Apocalipsis 17:3 - Qullan Arunaka DC

³ Ukatsti, Ajayux uñacht'aykitu uka unañchäwi tuqiw angelax wasarar irpitu. Uka wasaransti mä warmi uñjta, mä axsarkañ jach'a wila animalxar qunxatata. Uka axsarkañ animalasti Diosar ñanqhachir sutinakampi qillqsutänwa, paqallqu p'iqinïnwa, tunka waxranirakïnwa.

Aymar Bibliia 1986

³ Cuna unañchäwtï Ajayojj uñacht'ayquitu uca tokjja, angelajj wasararuw irpjjetu. Ucansti mä warmi uñjta mä jach'a wila ajjsarcañ animaljjaru lat'jjatata. Uca ajjsarcañ animalasti Dios contra sutinacampi kellksutänwa, pakallko p'ekeniraquïnwa, tunca wajjran cuna.

Qullan Arunaca

³ Cuna unañchäwtï Ajayojj uñacht'ayquitu uca tokjja, angelajj wasararuw irpjjetu. Ucansti mä warmi uñjta mä jach'a wila ajjsarcañ animaljjaru lat'jjatata. Uca ajjsarcañ animalasti Dios contra sutinacampi kellksutänwa, pakallko p'ekeniraquïnwa, tunca wajjran cuna.

Apocalipsis 17:3 Jak'a apnaqawi uñst'ayäwi

1 Reyes 18:12

Ukat juk'ampi, nayax juma jak'at saraqawaykäma ukspachaw Tatitun ajayupax aptawayätam, nayasti janiw kawkinkatamsa yatkäti. Ukatsti kunapachatix nayax Ahab reyiru juman akankatam yatiyä ukkhaxa, jupax jutaniwa, ukatsti janiw jumar jikxatkätamti, ukatsti nayarux jiwayitaniwa. Naya, juman luqtirimax waynatpach Tatitur axsartirïtwa.

2 Reyes 2:16

sapxänwa: —Eliseo, nanaka luqtirinakam taypinxa, phisqa tunka jan axsarir chachanakaw utji, jupanakax jank'akiw sarañ munapxi Elías yatichirimar thaqhiri, inas Diosan ajayupax aptasin mä kawki qullu patarusa, jan ukax, mä qhirwarus jaqunukuwaychi —sasa. Ukampis jupax sänwa: —Janiwa, jan khitirus khithapxamti —sasa.

Cantar de los cantares 8:5

¿Khitirak wasarat jutaski, munasitapan kallachipxar alxatatasti? Manzano ali jak'an jumarux ikit sartaysma; ukanwa taykamax wawachasiñ usupa sartayasi; ukanarak taykamax jumarux wawachastam.

Ezequiel 11:24

Ukatsti Tatitun ch'amapaw nayar aptawayasax Babiloniar kuttayitu, kawkhankapkäntix apanukuyata jaqinakax uka markaru. Taqi aka luräwinaksti, Tatitun Ajayupaw unañchäwi tuqi uñjayarakitu. Uka qhipatsti uka unañchäwix chhaqtawayxänwa,

Ezequiel 3:12

Ukapachaw Tatitun ch'amapax nayar aptawayitu, nayan qhipäxaxansti mä jach'a uraqi khathatis jach'a ch'amampi unxtkaspa ukham ist'arakta, ukasti Tatitun jach'a kankañapaw ukawjat sartäna.

Ezequiel 8:3

Uka jaqisti mä amparampjamaw luqtanisax ñik'utat katuntitu. Ukat Tatitun ch'amapax alayar tuytayitu, Tatitux unañchäwinak tuqiw Jerusalén markar irpitu, ukatsti marka manqhana amsta tuqi uñtatäki uka punku chiqaruw sayt'ayitu, uka chiqanarak Tatitur q'apisiyiri idolox jikxatasïna.

Daniel (hebreo) 11:36

“ ‘Amsta tuqinkir reyisti kuntix jupax munkani uk lurani. Jach'a jach'a tukutapatxa, jupax taqi diosanakatsa juk'amp ch'amanïtap amuyasini, chiqpach Diosatakisti kunayman ñanqha arunak arsuni; taqi kunas jupatakix wakiskiriw mistuni; Diosax jupatak mutuyäwipa apayankani ukapachkama, kuntix Diosax lurañapäki ukxa, luraniwa.

