Psalms 128:2 - Die Bybel 2020-vertaling

² Die vrug van jou hande sal jy beslis geniet. Gelukkig is jy! Dit gaan goed met jou.

Bybel vir almal

² As jy dit doen en as jy hard werk, dan sal jy genoeg hê om van te lewe. Dit sal goed gaan met jou, en jy sal ryk word.

Afrikaans 1933-1953

² Die opbrings van jou hande sal jy sekerlik eet; gelukkig is jy, en dit gaan met jou goed!

Afrikaans 1983

² Die vrug van jou arbeid sal jy geniet, gelukkig en voorspoedig sal jy wees.

Contemporary Afrikaans Bible 2023

² Want die arbeid van jou hande sal jy eet; gelukkig sal jy wees, en dit sal met jou goed gaan.

Die Boodskap

² Jou harde werk sal elke dag vir jou ’n goeie oes oplewer. Jy is die gelukkigste mens op aarde, want God sorg dat dit goed gaan met jou.

Nuwe Lewende Vertaling

² Jy sal die vrug van jou arbeid geniet en gelukkig en voorspoedig wees.

Psalms 128:2 Kruisverwysings

Genesis 3:19

Met sweet aan jou gesig sal jy brood eet, totdat jy terugkeer na die grond; want daaruit is jy geneem – ja, stof is jy, en tot stof sal jy terugkeer.”

Psalms 1:3

So iemand sal wees soos 'n boom geplant langs watervore, wat sy vrugte op sy tyd gee en waarvan die blare nie verdor nie. Alles wat hy aanpak, gedy.

Psalms 109:11

Mag die skuldeiser beslag lê op alles wat aan hom behoort, en mag vreemdes die vrug van sy arbeid plunder.

Prediker 8:12

omdat 'n sondaar honderd keer kwaad kan doen, en lank lewe. Ja, ek weet ook: Dit sal goed gaan met hulle wat vir God ontsag het, omdat hulle vir Hom ontsag het;

Jesaja 3:10

“ Sê vir die regverdiges dat dit goed sal gaan, want die vrug van hulle dade sal hulle geniet.

Jesaja 62:8

Die Here het 'n eed afgelê by sy regterhand, by sy kragtige voorarm: “Ek sal nie meer jou koring as voedsel aan jou vyande gee nie, en vreemdes sal nie meer jou •nuwe wyn drink waarvoor jy jou vermoei het nie.

Jesaja 65:13

Daarom, so sê my Heer, die Here: “Kyk, my diensknegte sal eet, maar julle sal honger ly. Kyk, my diensknegte sal drink, maar julle sal dors ly. Kyk, my diensknegte sal hulle verheug, maar julle sal beskaamd staan.

Jeremia 22:15

Is jy 'n koning omdat jy meeding in die gebruik van sederhout? Jou vader, het hy nie maar net geëet en gedrink, en reg en geregtigheid beoefen nie? Toe het dit met hom goed gegaan.

1 Korinthiërs 15:58

Daarom, my geliefde broers, wees standvastig en onwrikbaar, en wy julle ten volle aan die werk van die Here, omdat julle weet dat julle arbeid in die Here nie vergeefs is nie.

Efesiërs 6:3

“sodat dit met jou goed mag gaan, en jy 'n lang lewe op aarde sal hê.”

Deuteronomium 28:11

Op die grond wat die Here aan jou voorvaders met 'n eed beloof het om aan jou te gee, sal die Here aan jou ryke oorvloed skenk met die vrug van jou liggaam, die vrug van jou diere en die vrug van jou grond.

Deuteronomium 28:39

Wingerde sal jy plant en bewerk, maar jy sal nie wyn drink of druiwe oes nie; want wurms sal dit opvreet.

Deuteronomium 28:4

Geseënd die vrug van jou liggaam, die vrug van jou grond en die vrug van jou diere – die aanteel van jou beeste en die aanwas van jou kleinvee!

Deuteronomium 28:51

Daardie nasie sal die vrug van jou vee en die vrug van jou grond verslind, totdat jy uitgedelg is; ja, hy sal vir jou nie koring, •nuwe wyn en olie, kalwers of lammers laat oorbly nie, totdat hy jou vernietig het.

Deuteronomium 28:8

“Die Here sal vir jou seën stuur – in jou graanskure en in alles waaraan jy jou hand waag. Ja, die Here jou God sal jou seën in die land wat Hy vir jou gaan gee.