Psalms 7:10 - Die Bybel 2020-vertaling

¹⁰ Beëindig tog die boosheid van goddeloses; maar hou die regverdiges staande, U wat hart en niere toets, o regverdige God!

Bybel vir almal

¹⁰ U toets 'n mens, U weet wat hy in sy hart voel en wat hy dink, U is die Regverdige God. Asseblief, U moet die mense wat verkeerd doen, laat ophou verkeerd doen, U moet dit goed laat gaan met die mense wat reg doen.

Afrikaans 1933-1953

¹⁰ Laat tog die boosheid van die goddelose mense 'n einde neem, maar bevestig U die regverdige, ja, U wat harte en niere toets, o regverdige God!

Afrikaans 1983

¹⁰ Maak 'n end aan al die bose dade van die goddelose mense. Stel tog die onskuldige in die gelyk. U wat die mens deur en deur toets, U is die regverdige God.

Contemporary Afrikaans Bible 2023

¹⁰ My verdediging is by God, wat die opregtes van hart red.

Die Boodskap

¹⁰ Maak ’n einde aan slegte mense se planne wat weier om na U te luister. Maar help hulle wat U liefhet, o God. U weet mos of mense reg leef en of hulle vertrou kan word. U tree altyd regverdig op.

Nuwe Lewende Vertaling

¹⁰ Regverdige God wat gedagtes en gevoelens deursoek, maak ’n einde aan die boosheid van die goddelose, maar ondersteun die regverdiges.

Psalms 7:10 Kruisverwysings

Genesis 15:1

Ná verloop van tyd het die woord van die Here tot Abram gekom in 'n visioen: “Moenie bang wees nie, Abram! Ek is 'n skild vir jou. Jou loon is baie groot.”

1 Kronieke 28:9

En jy, my seun Salomo, erken die God van jou vader, en dien Hom met 'n onverdeelde hart en 'n gewillige gees, want die Here ondersoek alle harte, en in elke bedoeling van die gedagtes het Hy insig. As jy Hom soek, sal Hy Hom deur jou laat vind; maar as jy Hom verlaat, sal Hy jou vir altyd verwerp.

2 Kronieke 6:30

moet U self hoor uit die hemel, die plek van u verblyf. U moet dan vergewe en met elkeen handel volgens al sy dade, U wat sy hart ken – U alleen ken immers die harte van mensekinders –

Job 8:6

as jy onbesproke en opreg is, ja, dan sal Hy oor jou waak, dan sal Hy jou regmatige verblyf herstel.

Psalms 112:2

Sy nageslag sal magtig wees in die land – 'n geslag opregtes wat geseën word.

Psalms 125:4

Here, doen goed aan die goeies, aan dié wat opreg is in hulle harte.

Psalms 3:3

Baie sê van my: “Daar is geen redding vir hom by God nie.”

Psalms 84:11

want 'n dag in u voorhowe is beter as duisend daarbuite. Ek wag liewer op die drumpel van die huis van my God as om te woon in die tente van goddeloosheid.

Psalms 89:18

want U is hulle kragtige sieraad. Deur u aanvaarding het U ons sterk gemaak.

Spreuke 11:20

Mense met geslepe harte is vir die Here afstootlik, maar dié met 'n onbesproke lewenspad geniet sy goedkeuring.

Spreuke 2:21

Want opregtes sal die land bewoon, en wie onberispelik is, sal daarin agterbly.

Spreuke 28:18

Wie onberispelik leef, ontvang hulp; maar wie twee krom paaie volg, sal op een tot 'n val kom.

Jeremia 11:20

Maar Here, Heerser oor alle magte, regverdige Regter wat hart en niere toets, laat ek u wraak op hulle sien, want aan U het ek my regsaak toevertrou.

Jeremia 17:10

“Ek, die Here, deursoek harte en toets niere, om elkeen te vergeld volgens sy optrede, volgens die vrug van sy dade.”