Psalms 119 - Die Bybel 2020-vertaling

א ALEF

א ALEF

¹ Gelukkig is mense wie se lewenspad onberispelik is en wat die wet van die Here volg!

² Gelukkig is hulle wat hou by sy bepalings, wat Hom met hulle hele hart soek;

³ wat ook nie onreg pleeg nie, maar net sy paaie volg!

⁴ U het self u opdragte gegee, sodat mense dit noukeurig sal nakom.

⁵ Ag, was my lewenspaaie maar standvastig, sodat ek u voorskrifte kon nakom.

⁶ Dan sal ek nie beskaamd staan, terwyl ek op al u bevele let nie.

⁷ Ek prys U met 'n opregte hart terwyl ek u regverdige beslissings bestudeer.

⁸ U voorskrifte sal ek nakom; moet my tog nooit in die steek laat nie.

ב BET

ב BET

⁹ Hoe sal 'n jongmens sy lewenspad suiwer hou? Deur te hou by u woord.

¹⁰ Met my hele hart soek ek U; laat my tog nie afdwaal van u bevele nie.

¹¹ In my hart koester ek u woord, sodat ek nie teen U sondig nie.

¹² U moet geprys word, Here! Leer my u voorskrifte!

¹³ Met my lippe vertel ek van al die beslissings van u mond.

¹⁴ Oor die pad van u bepalings is ek verheug soos oor enige rykdom.

¹⁵ Oor u opdragte wil ek nadink; ek wil op u paaie let.

¹⁶ In u voorskrifte vind ek vreugde; ek sal u woord nie vergeet nie.

ג GIMEL

ג GIMEL

¹⁷ Wees goed vir u dienskneg, dan kan ek lewe en u woord nakom.

¹⁸ Maak oop my oë, sodat ek die wonders uit u wet kan raaksien.

¹⁹ Ek is 'n •vreemdeling op aarde; moet u bevele nie vir my verborge hou nie.

²⁰ My lewe kwyn die hele tyd weg van verlange na u beslissings.

²¹ U bestraf vermeteles, die vervloektes, hulle wat van u bevele afdwaal.

²² Verwyder bespotting en minagting van my, want by u bepalings hou ek.

²³ Selfs al sit leiers met mekaar en praat oor my – u dienskneg sal oor u voorskrifte bly nadink.

²⁴ Nog steeds is u bepalings my grootste vreugde; hulle is my raadgewers.

ד DALET

ד DALET

²⁵ My lewe kleef aan die stof; maak my weer lewend volgens u woord.

²⁶ Van my lewenspaaie het ek vertel, en U het my geantwoord; leer my u voorskrifte.

²⁷ Die pad van u opdragte – laat my dit verstaan, sodat ek oor u wonders kan nadink.

²⁸ My lewe vloei weg van verdriet; rig my op volgens u woord.

²⁹ Die pad van bedrog – neem dit van my weg; en u wet – gee dit genadiglik vir my.

³⁰ Die pad van eerlikheid het ek gekies; u beslissings hou ek voor oë.

³¹ Ek hou aan u bepalings vas; Here, laat my nie beskaamd staan nie.

³² Die pad van u bevele volg ek geesdriftig, want U verruim my insig.

ה HE

ה HE

³³ Here, onderrig my in die pad van u voorskrifte, sodat ek enduit daarby kan hou.

³⁴ Gee my insig, sodat ek by u wet kan hou, dit met my hele hart kan nakom.

³⁵ Begelei my op die pad van u bevele, want daarin vind ek vreugde.

³⁶ Laat my hart na u bepalings neig, en nie na winsbejag nie.

³⁷ Wend my oë daarvan af om na nuttelose dinge te staar; hou my lewend op u paaie.

³⁸ Doen u woord gestand aan u dienskneg – u woord wat ontsag wek vir U.

³⁹ Neem die bespotting wat ek vrees van my weg, want u beslissings is goed.

⁴⁰ Kyk, ek verlang na u opdragte; hou my lewend deur u •geregtigheid.

ו WAW

ו WAW

⁴¹ Laat u troue liefde my deel word, Here, u verlossing volgens u woord,

⁴² sodat ek my spotter kan antwoord; want ek vertrou op u woord.

⁴³ Moet tog nie u betroubare woord geheel en al uit my mond wegneem nie, want ek vestig my hoop op u beslissings.

⁴⁴ Ek wil u wet voortdurend nakom, vir altyd en ewig.

⁴⁵ Ek wil in hierdie wye ruimte voortbeweeg, want u opdragte ondersoek ek.

⁴⁶ Ek sal oor u bepalings voor konings praat sonder om my te skaam.

