Psalms 88 - Die Bybel 2020-vertaling

¹ 'n Lied. 'n Psalm. Van die Koragiete. Vir die •musiekleier. Op Magalat. Om te sing. 'n Maskiel. Van Heman, die Esragiet.

² Here, God wat my verlos, bedags roep ek om hulp, snags bly my hulpgeroep voor U.

³ Laat my gebed U bereik, draai u oor na my klaagroep;

⁴ want ek het genoeg gehad van rampe. My lewe is by die •doderyk;

⁵ ek word gereken by dié wat afdaal in die put. Ek het geword soos 'n sterk man sonder krag,

⁶ vrygelaat onder die dooies, soos gesneuweldes wat in 'n graf lê, aan wie U nie meer dink nie; hulle wat afgesny is van u hand.

⁷ U het my in die diepste put geplaas, in donker plekke, in die dieptes.

⁸ U woede rus swaar op my; met al u golwe onderdruk U my. •Sela

⁹ U het my bekendes van my verwyder, U het my iets afstootliks gemaak vir hulle. Ek is opgesluit en kan nie uitkom nie;

¹⁰ my oë verdof van ellende. Ek roep na U, Here, elke dag, ek strek my handpalms na U uit.

¹¹ Kan U aan dooies 'n wonder doen? Of skimme, kan hulle opstaan, kan hulle U prys? Sela

¹² Word daar in die graf gepraat oor u troue liefde, oor u betroubaarheid in die onderwêreld?

¹³ Is u wonders bekend in die duisternis, en u geregtigheid in die land van vergetelheid?

¹⁴ En ek, na U roep ek om hulp, Here, elke oggend kom my gebed voor U.

¹⁵ Waarom, Here, verstoot U my, verberg U u gesig vir my?

¹⁶ Ek is magteloos, in doodsgevaar van my jeug af; verslae dra ek u verskrikkinge.

¹⁷ Oor my het die gloed van u toorn gebreek, u verskrikkinge vernietig my.

¹⁸ Die hele dag omring dit my soos water, dit omsluit my heeltemal.

¹⁹ U het geliefdes en vriende van my verwyder; my vertroueling is die duisternis.