Psalms 36 - Die Bybel 2020-vertaling

¹ Vir die •musiekleier. Van die dienskneg van die Here. Van Dawid.

² 'n Uitspraak oor die oortreding van 'n goddelose leef in my gedagtes : “Daar is geen vrees vir God nie.

³ Want in sy eie oë is hy te seker van homself om sy sondeskuld te ontdek, om dit te haat.

⁴ Die woorde uit sy mond is onreg en bedrog; hy laat na om wys op te tree, om goed te doen.

⁵ Onreg bedink hy op sy bed; hy gaan staan op 'n pad wat nie goed is nie; kwaad verwerp hy nie.”

⁶ Here, tot aan die hemel reik u troue liefde, u getrouheid tot aan die wolke.

⁷ U geregtigheid is soos massiewe berge, u regspraak soos die groot •oerwater. U verlos mens en dier, Here.

⁸ Hoe kosbaar is u troue liefde, o God! Mense skuil in die skadu van u vlerke.

⁹ Hulle drink hulle versadig aan die oorvloed van u huis, uit die stroom van u genietinge laat U hulle drink.

¹⁰ Ja, by U is die fontein van lewe, * in u lig sien ons lig.

¹¹ Reik met u troue liefde uit na hulle wat U ken, met u •geregtigheid na die opregtes van hart.

¹² Laat 'n verwaande voet my nie inhaal nie, en die hand van goddeloses my nie laat rondswerf nie.

¹³ Daar val hulle wat onreg pleeg; hulle word platgedruk en kan nie weer opstaan nie.