⁴⁷ Ek vind vreugde in u bevele wat ek liefhet;

⁴⁸ ek reik uit na u opdragte wat ek liefhet; ek dink na oor u voorskrifte.

ז ZAJIN

ז ZAJIN

⁴⁹ Dink aan u woord aan u dienskneg waarmee U aan my hoop gegee het.

⁵⁰ Dit is my vertroosting in my ellende, dat u belofte my lewend hou.

⁵¹ Vermeteles het my tot die uiterste toe gespot, maar van u wet het ek nie weggedraai nie.

⁵² Ek het u beslissings onthou, van lank gelede af, Here, en ek was getroos.

⁵³ Woede het my beetgepak oor goddeloses – hulle wat u wet verlaat.

⁵⁴ Maar u voorskrifte was vir my liedere in 'n plek waar ek 'n vreemdeling was.

⁵⁵ Ek het u Naam in die nag onthou, Here, en ek het u wet nagekom.

⁵⁶ Dit het deel geword van my – dat ek by u opdragte hou.

ח GET

ח GET

⁵⁷ U, Here, is my deel, ek het onderneem om u woorde na te kom.

⁵⁸ Ek het met my hele hart u guns gesoek: Wees my genadig volgens u belofte.

⁵⁹ Ek het my paaie bedink en my voete teruggebring na u bepalings.

⁶⁰ Ek het my gehaas en nie getalm om u bevele na te kom nie.

⁶¹ Die toue van goddeloses het my omstrengel, maar u wet het ek nie vergeet nie.

⁶² In die middel van die nag staan ek op om U te prys oor u regverdige beslissings.

⁶³ Ek is 'n vriend van almal wat vir U ontsag het, en u opdragte nakom.

⁶⁴ Here, u troue liefde vul die aarde; leer my u voorskrifte.

ט TET

ט TET

⁶⁵ U het goed gedoen aan u dienskneg, Here, volgens u woord.

⁶⁶ Leer my goeie oordeel en kennis, want ek vertrou op u bevele.

⁶⁷ Voordat ek swaar beproef is, was ek aan die dwaal, maar nou kom ek u woord na.

⁶⁸ U is goed en doen goed; leer my u voorskrifte.

⁶⁹ Vermeteles het my met leuens beswadder; maar ek, met my hele hart hou ek by u opdragte.

⁷⁰ Hulle harte is so gevoelloos soos vet, maar ek vind vreugde in u wet.

⁷¹ Dit is goed vir my dat ek verneder was, sodat ek u voorskrifte kon leer.

⁷² Die onderrig uit u mond is vir my beter as duisende stukke goud en silwer.

י JOD

י JOD

⁷³ U hande het my gemaak, my gevestig; maak my verstandig, ek wil u bevele leer.

⁷⁴ Hulle wat vir U ontsag het, sien my en is bly, want op u woord wag ek.

⁷⁵ Ek weet, Here, dat u beslissings regverdig is, en dat U my in getrouheid verneder het.

⁷⁶ Laat u troue liefde tog vir my tot troos wees volgens u woord aan u dienskneg.

⁷⁷ Laat u ontferming my deel word, sodat ek kan lewe; want u wet is my vreugde.

⁷⁸ Laat vermeteles beskaamd staan, want sonder rede veronreg hulle my; maar ek sal bly nadink oor u opdragte.

⁷⁹ Laat hulle wat vir U ontsag het, na my terugkeer, ja, hulle wat u bepalings ken.

⁸⁰ Laat my hart onberispelik aan u voorskrifte hou, sodat ek nie beskaamd staan nie.

כ KAF

כ KAF

⁸¹ My •siel smag na u verlossing; op u woord wag ek.

⁸² My oë smag na u belofte en vra: “Wanneer sal U my troos?”

⁸³ Want ek het geword soos 'n stuk vel vol rook, maar u voorskrifte het ek nie vergeet nie.

⁸⁴ Hoeveel dae is daar nog vir u dienskneg? Wanneer gaan u die oordeel voltrek oor my vervolgers?

⁸⁵ Vermeteles het vir my vangkuile gegrawe, hulle wat nie volgens u wet optree nie.

⁸⁶ Al u bevele is betroubaar, maar hulle vervolg my sonder rede. Help my!

⁸⁷ Byna het hulle my vernietig hier op aarde, maar ek, ek het u opdragte nie verontagsaam nie.

⁸⁸ Maak my lewend in ooreenstemming met u troue liefde, sodat ek die bepalings uit u mond kan nakom.

ל LAMED

ל LAMED

⁸⁹ Vir ewig, Here, staan u woord vas in die hemel.

⁹⁰ Van geslag tot geslag duur u trou; U het die aarde gevestig en dit hou stand.

