diosaparux apanukünwa, arxatir qhispiyiriparusti, jisk'acharakïnwa.

Josué 13:31

Galaad uraqit chikatpacha, Astarot, Edrei markamppacha. Taqi uka uraqinakasti Manasés chachan Maquir yuqapan wawanakapat chikatatakïnwa, qawqhäkitix wila masi tamanakapax ukarjama.

Jueces 10:5

Jaír chachax jiwxäna ukkhaxa, Camón sat chiqar imt'atäxänwa.

Jueces 11:24

Quemós diosamatix mä kunsa jumankañapatak churätam ukaxa, jumax ukanakxa jumankirit uñt'astaxa, ¿janich ukhamäkixa? Uka kipkarakiw nanakax kuntix Tatitux nanakar churapkitu ukanakxa, nanakankirit uñt'asxapxta.

Jueces 13:1

Israelitanakax wasitatampiw Tatit nayraqatan jan walinak lurxapxäna. Tatitusti jupanakarux pusi tunka maraw filisteonakan amparapar katuyäna.

Jueces 16:23

Filisteonakan jilïrinakapasti Sansonar atipt'apxatapat uruyañatakiw tantachasipxäna, Dagón sat diosapar wilañchanak luqtañataki. Jupanakasti akham sasaw q'uchupxäna: “Jiwasan diosasawa, Sansón uñisirisarux amparasar katuyistu” sasa.

Jueces 3:7

Israelitanakan luratanakapax Tatit nayraqatan janiw walïkänti, Tatitu Diosapat armasisin Baal, Astarté uka diosanakan uñtasitanakaparuw yupaychapxäna.

Jueces 4:1

Ehud chachan jiwxatapatsti, israelitanakax Tatit nayraqatan wasitat jan walinak lurapxäna,

Jueces 6:1

Israelitanakan luratanakapax Tatit nayraqatan janiw walïkänti, ukat Tatitux jupanakar paqallqu mara madianita jaqinakan amparapar katuyäna.

Jueces 8:33

Gedeonan jiwxatapatsti, israelitanakax Diosat armasisin Baal diosan kunayman uñtasitanakaparu yupaychiriw kuttawayxapxäna, ukatsti Baal-berit ukaruw diosapäñapatak ajllisipxäna.

1 Samuel 5:2

ukatsti Dagón sat diosan templopar apantasinxa, uka diosap jak'aruw uchapxäna.