Matteus 22 - Die Bybel 2020-vertaling

Gelykenis van die bruilofsfees

¹ Jesus het weer met hulle deur gelykenisse gepraat en gesê:

² “Die •koninkryk van die hemele is soos 'n koning wat 'n •bruilofsfees vir sy seun voorberei het.

³ Hy het toe sy slawe gestuur om dié wat na die bruilofsfees genooi is, te roep, maar hulle wou nie kom nie.

⁴ Nog 'n keer het hy ander slawe gestuur, met die opdrag, ‘Sê vir die genooides: Kyk, ek het my feesmaal gereedgemaak. My beeste en die vetgemaakte vee is geslag, en alles is gereed – kom na die bruilofsfees!’

⁵ Maar hulle het hulle nie daaraan gesteur nie en weggegaan, die een na sy stuk grond, die ander na sy besigheid.

⁶ Die res van hulle het sy slawe gegryp, hulle sleg behandel en doodgemaak.

⁷ Die koning het kwaad geword; hy het sy soldate gestuur, daardie moordenaars om die lewe gebring en hulle stad afgebrand.

⁸ Toe sê hy vir sy slawe, ‘Die bruilofsfees is gereed, maar die genooides was dit nie waardig nie.

⁹ Gaan dan uit na die kruispaaie en nooi soveel mense na die bruilofsfees as wat julle kan vind.’

¹⁰ Toe het daardie slawe uitgegaan na die paaie en almal bymekaargemaak wat hulle teëgekom het, slegtes sowel as goeies. En die bruilofsaal het vol gaste geword.

¹¹ Toe die koning ingaan om die gaste te sien, sien hy daar 'n man sonder 'n bruilofskleed aan.

¹² En hy vra hom, ‘Vriend, hoe het jy hier ingekom sonder 'n bruilofskleed?’ Maar die man het geswyg.

¹³ Toe sê die koning vir die dienaars, ‘Bind sy voete en hande vas en gooi hom uit in die duisternis daarbuite.’ Daar sal 'n geween en 'n gekners van tande wees.

¹⁴ Baie is immers geroep, maar min is uitgekies.”

Vraag oor belasting

¹⁵ Toe het die •Fariseërs gegaan en 'n plan beraam om Hom in 'n strik te laat beland oor wat Hy sê.

¹⁶ Hulle stuur toe hulle dissipels saam met die Herodiane na Hom en sê: “Meester, ons weet dat u opreg is en God se weg waarheidsgetrou leer en u aan niemand steur nie, want u neem nie die aansien van persone in aanmerking nie.

¹⁷ Sê dan vir ons wat is u opinie: Is dit toelaatbaar om aan die keiser belasting te betaal of nie?”

¹⁸ Omdat Jesus egter hulle bose bedoeling geken het, het Hy gesê: “Waarom toets julle My, julle skynheiliges?

¹⁹ Wys vir My die munt waarmee julle belasting betaal.” Hulle het vir Hom 'n denarius gebring.

²⁰ Hy vra hulle toe: “Wie se afbeelding en inskripsie is dit dié?”

²¹ En hulle sê vir Hom: “Die keiser s'n.” Daarop sê Hy vir hulle: “Gee dan aan die keiser wat hom toekom en aan God wat Hom toekom.”

²² Toe hulle dit hoor, was hulle verbaas. Hulle het Hom daar agtergelaat en weggegaan.

Vraag oor die opstanding

²³ Daardie selfde dag kom die •Sadduseërs, hulle wat sê dat daar nie 'n opstanding is nie, na Hom en vra:

²⁴ “Meester, Moses het gesê, ‘As iemand sonder kinders sterf, moet sy broer met die vrou trou en 'n nageslag vir sy broer verwek.’

²⁵ By ons was daar sewe broers. Die eerste het getrou en gesterf, en sy vrou vir sy broer agtergelaat, omdat hy nie self 'n nageslag gehad het nie.

²⁶ Dieselfde het gebeur met die tweede en die derde broer tot by die sewende een.

²⁷ Laaste van almal het die vrou gesterf.

²⁸ By die opstanding, wie van die sewe se vrou sal sy dan wees? Almal het haar immers as vrou gehad.”

²⁹ Jesus het hulle egter geantwoord: “Julle dwaal, omdat julle die Skrifte nie ken nie, en ook nie die krag van God nie.

³⁰ By die opstanding tree hulle nie in die huwelik nie en word hulle ook nie in die huwelik uitgegee nie, maar hulle is soos engele in die hemel.

³¹ En wat die opstanding van die dooies betref, het julle nie gelees wat God aan julle gesê het nie,

³² ‘Ek is die God van Abraham en die God van Isak en die God van Jakob.’? Hy is nie die God van dooies nie, maar van lewendes.”

³³ Toe die skare dit hoor, was hulle verstom oor sy lering.

Vraag oor die belangrikste gebod

³⁴ Toe die •Fariseërs hoor dat Hy die •Sadduseërs die swye opgelê het, het hulle bymekaargekom.

³⁵ Een van hulle, 'n wetskenner, het vervolgens 'n vraag gestel om Hom te toets:

³⁶ “Meester, wat is die belangrikste gebod in die Wet?”

³⁷ Hy het vir hom gesê: “ ‘Jy moet die Here jou God liefhê met jou hele hart en met jou hele siel en met jou hele verstand.’

³⁸ Dit is die belangrikste en die eerste gebod.

³⁹ En die tweede wat hieraan gelyk staan, is, ‘Jy moet jou naaste liefhê soos jouself.’

⁴⁰ Op hierdie twee gebooie berus die hele Wet en die Profete. ”

Vraag oor die Seun van Dawid

⁴¹ Toe die •Fariseërs bymekaar was, het Jesus hulle gevra:

⁴² “Wat sê julle van die Christus? Wie se Seun is Hy?” Hulle antwoord Hom: “Dawid s'n.”

⁴³ Hy vra hulle toe: “Hoe kan Dawid Hom dan, deur die werking van die Gees, ‘Here’ noem, as hy sê,

⁴⁴ “ ‘Die Here het vir my Here gesê: Sit aan my regterhand, totdat Ek jou vyande onder jou voete geplaas het’?

⁴⁵ “As Dawid Hom dan ‘Here’ noem, hoe kan Hy sy Seun wees?”

⁴⁶ Niemand kon Hom 'n woord antwoord nie; en van daardie dag af het niemand ooit weer gewaag om Hom te ondervra nie.