Jueces 7:22 - Qullan Arunaca

²² Ucampis quimsa pataca israelitanacasti pututusipcaquïnwa. Diosasti madianitanacarojj jupanacpurwa nuwasiyäna. Ucatsti tutuctjjapjjänwa Bet-sita sat, Zerera thaquicama, uqhamarac Abel-mehola sat korpacama, ucasti Tabat sat jac'awa.

Aymar Bibliia 1986

²² Ucampis quimsa pataca israelitanacasti pututusipcaquïnwa. Diosasti madianitanacarojj jupanacpurwa nuwasiyäna. Ucatsti tutuctjjapjjänwa Bet-sita sat, Zerera thaquicama, uqhamarac Abel-mehola sat korpacama, ucasti Tabat sat jac'awa.

Qullan Arunaka DC

²² ukchañkamasti uka kimsa patak israelitanakax pututunak pututt'asipkakïnwa, Tatitusti madianitanakarux jupanakpur nuwasiyäna, ukatsti jupanakax Bet-sitá chiqakamaw jaltxapxäna, Sererá thakhina, Abel-meholá qurpapkama, Tabat jak'ana.

Jueces 7:22 Jak'a apnaqawi uñst'ayäwi

1 Reyes 19:16

Ucatsti utt'ayaniraquim Israelan reyipataquejj Nimsi chachan Jehú sat allchhiparu; ucatjja Safat chachan Eliseo yokaparojja profetata utt'ayanim juma lanti, jupasti Abel-mehola uca marcanquiriwa.

1 Reyes 4:12

Ahilud ucan Baana yokapasti, Taanac, Meguido ucanacatänwa, uqhamarac take Bet-seán ucataraqui, ucasti Saretán ucamp chicänwa Jezreel ucata juc'amp aynachana, Bet-seán ucata Abel-mehola ucacama, Jocmeam ucatsa juc'amp qhurina;

2 Crónicas 20:23

Moabitanacampi amonitanacampejja nuwapjjänwa Seir kollut jutirinacaru, ucatsti takwa tucjapjjäna, ucatjja jupanacar tucjasinjja jupanaccamaraquiwa tucjasipjjaraquïna.

Salmos 83:9

Madián jakenacarjam jupanacarojj uñjam, Sísara jakenacarjam luram, Cisón jawira jac'anquir Jabín jakenacarjama:

Isaías 19:2

Egiptonquir jakenacarojj payaruw jaljtayä, jupanac pura nuwasiyä, amigojj amigop pura, marcasti marca pura, reinojj reino puraraqui.

Isaías 9:3

Tatitu, mä jach'a cusiscañwa apantajja, cusisiñasti walipuniwa. Jakenacsa waljaptayaractawa, takeniw juma nayrakatanjja cusisipjje, yapu apthapiña urunacanjama, cunjämatejj jakenacajj cusisipqui kamir cancaña jaljasisajj uqhama.

Isaías 9:4

Jumaw tucjtajja cunatejj marcamar t'akhesiycän uca esclavo cancañjja, cawquïri t'akhesiñatejj llaquisiycän ucjja, munañani jakenacampi apnakatäpjjaraquïnwa. Cunapachatejj Madián oraker tucjctajj uqhamänwa.

Ezequiel 38:21

Nayaw Gog sisqui jupjjarojj cunayman ajjsarcañanaca apayanëjja, ucanacasti jupanacarojj wali ajjsarayaraquini. Cunayman usunacampi, acatjamat jiwarañanacampiw jupanacarojj t'akhesiyaraquëjja. Jupjjarusti uqhamaraqui ejercitopjjarusa, uca quipcaraqui, cawquïri yakha marcanacatejj jupampi chica sarapqui ucanacjjarusti jach'a jallunaca, chhijchhinacampi, ninampi asufrempi puriyaniraquëjja, jakenacapasti jupanacpachaquiw espadanacapampi nuwarasjjapjjani. Naya Tatituw ucjja arsta.

Habacuc 3:14

Jilïriparus jiwayaractawa quipca flechanacapampi, cunapachatejj caballjjat jalirinacapajj tutuquipjje mä jach'a thayjama, ch'amampi tucjayañataqui jan nuwasirinacaru, ucatsti jamasan tucjañataqui.

Hageo 2:22

Acapacha reinonacarus tucjaraquïwa, reyinacan konuñanacapsa t'unjaraquïwa; guerrar sarir carronacapsa willthapiraquïwa, uca carron saririnacarusa tucjaraquïwa, caballonacasa, uqhamarac uca caballonacan lat'jjatat sarir jakenacasa jiwarapjjaniwa. Sapakat mayniw jilapan espadapampi chhokhontat jiwani.

Zacarías 14:13

Uca Tatitun urupanjja sustjasiñaw phokhantanejja. Sapa mayniraquiw jac'apancqui ucarojj amparat catuntanejja, amparanacapsti aptapjjaraquiniwa maynit maynicama nuwasiñataqui.

2 Corintios 4:7

Diosan aca jach'a churäwipasti janchinacasanjja mä ñek'e phuqhun imatjamawa, uqhamata jach'a ch'amajj Diosat jutatapa yatisiñapataqui, jan jiwasatjja.

Josué 3:16

cawquïri umanacatï alaya toket jutapjjän ucanacajj pachparuw sayt'apjjäna mä kollur uñtata, Adam sat marcatsa juc'ampi jayaru cawquïri marcatï Saretán marca sat jac'anccäna uca chekaru. Aynachar sarir umanacasti sarasipcaquïnwa Mar Muerto sat kotar puriñcama, uqhamaw uca jawirajj payaru t'akjtäna, ucatjja israelit jakenacajj maqhatapjjänwa Jericó marca uñcatasiru.

Josué 6:16

Cunapachatejj sacerdotenacajj pututunacap phust'apjjäna pakallko cutina ucqhajj, Josué chachasti takpacha Israel marcaruw säna: “¡Jichhasti jach'at art'apjjam! Diosasti Jericó marcjja jumanacaruw catuyapjjtam.

Josué 6:20

Uqhamaw takpach Israel marcajj jach'at art'apjjäna, sacerdotenacas pututunacap phust'apjjaraquïna, ucatsti mayac Jericó marcan perkanacapajj tincjjäna. Ucatsti take Israel jakenacaw marcarojj catuntañatac chhuqhuntapjjäna.

Josué 6:4

Pakallko sacerdotenacaw Diosan arcap nayräjjap sarapjjani sapa mayni mä pututu apt'ata, pakallko uröjjani ucqhajj, pakallko cutiw marcaru muytapjjäta, ucatsti sacerdotenacajj pututu phust'apjjani.

1 Samuel 18:19

Ucampisa cunürutejj Saúl reyejj Davidaru Merab phuchapa warmipäñapataqui churañ urojj purinjjäna ucqhajja, Davidar churcamayajja, Meholanquiri Adriel jakeruquiw churjjäna.