Psalms 110 - Die Bybel 2020-vertaling

¹ Van Dawid. 'n Psalm. Dit is die uitspraak van die Here vir my heer: “Sit aan my regterhand totdat Ek jou vyande 'n voetbank vir jou voete maak.”

² Uit Sion stuur die Here jou magtige septer: “Heers te midde van jou vyande!

³ Jou volk bied hulleself gewillig aan op die dag van jou magsvertoon op die heilige berge. Uit die skoot van die daeraad het Ek jou soos dou verwek.”

⁴ Die Here het 'n eed afgelê en Hy sal nie spyt wees nie: “Jy is priester vir altyd volgens die orde van Melgisedek.”

⁵ My Heer, die een aan u regterhand verpletter konings op die dag van sy toorn.

⁶ Onder die nasies voltrek hy die vonnis – dit is vol lyke; hy verpletter hoofde oor 'n groot gebied.

⁷ Op pad drink hy uit die spruit; daarom sal hy sy hoof hoog hou.