Proverbios 21:8 - Qullan Arunaca

⁸ Jucharar jaken sarnakäwipajj k'ewinucuta jan waliwa, ucampis cheka lurir jaken luratanacapajj k'omawa.

Aymar Bibliia 1986

⁸ Jucharar jaken sarnakäwipajj k'ewinucuta jan waliwa, ucampis cheka lurir jaken luratanacapajj k'omawa.

Qullan Arunaka DC

⁸ Jan wali lurir jaqin sarnaqäwipax q'iwinukuta jan waliwa, aski jaqin luratanakapasti q'umawa.

Proverbios 21:8 Jak'a apnaqawi uñst'ayäwi

Génesis 6:12

take jakenacasti jan walëjjapjjapunïnwa. Diosasti uca take ñankha lurañanacajj aca oraker phokhantatäp uñjasinsti,

Proverbios 15:26

Tatitojj janiw uñjañ munquiti ñankha jakenacan amtäwinacaparojja, ucampis juparojj suma k'oma arunacawa cusisiyi.

Proverbios 2:15

Jupanacasti k'ewi thaquinacan sarnakapjje; cheka thaquitsti maysaruw saranucupjje.

Proverbios 21:9

Juc'amp asquiw mä c'uchuna jacañajja, suma jach'a utana ch'ajjwiri warmimp jacañat sipansa.

Proverbios 30:12

Yakhep jakenacajj amuyasipjjewa k'omäpcaspasa uqhama, ucampis janiw juchanacapatjja k'omachasipquiti.

Eclesiastés 7:29

Acacwa nayajj jicjjatta: Diosajj jakerojj asqui luräna, ucampis jakew jacañapanjja jan walt'añanaca thakasiwayi.

Eclesiastés 9:3

Aca orakena take cunatejj lurasqui ucanacatjja acawa jan walïquiti, takenirusa uca pachpawa suyt'asqui. Maya toketjja, jaken amuyupajj ñankha lurañampi phokt'atawa; lokhe cancañaw amuyupana atipji take jacañapana; ucatsti tucuyarojj jiwañaruquiw purjje.

Isaías 26:7

Asqui jakenacan sarnakäwinacapajj chekapawa; Tata, jumaraquiw jupanacan thaquipsa qhusqhachtajja.

Isaías 59:8

Janiw sumancañ thacjja uñt'apquiti, luräwinacapansti janiw cheka cancañajj utjquiti. Thaquinacapasti maysar k'ewitcamaquiwa; uca thaquinjam saririnacasti janiw samarañjja jicjjatapquiti.

Daniel (hebreo) 12:10

Cuna t'akhesïwinacatejj yatiyatäqui ucanac toksti waljaniw pasapjjañaparaqui, uca t'akhesïwitsti k'omachata, uqhamaraqui asquiru tucuyataw mistjjapjjaraquini. Ñankha jakenacasti ñankhanacapjja lurasipcaquiniwa, cunatejj pasasqui ucanacjja jan amuyt'asa, ucampisa yatiñani jakenacasti take acanacjja amuyt'apjjaraquiniwa.

Mateo 12:33

“Mä kokatejj sumächi ucajja, suma achuniwa; jan suma kokäcchi ucasti, janiw sumäquiti achupajja. Uqhamasti mä kokajj achupat uñt'atawa.

Mateo 5:8

“Cusisiñanïpjjew k'oma chuymaninacajja, jupanacaraquiw Diosarojj uñjapjjani.

Hechos 15:9

Diosajj janiw jiwasanacamp jupanacampitjja yakha yakha uñjquistuti. Jupajj jupanacan chuymanacapsa iyawsatap laycojj k'omacharaquiwa.

1 Corintios 3:3

Jumanacajj janchin munañanacaparuquiw sarnakasipcta, ucatwa jumanac taypin envidiasiñanacasa, ch'ajjwañanacasa, jaljtañanacasa utjasqui. Ucanac lurasajj alek jakenacaquïsipctawa, mayninacar uñtataraquiw cunsa lurasipctajja.

Tito 1:15

Qhitinacatejj k'oma amuyunïpqui ucanacataquejj take cunas k'omawa, ucampis jan suma amuyunïpqui ucanacataquejj janiw cunas walïquiti, jupanacan amuyunacapas, chuymanacapas k'añütap laycu.

Tito 2:14

Jupawa jiwas laycu jiwawayi jan walinacat jiwasar khespiyañataqui, k'omachañataqui, uqhamata jupancañataqui jan karjasisa asqui lurañasataqui.

Tito 3:3

Jiwasajj nayrajj uqham jan amuyt'anïpjjaraquïyätanwa, Diosar jan jaysiri, chhaktata, uqhamarac cunayman jan wali munañanacan esclavopäyätanwa. Ñankha lurañanacana, envidiasiñanacana jacascaraquïyätan uñisita, uqhamaraqui jiwascam uñisisisa.

Tito 3:5

janiw cuna asqui luratas laycuti, jan ucasti qhuyapayasiñap laycuwa khespiyistu jarekäwi toke. Kollan Ajayu toke machakat naciyaraquistu machak jacañ churasa.

1 Juan 2:29

Jumanacajj yatjjapjjtawa Tatit Jesucristojj chekapätapa, yatipjjañamaraquiwa take qhitinacatejj chekapa lurapquejja, ucanacajj Diosan wawanacapawa.

1 Juan 3:3

Take qhititejj acanac Jesucristotjja suyt'qui ucajja, jupa pachpawa k'omachasi cunjämatejj Tatit Jesucristojj k'omäqui uqhama.