Mateo 27:42 - Qullan Arunaca

⁴² “Jupajj yakhanacarojj khespiyiwa, ucampis jupa quipcarusti janiraquis khespiyasiñataqui ch'amanïquitï. Chekapuni Israelan Reyipächi ucajja, crusat sarakanpan ucatwa jiwasajj iyawsapjjañäni.

Aymar Bibliia 1986

⁴² “Jupajj yakhanacarojj khespiyiwa, ucampis jupa quipcarusti janiraquis khespiyasiñataqui ch'amanïquitï. Chekapuni Israelan Reyipächi ucajja, crusat sarakanpan ucatwa jiwasajj iyawsapjjañäni.

Qullan Arunaka DC

⁴² —Yaqhanakarux qhispiyiwa, jupa pachpasti janiw qhispiyaskiti. Jupatix Israelan Reyipächixa, cruzat saraqanpan, ukat juparux taqiniw iyawsañäni.

Mateo 27:42 Jak'a apnaqawi uñst'ayäwi

Mateo 2:2

Jisct'apjjaraquïnwa: —¿Cawquinquis nasqui uca judionacan reyipajja? Uñjapjjtwa jupan warawarapa inti jalsu tokena, ucatwa jupar yupaychiri jutapjjta —sasa.

Mateo 27:37

P'eketa patäjjarusti mä jach'a letrero uchapjjaraquïna, cunattejj uqham jiwayatäcän uca. Ucasti aqham sänwa: “Acajj Jesusawa judionacan Reyipa” sasa.

Mateo 27:40

aqham sasa: Jumajj sistawa: “Templjja pamparuw tucuyä, ucatsti quimsürut sayt'ayä, sasa. Jichhajj juma quipca khespiyasim. Chekapuni Diosan Yokapästa ucajja, crusatsa sarakaniraquim” —sasa.

Mateo 27:41

Uca quipcracwa sacerdotenacan jilïrinacapas juparojj sawcasipjjäna, ley yatichirinacamp cuna, fariseonacasa, chuymani jilïrinacasa, ucat jupanaccamajj parlasipjjäna:

Marcos 15:31

Uca quipcaraquiw jilïr sacerdotenacampi, ley yatichirinacampejj Jesusatjj larusipjjäna. Jupanaccamasti sapjjaraquïnwa: —Mayninacarusti khespiyiwa, jupapachasti janiw khespiyasiñataquejj ch'amanïquiti.

Marcos 15:32

Jichhatejj Israelan Reyip Cristorojj crusat sarakanquiri uñjsnajja, ucqhapï juparojj iyawssnajja —sasa. Jupamp chic ch'accatatäquis ucanacas uqhamaraquiw tokepjjäna.

Lucas 19:38

Sapjjaraquïnwa: —¡Bendicitäpan Tatitun sutipar jutir Reyejja! ¡Alajjpachanjja sumancañäpan, uqhamarac Diosarojj jach'achatäpan! —sasa.

Lucas 23:35

Ucanjja jakejj uñch'uquisipcänwa, uqhamaraquiw autoridadanacas jupatjja larusipjjäna: —Yakhanacarojj khespiyiwa; jichhajj jupa pachpa khespiyaspan, chekpachatï Diosan ajllit Cristöchi ucajja —sasa.

Lucas 23:37

Ucatsti sapjjänwa: —Jumatejj judionacan Reyipästa ucajja, jumapach khespiyasim —sasa.

Juan 1:49

Natanaelajj ucjjarojj sänwa: —Yatichiri, jumajj Diosan Yokapätawa, Israel marcan Reyipa —sasa.

Juan 12:13

Ucatsti layminac qhuchurasin mistupjjäna Jesusar catokañataqui; aqham sasaw jach'at art'apjjäna: —¡Jach'achatäpan Diosaru! ¡Bendecitäpan Tatitun sutiparu jutirejja! ¡Bendecitäpan Israelan Reyipajja! —sasa.

Juan 12:47

Ucampis qhititejj arunacajj ist'ejja, ucatsti janirac ucarjama lurqui ucarojja janiw juchañchcti. Nayajj janiw acapacharu juchañchiri jutcti, jan ucasti khespiyiriw jutta.

Juan 9:24

Ucatsti judionacajj wasitampiw juyqhücän uca jakerojj jawsapjje, ucatsti sapjjaraquiwa: —Diosan nayrakatapan chek arsum, nanacajj yatipjjtwa uca jakejj juchararätapa —sasa.

Hechos 4:14

C'umaraptayatäcäna uca jakesti jupanac taypin sayt'atäscaraquïnwa. Ucatwa apostolonac contrajj jan cun sapcänti.