Apocalipsis 7:3 - Qullan Arunaka DC

³ akham sasa: “¡Jan kuna ñanqhsa uraqir lurapxamti, janirak jach'a qutarusa, janirak quqanakarusa, Tatit Diosasan luqtirinakapar paranakapat chimpuntañkama!” sasa.

Aymar Bibliia 1986

³ aqham sasa: “¡Jan cuna ñankhsa lurapjjamti aca orakeru, ni kotarusa, ni kokanacarusa, janïr Tatit Diosan sirvirinacaparu paranacapat sellonacampi chimpt'casina!” sasa.

Qullan Arunaca

³ aqham sasa: “¡Jan cuna ñankhsa lurapjjamti aca orakeru, ni kotarusa, ni kokanacarusa, janïr Tatit Diosan sirvirinacaparu paranacapat sellonacampi chimpt'casina!” sasa.

Apocalipsis 7:3 Jak'a apnaqawi uñst'ayäwi

Éxodo 12:13

“ ‘Ukampis juma israelitanakax janiw axsarapxañamäkiti; punkunakar wilampi jawsupkäta ukaw nayatak mä chimpüni. Nayasti uñjasinxa, sarakipawayxakïwa, janiw jilïr wawanakamarux kamachkäsa,

Éxodo 12:23

Tatitux egipcionakar jiwarayir sarakipkani ukapachasti, uta punkun wila uñjasinxa, uka uta sarakipawayxakiniwa, Tatitux janiw jumanakat maynin jiwañapsa munkaniti.

Isaías 27:8

Tatitux jaya markar apayasaw markapar mutuyi, mä jach'a thayjam phust'asaw apanuku, kunjämtix inti jalsu thayax phust'anki ukhama.

Isaías 54:17

ukampis jumar tukjañatakix janiw khitis nuwasiñ yänak lurkiti. Jumar juchañchapkätam ukanakarux amukt'ayätawa. Nayar arkapkitu ukanakarusti atipt'añ churta”. Tatituw ukham arsu.

Isaías 6:13

Inas patak jaqitxa tunkan jilt'chini, uka tunkanimppachaw jiwarayatäni, kunjämatix mä quqax khuchhunukutaxa, k'ullu tunu sapak qhiparki ukhamäniwa.” Ukampis mä qawqha israelitanakax janiw jiwarayatäpkaniti, jupanakat mä jaysasir chiqap markaw jutirin sayt'ani.

Isaías 65:8

Tatitux siwa: “Kunapachatix uvanakax suma puqurt'atäki ukkhax jaqix janiw maysa jalaqtaykiti, ukhamat walja vino apsuñataki. Ukhamarakiw nayax luqtirinakaxar munasitax laykux janiw taqinir tukjkäti.

Ezequiel 9:4

juparusti sarakïnwa: “Jerusalén marka muytam, ukatsti uka markan jan wali luräwinakap layku llakt'ata jikxatasir jaqinakan parapar mä chimpu uchäta” sasa.

Daniel (hebreo) 3:17

Nanakan Diosaxasti, khitirutix nanakax yupaychapkta ukaxa, uka aqkiri ninatsa jark'aqasipkakitaniwa, kuna jan walinaktix juma reyix lurañ munapkista ukanakat qhispiyapxitaniwa.

Daniel (hebreo) 3:26

Ukham sasinsti, Nabucodonosor reyix horno punkur jak'achasisin art'äna: —¡Sadrac, Mesac, Abed-nego, alaxpach Diosan luqtirinakapa, mistunxapxam, akar jutapxam! —sasa. Uka kimsa waynanakasti nina lawra taypit mistunxapxäna.

Daniel (hebreo) 6:16

16 (17) Ukat reyix Danielar irptayanïna, leonanakan putupar jaquntapxañapataki. Ukampis janïr jaquntapkipan reyix Danielar sarakïna: —Jumax taqi chuymamamp yupaychkta uka Diosamax jumar qhispiypan —sasa.

Sofonías 2:3

Jumanakax Tatituruy thaqtapxam, aka uraqin llamp'u chuyman jaqinaka, arunakapar phuqhas sarnaqirinaka. Ukatsti chiqa kankañampi llamp'u chuymampirak sarnaqapxam, inas ukhamat Tatitun jach'a q'apisiñ urupan jumanakax imantasiñ jikxatapxchisma.

Malaquías 3:18

Ukapachaw jumanakax amuyasipxäta kunatix askïki, kunatix jan askïki uka, ukhamaraki, khititix Diosar yupaychki, khititix jan yupaychki ukanaka” sasa.

Mateo 24:22

Diosatix uka urunak jan jisk'aptaykaspa ukaxa, janiw khitis qhispiyaskaspati, ukampis ajllitanakapar munatap laykuw Diosax uka urunak jisk'aptayani.