⁹¹ Volgens u beslissings hou dit vandag nog stand, want alles is u diensknegte.

⁹² As u wet nie my vreugde was nie, sou ek in my ellende vergaan het.

⁹³ Tot in ewigheid sal ek u opdragte nie vergeet nie, want daardeur het U my lewend gemaak.

⁹⁴ Aan U behoort ek; verlos my, want na u opdragte streef ek.

⁹⁵ Goddeloses wag my in om my te vernietig; op u bepalings slaan ek ag.

⁹⁶ Ek het gesien aan alle volmaaktheid kom daar 'n einde, maar u gebod is besonder ruim.

מ MEM

מ MEM

⁹⁷ Hoe lief het ek u wet – die hele dag dink ek daaroor na.

⁹⁸ U gebod maak my wyser as my vyande, want dit is altyd daar vir my.

⁹⁹ Ek is verstandiger as al my leermeesters, want u bepalings is vir my stof tot nadenke.

¹⁰⁰ Ek het meer insig as oumense, want by u opdragte hou ek.

¹⁰¹ Van elke slegte pad het ek my voete weerhou sodat ek u woord kon onderhou.

¹⁰² Van u beslissings het ek nie afgewyk nie, want dit is U wat my onderrig.

¹⁰³ Hoe strelend is u woord vir my verhemelte, meer as heuning vir my mond.

¹⁰⁴ Uit u opdragte kry ek insig; daarom haat ek elke bedrieglike pad.

נ NUN

נ NUN

¹⁰⁵ U woord is 'n lamp vir my voet en 'n lig vir my lewenspad.

¹⁰⁶ Ek het 'n eed afgelê – en daarby gehou – om u regverdige beslissings na te kom.

¹⁰⁷ Ek is baie terneergedruk; Here, maak my lewend volgens u woord!

¹⁰⁸ Laat die vrywillige offers van my mond tog vir U aanvaarbaar wees, Here, en leer my u beslissings.

¹⁰⁹ My lewe is voortdurend in my hande; maar u wet vergeet ek nie.

¹¹⁰ Goddeloses het vir my 'n net gespan, maar van u opdragte het ek nie afgewyk nie.

¹¹¹ Ek het u bepalings as blywende erfporsie ontvang; ja, dit is die vreugde van my hart.

¹¹² Ek rig my hart daarop om u voorskrifte uit te voer – vir altyd, tot die einde toe.

ס SAMEK

ס SAMEK

¹¹³ Dubbelhartige mense haat ek, maar u wet het ek lief.

¹¹⁴ My skuilplek en my skild is U; op u woord vestig ek my hoop.

¹¹⁵ Gaan weg van my, julle kwaaddoeners, sodat ek by die gebooie van my God kan hou.

¹¹⁶ Ondersteun my, volgens u woord, sodat ek kan lewe; laat my nie beskaamd staan oor my hoop nie.

¹¹⁷ Onderskraag my, sodat ek verlos kan word; ek wil voortdurend aan u voorskrifte aandag gee.

¹¹⁸ U verwerp almal wat dwaal, weg van u voorskrifte af; want hulle bedrog is misleidend.

¹¹⁹ Soos metaalskuim verwyder U al die goddeloses van die aarde; daarom het ek u bepalings lief.

¹²⁰ My lyf bewe omdat U vrees inboesem; ja, vir u beslissings is ek vol ontsag.

ע AJIN

ע AJIN

¹²¹ Ek doen wat billik en reg is; moet my nie aan my verdrukkers oorlaat nie.

¹²² Waarborg die goeie vir u dienskneg; vermeteles moet my nie verdruk nie.

¹²³ My oë smag na u verlossing, na u belofte van •geregtigheid.

¹²⁴ Handel met u dienskneg volgens u troue liefde, en leer my u voorskrifte.

¹²⁵ Ek is u dienskneg; gee aan my insig sodat ek u bepalings kan ken.

¹²⁶ Dit is tyd vir die Here om op te tree – hulle maak u wet kragteloos.

¹²⁷ Daarom het ek u bevele lief, ja, meer as goud, as suiwer goud.

¹²⁸ Daarom volg ek alle opdragte oor alles; elke pad van bedrog haat ek.

פ PE

פ PE

¹²⁹ U bepalings is wonderlik; daarom hou ek daarby.

¹³⁰ As u woorde oopgaan, gee dit lig; dit gee insig aan onkundiges.

¹³¹ Met 'n oop mond hyg ek, want ek hunker na u gebooie.

¹³² Draai na my en wees my genadig, soos U gewoonlik maak met hulle wat u Naam liefhet.

