Openbaring 2:17 - Die Bybel 2020-vertaling

¹⁷ “ ‘Laat dié wat ore het, luister na wat die Gees aan die gemeentes sê. Aan wie oorwin, sal Ek van die verborge manna gee, en Ek sal vir hom 'n wit klippie gee, ja, 'n klippie waarop 'n nuwe naam gegraveer is, en wat niemand anders ken nie, behalwe die een wat dit ontvang.’ ”

Bybel vir almal

¹⁷ As jy verstaan wat die Heilige Gees vir die gemeentes sê, dan moet jy gehoorsaam wees! As jy oorwin en aanhou glo, dan sal Ek vir jou van die manna gee, ander mense weet nie van daardie manna nie. Ek sal ook vir jou 'n wit klippie gee. Op die klippie is 'n nuwe naam geskryf. Niemand anders sal weet wat daardie naam is nie, net jy sal dit weet.”

Afrikaans 1933-1953

¹⁷ Wie 'n oor het, laat hom hoor wat die Gees aan die gemeentes sê. Aan hom wat oorwin, sal Ek gee om te eet van die verborge manna, en Ek sal hom gee 'n wit keursteen, en op dié steen 'n nuwe naam geskrywe wat niemand ken nie, behalwe hy wat dit ontvang.

Afrikaans 1983

¹⁷ Elkeen wat kan hoor, moet luister na wat die Gees vir die gemeentes sê. Aan elkeen wat die oorwinning behaal, sal Ek van die verborge manna gee, en daarby sal Ek vir hom 'n wit steentjie gee met 'n nuwe naam daarop gegraveer, wat niemand anders ken nie, net hy wat dit kry.

Contemporary Afrikaans Bible 2023

¹⁷ Wie 'n oor het, laat hom hoor wat die Gees aan die gemeentes sê; Aan hom wat oorwin, sal Ek gee om van die verborge manna te eet, en Ek sal hom 'n wit steen gee, en op die steen 'n nuwe naam geskrywe wat niemand ken nie, behalwe hy wat dit ontvang.

Die Boodskap

¹⁷ Maak oop julle ore. Luister mooi na wat die Heilige Gees vir julle sê. Wie die wenpaal haal, sal beloon word. Ek sal vir hom gee van die hemelse brood wat weggesteek is. Ek sal ook vir hom ’n wit klippie gee. Op die klippie is ’n naam geskryf wat net vir hom bedoel is. Niemand, behalwe die een wie se klippie dit is, sal weet wat die naam is nie.

Nuwe Lewende Vertaling

¹⁷ Elkeen wat kan hoor, moet luister wat die Gees aan die gemeentes sê. Aan elkeen wat aanhou oorwin, sal Ek van die weggesteekte manna gee, asook ’n wit steentjie met ’n nuwe naam op gegraveer wat niemand anders ken nie behalwe die een wat dit ontvang het.

Openbaring 2:17 Kruisverwysings

Psalms 25:14

Die Here neem hulle wat vir Hom ontsag het, in sy vertroue, en sy verbond is daar om hulle te onderrig.

Psalms 36:8

Hoe kosbaar is u troue liefde, o God! Mense skuil in die skadu van u vlerke.

Eksodus 16:33

Daarom het Moses vir Aäron gesê: “Neem een kruik, plaas 'n volle omer manna daarin, en sit dit voor die Here neer om te bewaar vir julle nageslagte.”

Spreuke 14:10

Die hart ken sy eie bitterheid, en in sy vreugde kan 'n buitestander nie deel nie.

Spreuke 3:32

want vir die Here is iemand wat die spoor byster raak, afstootlik – maar opregtes geniet sy vertroue.

Jesaja 56:4

Want so sê Ek, die Here, vir die eunugs, vir dié wat wel my Sabbatte onderhou, wat dit kies waarin Ek vreugde vind, en wat vashou aan my verbond:

Jesaja 56:5

Ek sal vir hulle iets gee wat beter is as seuns en dogters: In my •tempel en teen my mure sal Ek hulle gedenk met 'n teken en 'n naam. 'n Ewige naam sal Ek aan hulle gee wat nie uitgewis sal word nie.

Jesaja 62:2

Nasies sal jou geregtigheid sien, en al die konings jou roem. Aan jou sal 'n nuwe naam gegee word; die mond van die Here self sal dit bepaal.

Jesaja 65:13

Daarom, so sê my Heer, die Here: “Kyk, my diensknegte sal eet, maar julle sal honger ly. Kyk, my diensknegte sal drink, maar julle sal dors ly. Kyk, my diensknegte sal hulle verheug, maar julle sal beskaamd staan.

Jesaja 65:15

Julle sal julle naam agterlaat om deur my uitverkorenes in verwensings gebruik te word. Die Heer, die Here, sal jou doodmaak; maar aan sy diensknegte sal Hy 'n ander naam gee.

Matteus 13:11

Hy het hulle geantwoord: “Omdat dit aan julle gegee is om die geheimenisse van die •koninkryk van die hemele te verstaan; maar vir daardie mense is dit nie gegee nie.

Johannes 4:32

Maar Hy het vir hulle gesê: “Ek het voedsel om te eet waarvan julle nie weet nie.”

1 Korinthiërs 2:14

Maar 'n niegeestelike mens aanvaar nie wat van die Gees van God kom nie; vir hom is dit immers dwaasheid, en hy kan dit nie begryp nie, omdat dit slegs geestelik beoordeel kan word.

Kolossense 3:3

Julle het immers gesterf, en julle lewe is saam met Christus verborge in God.

Openbaring 14:3

Hulle het 'n nuwe lied voor die troon en in die teenwoordigheid van die vier lewende wesens en die ouderlinge gesing. Niemand kon egter dié lied leer nie, behalwe die honderd vier-en-veertigduisend mense wat van die aarde losgekoop is.

Openbaring 19:16

Op sy klere, by sy heup, is 'n Naam geskryf: “Koning van die konings, en Heerser van die heersers”.

Openbaring 2:11

“ ‘Laat dié wat ore het, luister na wat die Gees aan die gemeentes sê. Wie oorwin, sal beslis nie deur die tweede dood skade ly nie.’ ”

Openbaring 2:7

“ ‘Laat dié wat ore het, luister na wat die Gees aan die gemeentes sê. Aan wie oorwin, sal Ek te ete gee van die boom van die lewe wat in God se paradys staan.’ ”

Openbaring 3:22

Laat dié wat ore het, luister na wat die Gees aan die gemeentes sê.’ ”

Openbaring 3:6

Laat dié wat ore het, luister na wat die Gees aan die gemeentes sê.’ ”