Apocalipsis 1:1 - Qullan Arunaka DC

¹ Diosaw Jesucristor uñacht'ayäna, kunatix jank'ak luraskani ukanakxata, ukhamat jupax luqtirinakaparu yatiyañapataki. Ukat Jesucristox aka uñacht'äwxa Juan luqtiripar mä angelap tuqi yatiyäna.

Aymar Bibliia 1986

¹ Acajja cuntejj Diosajj Jesucristor uñacht'aycäna ucawa, uqhamat jupajj sirvirinacaparu yatiyañapataqui, cunatejj janc'aqui lurascani ucjjata. Jesucristojj aca uñacht'äwjja mä angelap tokwa Juan sirviriparu yatiyi.

Qullan Arunaca

¹ Acajja cuntejj Diosajj Jesucristor uñacht'aycäna ucawa, uqhamat jupajj sirvirinacaparu yatiyañapataqui, cunatejj janc'aqui lurascani ucjjata. Jesucristojj aca uñacht'äwjja mä angelap tokwa Juan sirviriparu yatiyi.

Apocalipsis 1:1 Jak'a apnaqawi uñst'ayäwi

Salmos 25:14

Tatitux arkirinakapampix sum parlasi, jupanakarusti arust'äwir mantatap uñt'ayi.

Daniel (hebreo) 8:16

ukatsti mä jaqin arup ist'arakta, Ulai sat jawir tuqit parlasinkiri akham sasa: ‘Gabriel, uka jaqir aka unañchäwi tuqit qhanañcham’ sasa.

Daniel (hebreo) 9:21

Mayisiskäyäta ukapachaw, unañchäwin uñstkitäna uka Gabriel sat angelax jak'axar jutäna. Ukapachasti, Tatitur jayp'u chiqa wilañcha luqtañ pachäxänwa.

Daniel (hebreo) 9:23

Diosax walpun jumar munastam, jumax mayisiñ qalltkta ukspachaw jupax ist'tam. Nayasti jumar kuntix Diosax sañ munktam uk yatiyiriw jutsma. Jichhasti sum sum arunakaxar ist'am, uka unañchäwin qhanañchäwip amuyt'añamataki:

Amós 3:7

Tatitux janipuniw kunsa lurkaspati profeta luqtirinakapar jan yatiykasaxa.

Juan 12:49

Nayax janiw naya pachpat parlkti; jan ukasti nayar khithankitu uka Awkiw yatiyitu kuntix arsuñaxäki, yatichañaxäki uka.

Juan 15:15

Janiw nayax jumanakar “uywatanaka” sas sutichapksmati, mä uywatax janiw uywiripan luratanakap yatkiti. Nayax jumanakarux “jila masinaka” sapxsmawa, kuntix Awkixax siskitu uk jumanakar yatiyatax layku.

Juan 17:8

jupanakarusti juman arunakam churta, jupanakasti katuqapxiwa. Jichhasti nayan jumat jutatax yatipxi, uksti iyawsapxarakiwa.

Juan 3:32

kuntix uñjki, ist'karaki ukanakat qhanañchi; ukampis janiw khitis jupan arsutapar iyawskiti.

Juan 8:26

Ukampis jumanakan jan wali luratanakamat sañaxaw utjaskitu; khititix khithankitu ukax chiq arsu, nayasti kuntix jupat ist'kta ukarak akapachar sista.

Romanos 16:25

Diosaruy yupaychapxañäni, jupaw jumanakarux ch'aman tukuyapxiristam, nayax jumanakar Diosan suma yatiyäwi arunak yatiykta ukarjama, Jesucristo tuqit yatichäwiparjama. Akasti Diosax imantat amtäwinakap uñstaykän ukarjamawa, ukasti akapachax janïr utjkän ukkhatpach imantatäskänwa,

Gálatas 1:12

Janiw nayax khiti jaqitsa katuqkti, janirakiw khitis yatichkituti, jan ukasti, pachpa Jesucristow nayar yatichitu.

Efesios 3:3

Diosax mä unañchäwi tuqiw nayarux imantat amtäwip yatiyitu, ukxat qalltan yatiyapksma mä juk'a arunak qillqanisa.