¹³³ Maak my treë ferm met u woord en laat geen onreg oor my heers nie.

¹³⁴ Bevry my van onderdrukking deur mense, sodat ek u opdragte kan nakom.

¹³⁵ Laat die lig van u aangesig oor u dienskneg skyn, en leer my u voorskrifte.

¹³⁶ Strome water vloei uit my oë, omdat mense nie u wet nakom nie.

צ TSADE

צ TSADE

¹³⁷ Regverdig is U, Here, en u beslissings is reg.

¹³⁸ U het in •geregtigheid u bepalings uitgevaardig, en in goeie trou.

¹³⁹ My ywer verteer my omdat my teenstanders u woorde vergeet.

¹⁴⁰ U woord is volkome gelouter en u dienskneg het dit lief.

¹⁴¹ Ek is klein en word geminag, maar u opdragte vergeet ek nie.

¹⁴² U geregtigheid is regverdig vir ewig en u wet is betroubaar.

¹⁴³ Benoudheid en angs het my oorval, maar u gebooie is my vreugde.

¹⁴⁴ U bepalings is regverdig vir ewig; gee my insig, sodat ek kan lewe.

ק KOF

ק KOF

¹⁴⁵ Ek roep met my hele hart: “Antwoord my, Here, u voorskrifte wil ek onderhou!”

¹⁴⁶ Ek roep na U: “Verlos my sodat ek u bepalings kan nakom!”

¹⁴⁷ Voor die oggendskemer roep ek al om hulp; op u woorde wag ek.

¹⁴⁸ Met oop oë gaan ek elke nagwaak in, sodat ek oor u woord kan nadink.

¹⁴⁹ Luister tog in u troue liefde na my stem, Here, hou my lewend volgens u beslissing.

¹⁵⁰ Mense wat slinkse planne najaag, kom nader; hulle bly ver van u wet.

¹⁵¹ Maar U, Here, is naby, en al u gebooie is betroubaar.

¹⁵² Uit u bepalings weet ek lank reeds dat U dit vir ewig gevestig het.

ר RESJ

ר RESJ

¹⁵³ Sien tog my ellende raak en red my, want u wet vergeet ek nie.

¹⁵⁴ Behartig my regsaak en verlos my; hou my lewend op grond van u belofte.

¹⁵⁵ Verlossing bly ver van goddeloses, want hulle streef nie u voorskrifte na nie.

¹⁵⁶ U ontferming is groot, Here; hou my lewend volgens u beslissings.

¹⁵⁷ My agtervolgers en teenstanders is baie, maar van u bepalings wyk ek nie af nie.

¹⁵⁸ Ek het ontroues gesien en dit het my met weersin vervul dat hulle u woord nie onderhou nie.

¹⁵⁹ Sien tog raak dat ek u opdragte liefhet, Here, maak my lewend in ooreenstemming met u troue liefde.

¹⁶⁰ Die wese van u woord is betroubaarheid, en elkeen van u regverdige beslissings is vir ewig.

שׂ SIN שׁ SJIN

שׂ SIN שׁ SJIN

¹⁶¹ Leiers vervolg my sonder rede, maar net vir u woord het my hart 'n heilige vrees.

¹⁶² Ek verheug my oor u woord, soos iemand wat 'n groot buit gevind het.

¹⁶³ Ek haat en verafsku valsheid, maar u wet het ek lief.

¹⁶⁴ Sewe keer per dag loof ek U oor u regverdige beslissings.

¹⁶⁵ Groot vrede is daar vir hulle wat u wet liefhet; vir hulle is daar geen struikelblokke nie.

¹⁶⁶ Ek vestig my hoop op u verlossing, Here, en ek voer u bevele uit.

¹⁶⁷ Ek kom u bepalings na; ja, ek het dit baie lief.

¹⁶⁸ Ek kom u opdragte en u bepalings na, want al my paaie lê oop voor U.

ת TAW

ת TAW

¹⁶⁹ Laat my klaagroep voor U kom, Here; gee my insig ooreenkomstig u woord.

¹⁷⁰ Laat my smeekgebed U bereik, red my volgens u belofte.

¹⁷¹ My lippe laat lofprysing uitstroom, want U leer my u voorskrifte.

¹⁷² My tong besing u woord, want al u gebooie is regverdig.

¹⁷³ Laat u hand my te hulp kom, want ek verkies u opdragte.

¹⁷⁴ Ek verlang na u verlossing, Here; u wet is my vreugde.

¹⁷⁵ Hou my lewend sodat ek U kan loof en laat u beslissings my help.

¹⁷⁶ Ek dwaal rond soos 'n verlore skaap; soek tog u dienskneg. U gebooie vergeet ek immers nie.