1 Samuel 3:19 - Qullan Arunaka DC

¹⁹ Samuelusti jiltaskakïnwa, Tatitusti juparux yanapänwa, arsutanakapsa jan mayan phuqharakïna.

Aymar Bibliia 1986

¹⁹ Samuelosti niya jilsuscaraquïnwa, Tatitusti juparojj yanaparaquïnwa, janiraquiw cuntejj arscatayna ucanacjja jan phokhasa jaytcänti.

Qullan Arunaca

¹⁹ Samuelosti niya jilsuscaraquïnwa, Tatitusti juparojj yanaparaquïnwa, janiraquiw cuntejj arscatayna ucanacjja jan phokhasa jaytcänti.

1 Samuel 3:19 Jak'a apnaqawi uñst'ayäwi

Génesis 21:22

Uka urunakansti Abimélec chachax Abrahamampi parliriw saräna. Ejercitopan jilïripa Ficol chachasti jupa chikaw sararakïna. Abimélec chachax Abrahamarux sänwa: —Nanakax Diosan taqi luräwiman jumar yanapatap uñjapxta.

Génesis 28:15

Nayaw jumampïskta; kawkirutix sarkäta ukan imaskapunïmawa, ukatsti aka pachpa uraqiruw kuttayanxäma. Arsutaxar phuqhañkamax janipuniw antutkämati” sasa.

Génesis 39:2

Ukampis Tatituw Joseampiskäna, uywiripan utapan jakañapkamasti taqi kunas Joseatakix walikïskänwa.

Génesis 39:3

Uywiripasti amuyarakïnwa Tatit Diosan Joseampïskatapa, ukat Joseatak taqi kunan walikïskatapa.

1 Reyes 8:56

“¡Tatitux jach'añchatäpan, jupaw Israel markapar samarañ churi, taqi arsutaparjama! Janiw armaskiti Moisés luqtirip tuqi kuna aski arsüwinaktix phuqhañatak arskäna ukanakxa.

2 Reyes 10:10

Jumanakax sum yatipxam, kuntix Tatitux Ahab reyin wila masinakapatak arskäna taqi ukax phuqhasiniwa. Tatit pachparakiw luri kuntix Elías luqtirip tuqi arskatayna ukxa —sasa.

2 Reyes 15:12

Ukhamat phuqhasïna kuntix Tatitux Jehú reyir yatiykatayna ukaxa: “Yuqanakama, allchhinakama, allchhinakaman allchhipaw Israel markan reyi qunuñapan qunt'asini” sasa.

2 Reyes 22:16

naya, Tatituw sista: Nayaw aka uraqirusa, jaqinakapxarus mä jan walt'añ apayanï, kunjämtix uka qillqatan Judá markankir reyix ullarki ukan yatiyatarjama.

Isaías 43:2

Taqi jan walt'añanakamanxa, nayaw jumampiskä; jawiranaksa makhatawayaskätawa, janiw umampi axskatas jiwkätati; ninanjam sarakipañamächixa, janiw nakhantat uñjaskätati,

Isaías 44:26

Ukampisa khitinakatix nayan luqtirixäpki ukanakan arunakap phuqhayapuntwa, khithatanakaxan amtatanakapsa suma mistuyarakta. Nayaw Jerusalenan wasitat jaqinïxañapatak arsta, Judá uraqinkir markanakas wasitat sayt'ayatäxañapataki: Aynacht'atanakapatsti nayaw jupanakarux sartayä.

Isaías 55:11

ukhamarakiw lakaxat mistkis uka arunakaxa, nayan ukarux janiw jan kun lurasax kuttankiti, jan ukasti kuntix nayax munkta uk luri, kuntix nayax siskta uk phuqharaki.

Mateo 1:23

“Chacha jan uñt'ir mä tawaquw usur jaqiptani, jupasti mä yuqall wawa wawachasini, juparusti Emanuel sutimpiw sutichani.” (ukasti: “Diosax jiwasampiwa” sañ muni).

Lucas 1:28

Angelasti Marian ukar mantasin sänwa: —¡Aruntsmaw María, jumax Diosan askip katuqtaxa! Tatitux jumampïskiwa —sasa.

