Jeremías 7:13 - Qullan Arunaca

¹³ Nayasti mayampi mayampwa jumanacarojj ñankha luratanacamatjja ewjjapjjsma, ucampisa jumanacajj janiw nayarojj ist'apquistati, ni jaysapcaraquistasa. Naya Tatituw acjja arsta.

Aymar Bibliia 1986

¹³ Nayasti mayampi mayampwa jumanacarojj ñankha luratanacamatjja ewjjapjjsma, ucampisa jumanacajj janiw nayarojj ist'apquistati, ni jaysapcaraquistasa. Naya Tatituw acjja arsta.

Qullan Arunaka DC

¹³ Nayasti mayamp mayampi jumanakar ñanqha luratanakamat iwxapxsma, ukampis jumanakax janiw nayar ist'apkistati, janirakiw jaysapkistasa. Naya, Tatituw uk arsta.

Jeremías 7:13 Jak'a apnaqawi uñst'ayäwi

Proverbios 1:24

Nayasti jumanacarojj jawsapjjsmawa, ucampis jumanacajj janiw ist'añ munapquistati.

Isaías 50:2

¿Cunatsa nayajj jutcta ucapachajj jan qhitirus jicjjatctjja? ¿Cunatsa jawsatajjarojj jan qhitis jaysquitojja? ¿Janit jumanacasti nayan khespiyañajjsti iyawsapcta? ¿Janit amuyctasti nayajj ch'amanïtajja jumanacar khespiyañataquejja? Nayataquejj janiw cunäquis mä aru arsuñajja, uqhamat kotar wañt'ayañataqui, uqhamaraqui jawiranacasa ch'usa wasarar tucupjjañapataqui, uqhamat chawllanacajj umatjam jiwarapjjañapataqui, umatjamasa ñusantapjjañapataquiraqui.

Isaías 65:12

Jichhajj jumanacarojj jan walt'añaquiw suyt'apjjtam; espadampi jiwarayatäpjjätawa. Nayasti jumanacarojj jawsapjjsmawa, jumanacajj janiw ist'apquistati uca laycu; parljjayapjjsmawa, janiraquiw ist'apquistasa; cuntejj nayajj jan munctjja ucwa lurapjjaractajja, cuntejj nayarojj jan munasquitu ucwa ajllipjjaractajja.”

Isaías 66:4

Nayaraquiw jupanacatac t'akhesiña ajllï, cuntejj jupanacajj wal ajjsarapqui ucanac apayaniraquëjja. Cunapachatejj jawscäyäta ucapachajj janiw ist'apquitänti uca laycu, parlascäyätwa ucampis janiraquiw ist'apquitänti; cuntejj nayajj jan munctjja uca lurapjjaraquejja, cuntejj nayarojj colerayquitu uca lurañwa ajllisipjjaraquïnjja.”

Jeremías 11:7

Cunapachatejj awquinacaparu Egiptot apsuncäyäta ucapachasti saraquïyätwa, nayaruc jaysapjjeta sasa, ucatpacha jichhacamasti ucjja sascaquipuntwa.

Jeremías 11:8

Ucampisa janiw nayarojj jaysapquituti, ni ist'apcaraquitusa, jan ucasti chuymanacapan jan wali amtatanacaparuquiw arcjjapjje. Cuntejj nayajj jupanacaru siscäyät uca arunacsti janiw phokhañ munapcänti, ucatpï jupanacjjarojja cuntejj arust'äwin yatiycäyäta uca mutuyäwi apayantjja.’ ”

Jeremías 13:10

Aca ñankha marcajj nayan arunacajjarojj janiw ist'añ munquiti, ucatsti jan cuna amuyasisaw chuymapan jan wali amtatanacaparojj arqui. Yakha diosanacan khepapa arcjjapjje, sirviñataqui, uqhamaraqui yupaychañataqui. Uca jan cunatac sirviri cinturonjamäpjjewa.

Jeremías 13:11

Cunjämatejj mä cinturonajj cinturaru muyuntayasitajja, uqhamaraquiw Israel marcasa, Judá marcasa nayan jac'ajjanjja, nayan marcajjäñapataqui, sutejja yatiyapjjañapataqui, jach'a cancañajja, jach'ar aptatäña. Ucampisa janiw ist'apquituti. Naya Tatituw ucjja arsta.

Jeremías 25:3

“Cunapachatejj Amón jaken yokapa Josiasajj Judá orake tunca quimsani mara apnakascäna ucat jichhacamajja, niya pä tunca quimsani maranacaw pasjje, Tatitusti nayaruw parlitäna, nayasti jumanacarojj mayampi mayampwa parlapjjaracsma, ucampisa jumanacajj janiw nayarojj ist'apquistati.

Jeremías 26:5

uqhamaraqui nayar sirviri profetanacan arunacaparusa janiraqui ist'apcaniti, uca profetanacsti nayajj mayampi, mayampwa qhitanta, jumanacasti jupanacarojj janiw ist'apctati,

Jeremías 29:19

Jumanacajj janiw nayar sirviri profetanacajj cuna arunactejj ewjjapctam uca arunacarojj ist'apctati uca laycu, nayasti mayampi mayampwa jumanacarojj uca profetanacjja qhitanipjjaracsma, ucampis jumanacajj janiw jupanacarojj ist'apctati. Naya Tatituw ucjja arsta.