Mateo 24:31

Jupaw angelanakapar khithanini, jach'at trompeta phust'añapataki, ukampiw ajllitanakapar pusi tuqit jawsthapini; maysa thiyata maysa thiykama.

Juan 12:26

Maynitix luqtañ munchituxa, arkitpan, nayar arkiristi, nayamp chikaw utjasini. Nayar arkasin luqtirirusti, Awkixaw jach'añchaskani —sasa.

Juan 3:33

Kawkïritix iyawski ukaxa: Diosan arsutapax “Chiqawa” siwa;

Romanos 6:22

Jichhasti, juchan t'aqhisiyatat antutatäxasaxa, Diosatak irnaqiriw tukxapxtaxa. Ukapï jumanakatak askixa, tukuyapasti q'uma jakañawa wiñay jakañarakiwa.

Apocalipsis 13:16

Ukhamarus taqinin kupi amparapampiru, jan ukax, parapampiruw mä chimpu chimpt'ayäna, jisk'a jaqirusa, jach'a jaqirusa, pist'añan jakasir jaqirusa, qamirirusa, antutat sarnaqasirirusa, uywat jaqirusa.

Apocalipsis 13:17

Janirakiw khitis kun alasiñapäkänti, aljasiñapäkänsa, janitix uka chimpunïkäna, jan ukax, uka jach'a axsarkañ animalan sutipampi chimpt'atäkäna, jan ukax, uka axsarkañ animalan sutipan jakhupanïkän ukaxa.

Apocalipsis 14:1

Ukatsti Corderoruw uñjta, Sión qullu patan sayaskiri. Jupamp chikasti patak pusi tunka pusin waranqa jaqinakaw ukankaskäna, jupanakasti paranakaparux Corderon sutipampi, Awkipan sutipampi qillqt'atäpxänwa.

Apocalipsis 14:9

Ukxarusti kimsïr yaqha angelarakiw jupanakar arktäna, wali jach'at art'asisa: “Khititix uka jach'a axsarkañ animalar yupaychkani, ukar uñtasit lursutarus yupaychkani, uka axsarkañ animalan chimpupampi amparaparusa, jan ukax, paraparus uchayaskani ukaxa,

Apocalipsis 19:2

jupax chiqapar uñjasaw markanakar taripi; jach'a q'añusirirusti juchañchiwa, uka q'añusitapampiw taqi jaqinakar jan walir apaskäna; Diosan luqtirinakapar jiwarayatapat juchañcharaki” sasa.

Apocalipsis 20:4

Ukatsti reyi qunuñanak uñjarakta, uka qunuñanakansti, khitinakatix Jesucriston qhanañchataparu, Diosan yatiyäwipar taqi chuymampi sayt'apxatap layku jiwayat uñjasipkatayna, ukanakaw qunt'atäsipkäna. Jupanakax janiw uka jach'a axsarkañ animalarusa, ukar uñtasit lursutarus yupaychapkataynati, janirakiw chimpupsa paranakaparu, amparanakapar uchayasipkataynati. Jupanakasti jaktapxänwa, Diosasti jupanakar reyi qunuñanak churäna, Cristompi waranqa mara apnaqapxañapataki.

Apocalipsis 22:4

Taqiniw ajanuy ajanu Diosar uñkatapxani, paranakaparusti Diosan sutip qillqantat apapxani.

Apocalipsis 6:6

Ukatsti uka pusi jakaskirinak taypit mä aru ist'arakta akham siri: “Mä urpacha irnaqatat qullqi katuqatax mä kilo trigo, jan ukax, kimsa kilo cebada alasiñatakikïniwa; ukampis janiw aceitempina, vinompin alap irxattayätati” sasa.

Apocalipsis 7:1

Uka qhipatsti, pusi angelanakaruw uñjarakta. Jupanakasti aka uraqin pusi tuqitpach sayt'atäsipkänwa, pusi tuqit jutir thayanak jark'asipkäna, kuna thayas aka uraqxar jan thayt'aniñapataki, janirak jach'a qutanakxarusa, kuna quqanakxarusa.

Apocalipsis 7:2

Ukatsti inti jalsu tuqit yaqha angelar jutaskir uñjarakta, jupasti jakaskir Diosan chimpupanïnwa. Uka angelasti wali jach'at art'äna maynïr pusi angelanakaru, uka angelanakasti munañanïñ kankañ katuqapxatayna aka uraqimpiru, jach'a qutampir jan walt'ayañataki,

Apocalipsis 9:4

Ukanakasti uraqinkir quranakaru jan ñanqha lurapxañapatakiw ixwa katuqapxäna, janirak kuna ch'uxñanakarusa, kuna quqanakarus ñanqha lurapxañapataki, jan ukasti, khitinakatix Tatitun chimpupampi paranakapan jan chimpt'atäpki uka jaqinakaruk t'aqhisiyañataki.