Lucas 1:80

Yuqall wawasti jilaskänwa, ajayu tuqinsa ch'amañchasïnwa, jupasti wasar tuqinakan jakäna, kunürutix Israel markar uñstañapäkän ukürkama.

Lucas 2:40

Wawasti jiltänwa, ch'amanirakïnwa, yatiñansa phuqt'ata, Diosasti jupar wal yanaparakïna.

Lucas 2:52

Jesusasti janchinsa, yatiñansa jilaskakïnwa; Diosatakisa, jaqinakatakis askirakïnwa.

2 Corintios 13:11

Jilatanaka, kusisitäpxapunim. Jakañanakamansti chiqapapunïpxam. Ch'amañchasipxam, sumankañan jakasipxam; ukatsti munasiñani, samarañ churir Diosax jumanakampïskaniwa.

Deuteronomio 18:22

Kuntix profetax Tatitun sutipxaru parlkani, ukatsti janirak uka parlatapax phuqhaskani ukasti jumanakatakix qhanäniwa, uka parlatapax janiw Diosan arunakapäkiti, jan ukasti uka profetax jach'a jach'a tukusakiw ukanak parli, ukhamasti jumanakax jupar jan axsarapxamti.

2 Timoteo 4:22

Tatit Jesucristox jumampipunïpan, Diosasti khuyapayasiñap taqi jumanakxar churpan.

Josué 21:45

Kuntix Tatitux israelitanakar arsuwaykäna uka arunakax taqipuniw phuqhasïna.

Jueces 13:24

Ukatsti urunaka phuqhasxipansti, warmix mä yuqall wawa wawachasïna, juparusti Sansón sutimpiw uchäna. Yuqall wawax jiltänwa, Tatitusti juparux qullanañchänwa.

1 Samuel 10:7

Kunapachatix taqi ukanakax jumamp luraskani ukkhasti, kunatix amuyatamat walïki uk luraskakim, Tatituw yanapt'arakïtam.

1 Samuel 12:2

Akax jichhax jumanakan reyimaxa, jupaw apnaqapxätam. Nayasti awkïxtwa, qaqa p'iqïxaraktwa, wawanakaxasti jumanak taypinkaskiwa. Nayasti jumanakarux waynatpach apnaqawayapxsma,

1 Samuel 16:18

Ukatsti jupanakat mayniw säna: —Nayax uñjtwa, Belenankir Jesé chachan mayni yuqapaw sum toct'añ yati; ukhamarus nuwasiñatakix jan axsaririwa, kunapachatix kuns parlki ukkhaxa, wali suma amuyumpiw parli, ukhamarus wali suma uñnaqt'an waynawa, Tatitusti juparux yanapt'apuniwa —sasa.

1 Samuel 18:12

Saúl reyisti Davidarux axsaränwa, Tatitusti Davidarukiw yanapäna, Saulurusti janiw yanapkxänti.

1 Samuel 18:14

Tatituw Davidar yanapäna ukat taqi kuna luräwipas nayraqataru mistüna.

1 Samuel 18:5

Davidasti kuntix Saúl reyix lurañapatak siskäna ukanakampix wali sum phuqhäna, ukat Saúl reyix nuwasir jaqinakar sarayañapatak utt'ayäna. Ukasti Saúl reyin taqi soldadonakataki, jilïri jaqinakapatakis wali sumapunïnwa.

1 Samuel 2:21

Tatitusti Anarux aski waxt'äwipampiw phuqt'äna, ukatsti Anax usur jaqiptxänwa, ukat kimsa yuqall wawampi, pä imill wawamp wawachasïna, Samuel wawasti Tatitun nayraqatapan jiltaskakïnwa.

1 Samuel 2:26

Ukchañkamasti Samuel waynax jiltaskakïnwa, sarnaqäwipasti Tatitutakisa, jaqinakatakisa askïnwa.

1 Samuel 9:6

Uywatasti ukxarux sarakïnwa: —Aka markan mä profetaw utji, taqi jaqinakaw juparux wal yäqapxi, kuntix jupax yatiyki ukanakasti phuqhasipuniwa. Ukhamax sarañäni, inampis jupax kawkirutix sarañasäki uksa uñacht'aychistaspa —sasa.