Tito 1:1

Naya Pablox Tatitun luqtiripätwa, Jesucriston apostolupa, jupan khithataraki, khitinakarutix Tatitux ajlliski jupanakar iyawsañar irpaniñaxataki, Tatitun chiqa yatichäwinakap uñt'apxañapataki,

Apocalipsis 1:19

Kuntix uñjktas uk qillqantam, kunatix jichhax utjki, kunatix akat qhipar utjkani ukanaksa qillqantarakim.

Apocalipsis 1:9

Naya, Juanax, jumanakan jilamätwa, Jesusampi mayacht'asitax layku, t'aqhisïwinakan ch'amampi mututax laykusti, jumanakamp chikax Diosan ajllit markapankirïtwa. Diosan arunakap yatiyatax layku, Jesucristot parlatax laykurakiw Patmos quta wat'an nayax katuntat jikxatasïyäta.

Apocalipsis 17:1

Ukatsti paqallqu qirunïpki uka paqallqu angelanakat mayniw nayan ukar jutasin situ: “Jutam, q'añu lurañanakan sarnaqirin mutuyäwip uñjayäma, jupasti walja jawiranak taypin qunt'atawa.

Apocalipsis 19:10

Nayasti yupaychañatak angelan nayraqataparuw killt'asta, ukampis jupax situwa: “Jan uk luramti, nayax jumjam luqtirikïtwa, ukhamarak khitinakatix Jesucriston qhanañchatapar taqi chuymampi arkapki ukanakjam luqtirikirakïtwa. Diosaruy yupaycham” sasa. Jesucriston uka qhanañchatapasti Diosat parlirinakaruw amuyt'ayi.

Apocalipsis 19:9

Ukatsti angelax sarakituwa: “Aka arunak qillqam: ‘Corderon jaqichasïwipar jawsayatanakax kusisiñanïpxiwa’ ” sasa. Ukatsti saskakiwa: “Aka arunakax Diosan chiqa arunakapawa” sasa.

Apocalipsis 21:2

Ukatsti qullan marka uñjta, machaq Jerusalén. Uka markasti Diosan nayraqatapat saraqasinkäna, jaqichasiñatak suma isthapt'at mä tawaqur uñtata, jaqichasir waynar katuqañatakjama.

Apocalipsis 21:9

Ukatsti mä angelaw juti, uka angelasti qhipïr paqallqu t'aqhisïwinakan phuqt'ata paqallqu qirunak ast'atakän uka angelanakat maynirïnwa, uka angelasti situwa: “Jutam, khititix Corderon esposapäkani ukaruw uñacht'ayäma” sasa.

Apocalipsis 22:1

Ukatsti angelax jakañ churir mä suma q'uma jawir uñacht'ayitu. Uka jawirasti Diosampina, Corderompin qhapaq qunuñapat mistunïna, qhispir uñtat suma ch'uwarakïnwa;

Apocalipsis 22:16

“Naya, Jesusaw angelaxar khitta iglesianakar taqi akanak yatiyañapataki. Nayätwa David reyit saraqirixa; qhantati ururi warawarätwa.”

Apocalipsis 22:6

Angelasti sarakituwa: “Aka arunakax aski chiqap arunakawa, profetanakar unañchir pachpa Tatit Diosaw angelapar khithani, jank'ak phuqhaskani ukanak luqtirinakapar uñacht'ayiri” sasa.

Apocalipsis 22:8

Naya, Juanaw, ist'ta, taqi ukanak uñjarakta. Ukanak ist'asa, uñjasasti, uñacht'aykitu uka angelan nayraqataparuw jupar yupaychañatak killt'asta.

Apocalipsis 22:9

Ukampis jupax situwa: “Jan uk luramti. Diosaruy yupaycham, taqpach jiwasanakax jupan luqtiripätanwa, nayasa, jumasa, profetanakasa, Diosan arunakapar jaysirinakasa” sasa.

Apocalipsis 4:1

Uka qhipatsti alaxpachan mä punku jist'arat uñjta; ukatsti trompetan phust'atapar uñtat nayraqat parlxaykitu uka arux sarakituwa: “Akawjar makhatanim, ukatsti kunanakatix akat qhipar luraskani ukanak uñacht'ayäma” sasa.

Apocalipsis 5:7

Uka Corderosti sartasin qhapaq qunuñan qunt'atäkän ukan kupi amparapat uka qillqat apaqi;