Jeremías 32:33

Nayataquejj maysaruw uñtapjjänjja, janiw uñcatañsa munapcaraquitänti. Nayasti jupanacarojj yatichascapuniraquïyätwa, ucampis janiw nayan yatichäwinacajj-jja ist'añ munapcänti.

Jeremías 35:14

Recab jaken Jonadab sat wawapan wawanacapajj cuntejj awquipajj jaytawaycatayna uca arunacjja phokhapjjewa, jupanacarusti ‘Janipuniw vino umapjjätati’ satänwa, ucatsti jichhürcama janiw umapquiti, nayra awquipan arunacaparu phokhasa, uqhamaraqui uca arunaca ist'apjjatap laycu. Nayasti uca quipcaraquiw jumanacarojj ewjjanaca mayampi, mayampi churapjjsma ucampis jumanacajj janiw nayarojj ist'apquistati.

Jeremías 35:15

Nayar sirviri profetanacajjarusti mayampi mayampwa qhitanipjjsma jumanacaru aqham sañapataqui: Uca jan wali sarnakäwinacamsa uqhamaraqui jan wali luräwinacamsa apanucupjjam. Janiraqui yakha diosanacan khepapsa sarjjapjjamti ni ucanacarusa yupaychapjjaraquimti, uqhamatwa cuna oraktejj nayajj jumanacarusa uqhamaraqui nayra awquinacamarus churcäyät ucan jacasipjjätajja sasa. Ucampisa janiw jumanacajj nayan arunacajjarojj jaysapcäyätati ni ist'apcaraquïyätasa.

Jeremías 35:17

Ucatwa, naya Israel Diosapa take ch'amani Diosajj sistjja: Judá oraken uqhamaraqui Jerusalén marcan utjasiri jakenacjjarojja cunayman jan walinacwa apayanëjja, cuntejj jupanacaru yatiycta take ucanaca. Nayasti jumanacarojj parljjayapjjsmawa, ucampis jumanacajj janiw nayarojj ist'apquistati, jumanacarojj jawsapjjsmawa, ucampis jumanacajj janiw jaysapquistati.’ ”

Jeremías 44:23

Jichhasti cuna jan walt'añantejj jicjjatasipcta ucasti uqham jumanacan yakha diosanacaru incienso loktasipjjatamatwa jutapjjtamjja, uqhamatracwa jumanacajj Tatitutaqui jucha lurapjjtajja, janiraquiw yatichäwinacapsa, leyinacapsa, camachinacapsa ist'apctati ni phokhapcaractasa.”

Jeremías 44:4

Nayasti mayampi mayampwa nayar sirviri profetanacjja qhitanipjjäyäsma jumanacaru jan uca ajjtaña luräwinaca lurapjjañanacamata jarct'añapataqui, nayasti uca luräwinacampejj ajjtastwa.

Jeremías 5:21

‘Aca arunac ist'am, jan amuyt'an marca, nayranïsquiwa, ucampis janiw uñjquiti, jinchunïscaraqui, ucampis janiw ist'quiti.

Jeremías 6:10

Nayasti saractwa: “¿Qhitirac ist'itani, nayan parlatajjarusti, uqhamaraqui aca yatiyäwi churatajjarusa? Tata, jinchunacapajj lluphantatawa, janiw ist'apcaraquiniti; arunacamatsti larusipjjaraquiwa, Arunacamsti janiw munapcaraquiti.

Jeremías 7:25

Cunapachatejj nayra awquinacapajj Egiptot mistunipcäna ucat jichhacamasti, nayajj jumanacarojj maynit mayniruwa profetanacjja qhitanipjjsma.

Oseas 11:2

Ucampis cunapachatejj nayajj juc'ampi jupar jawsayät ucqhajja, juc'ampiraquiw jupajj nayatjja jayarst'awayi. Marcajjasti c'ari diosanacaruquiw sacrificionac loktasïnjja, yakha diosanacaruquiraquiw incienso nact'ayasïnjja.

Oseas 11:7

Uqhampachas marcajjajj nayat jayancañjja munascaquiwa; arnakasisipcaraquiwa, ucampis janiw qhitis jupanacan arnakasitapjja ist'quiti.

Oseas 9:17

Aca marcajj janiw Diosarojj ist'añ munquiti; ucatracwa Diosajjajj jupanacarojj apanucuni, ucatsti marcat marca muyupjjaraquini.

Zacarías 7:13

saraquiwa: “Cunjämtï jupanacajj jan ist'aña munapquitu cunapachatï nayajj jawscta ucqhajja, uqhamaracwa nayajj jan ist'cäti cunapachatejj jupanacajj art'asipjjetani ucqhajja.

Mateo 23:37

“¡Jerusalén, Jerusalén, jumawa profetanacarojj jiwaytajja, Diosan qhitanitanacaparusti kalampiraquiw c'upjaractajja! ¡Nayasti kawkha cutiraquiw jumanacarojj tantacht'añ munapjjäyäsmajja cunjämtï mä wallpajj jisc'a chhiwchhinacaparojj jawsthapqui uqhama, ucampis janiw munapctati!