Daniel (hebreo) 7:20

Nayax juk'amp yatxatañ munarakïyäta tunka waxrapata, ukhamaraki uka waxranak taypit mä jisk'a waxra mistunkän ukata, kawkïritix nayrani, wali jach'achasiñampi parlir lakanïkän ukata, uka jisk'a waxrasti amuyatatxa maynïr waxranakat sipan juk'amp jach'jamakïnwa, uka jisk'a waxran mistuniñapatakisti, kimsa waxranakax jalaqtxapxataynawa.

Daniel (hebreo) 7:25

Alaxpachankir Diosarusti jisk'achjaniwa; markaparus tukjarakiniwa; Diosan kamachinakapsa, amtäwi uruyañanaksa mayjt'ayañ munarakini, Diosan markapasti jupan apnaqatarakïniwa, kimsa mara chikatankama.

Daniel (hebreo) 7:8

“Waxranak uñch'ukiñkamasti, uka waxranak taypit yaqha jisk'a waxraw jilsunïna, ukatsti kimsa waxranakxa jik'irapxänwa, ukanak lantisti qhipa mistunir jisk'a waxraw ukankxäna, uka waxrax jaqi nayrat nayranïnwa, lakapasti wali jach'a jach'a tukusaw arsüna.

Mateo 27:28

Isinakap apsusinsti, wila chupika isimpiw uchapxäna,

Hechos 8:39

Umat mistxapxän ukapachasti, Tatitun Ajayupaw Feliperux aptawayxäna, uka aytat jaqisti janiw mayampsa Feliperux uñjkxänti; ukampis jupax k'uchikiw thakhinjam saraskakïna.

2 Tesalonicenses 2:4

Jupax Diosan sutip apki ukanakatak sayt'ir uñisiriwa, janiw Diosan yupaychatäñap munkiti, ukhamarus jupax Diosan utapan qunuñap utt'ayasi, Diosäkaspas ukham tukusa.

Apocalipsis 1:10

Kunürutix Tatitun urupäkän uka urun nayax Qullan Ajayun apnaqat uñjasta, ukatsti mä jach'a aru ist'ta qhipäxaxat art'asiniri, uka arusti mä trompetas phust'askaspa ukhamänwa,

Apocalipsis 12:14

Ukampis warmirux pakan pä jach'a chhiqhanakapaw churasïna, uka chhiqhanakampi wasarar jaltxañapataki, dragonat jayaru, kawkhantix kimsa mara chikatan manq'ayapkani ukkharu.

Apocalipsis 12:3

Ukatsti yaqha chimpuw alaxpachan uñstarakïna: mä jach'a wila dragón animalaw uñstäna, ukasti paqallqu p'iqinïnwa, tunka waxran kuna, sapa p'iqirusti mä pillumpi asxatata.

Apocalipsis 12:6

Warmisti wasararuw jaltxäna, Diosax jupatak mä chiqa wakichkatayna ukkharu, ukawjan waranqa pä pataka suxta tunkan uru jupar uñjapxañapataki.

Apocalipsis 17:18

Uñjktas uka warmix, uka jach'a markawa, reyipasti aka uraqin utjir taqi reyinakaruw apnaqi” sasa.

Apocalipsis 17:4

Warmisti wila chupika suma isimpi isthapitänwa, qurimpi, suma qalanakampi, perlanakampi k'achachatarakïnwa. Kupi amparaparusti qurit lurat qiru ast'atänwa, uka qirusti ñanqha luratanakapampi, q'añusitanakapamp phuqhantatänwa;

Apocalipsis 18:12

quri, qullqi yänak alasïna, suma k'ajkir qalanaka, perlanaka, linot lurat suma sawutanaka, suma wila chupika sawutanaka; suma q'aphin kunayman lawanaka; marfilat lurat yänaka, suma lawanakat lurata, bronceta, hierrota, marmolat lurat yänak alasïna;

Apocalipsis 18:16

sapxani: “¡Ay! ¡Kunarurak purt'asta! ¡Llakkañätaw ch'aman jach'a marka! Suma lino isinakampi isthapitaw sarnaqäyätaxa, suma wila chupika isinakampi, qurimpi, suma k'ajkir qalanakampi, suma perlanakampiw k'achachasïyätaxa.

Apocalipsis 21:10

Ajayux uñjaykitu uka unañchäwinsti, angelax mä jach'a qullur irpsusin uñacht'ayitu, Diosan nayraqatapat qullan Jerusalén jach'a markar saraqasinkiri.

Apocalipsis 4:2

Nayasti ukspachaw Qullan Ajayun apnaqat uñjasta, ukatsti alaxpachan mä qhapaq qunuñ uñjta, uka qunuñansti mayniw qunt'atäskäna.