Openbaring 18:2 - Die Bybel 2020-vertaling

² Hy het met 'n kragtige stem uitgeroep: “Geval, geval het Babilon die Grote! Sy het 'n woonplek vir demone geword, 'n skuilplek vir elke onrein gees, 'n skuilplek vir elke onrein voël, en 'n skuilplek vir elke onrein en veragtelike dier,

Bybel vir almal

² Die engel het hard geskree en gesê: “ Babilon, die groot stad, is afgebreek en plat! Ja, dit is plat! Die duiwels woon nou daar, al die onrein geeste kom daar bymekaar, al die onrein voëls kom daar bymekaar, al die onrein diere kom daar bymekaar, mense hou niks van daardie diere nie.

Afrikaans 1933-1953

² En hy het met 'n groot stem kragtig uitgeroep en gesê: Geval, geval het die groot Babilon, en dit het geword 'n woonplek van duiwels en 'n versamelplek van allerhande onreine geeste en 'n versamelplek van allerhande onreine en haatlike voëls,

Afrikaans 1983

² Hy het met 'n sterk stem uitgeroep: “Geval, geval het die grote Babilon. Dit het die blyplek van die bose geeste geword, die skuilplek van alle onrein geeste, die skuilplek van alle onrein roofvoëls en die skuilplek van alle onrein en afskuwelike diere,

Contemporary Afrikaans Bible 2023

² En hy het kragtig met 'n sterk stem uitgeroep en gesê: Geval, geval het Babilon, en het 'n woonplek van duiwels geword en 'n houvas van elke onreine gees en 'n hok van elke onrein en haatlike voël.

Die Boodskap

² Hy skree toe: “Dit is verby met daardie belangrike stad Babilon. Sy word met die grond gelykgemaak. Dit het ’n spookdorp geword, vol demone. Oral het bose geeste hulle intrek geneem. Allerhande vieslike vlieënde goed het daar kom nes maak. Diere waarvan God niks hou nie, het daar opgedaag. Al hierdie goed is regtig vieslik en haatlik!

Nuwe Lewende Vertaling

² Hy het met ’n kragtige stem uitgeroep: “Geval, geval het die grote Babilon! Dit het die wegkruipplek geword van die bose geeste, ’n skuilplek van elke onrein gees, ’n nes van elke onrein roofvoël en van haatlike diere.

Openbaring 18:2 Kruisverwysings

Jesaja 14:23

“Ek maak van Babel waterryke vleilande, die domein van uile. Ek sal haar wegvee met 'n besem wat verdelg.” Dit is die uitspraak van die Here, Heerser oor alle magte.

Jeremia 25:30

“En jy, jy moet al hierdie woorde teen hulle profeteer. Jy moet vir hulle sê, ‘Die Here, uit die hoogte sal Hy brul, uit sy heilige woning sal Hy sy stem laat hoor. Hy brul geweldig teen sy blyplek. 'n Kreet soos van druiwetrappers hef Hy aan teen al die bewoners van die aarde.

Jeremia 51:37

Babel sal klipstapels word, 'n lêplek vir woestynjakkalse, 'n skrikbeeld en die rede vir 'n gefluit, sonder inwoners.

Jeremia 51:8

Onverwags kom Babel tot 'n val, stort sy ineen. Huil oor haar, kry balsem vir haar pyn! Miskien kan sy genees word.

Joël 3:16

En die Here, uit Sion brul Hy, uit Jerusalem verhef Hy sy stem, sodat hemel en aarde bewe. Maar die Here is 'n toevlugsoord vir sy volk, 'n skuilplek vir die Israeliete.

Sefanja 2:14

Troppe vee, allerhande diere sal daar gaan lê, bontkraaie en uile sal op die pilare oornag en hulle geluide sal deur die vensters weerklink. Puin sal op die drumpel lê, ja, die sederhout sal rondlê.

Openbaring 1:15

Sy voete was net soos gloeiende koper in 'n rooiwarm oond, en sy stem soos die gedruis van baie waterstrome.

Openbaring 10:3

en met 'n harde stem, soos die brul van 'n leeu, uitgeroep. Nadat hy uitgeroep het, het die sewe donderslae hulle dreunings laat klink.

Openbaring 11:8

Dan sal hulle lyke langs die hoofstraat van die groot stad lê, daardie stad wat, figuurlik gesproke, Sodom en Egipte genoem word, en waar ook hulle Here gekruisig is.

Openbaring 14:15

'n Ander engel het uit die tempel gekom, en met 'n harde stem geroep na Hom wat op die wolk sit: “Steek u sekel in en oes, want die tyd om te oes, het aangebreek, en die aarde is ryp vir die oes.”

Openbaring 14:8

Ná hom het 'n ander engel, 'n tweede een, gekom en uitgeroep: “Geval, geval het Babilon, die magtige, sy wat al die nasies van die wyn van die wellus van haar hoerery laat drink het. ”

Openbaring 16:13

Toe het ek uit die bek van die draak, en uit die bek van die dier, en uit die mond van die vals profeet, drie onrein geeste sien kom wat soos paddas lyk.

Openbaring 16:19

Die groot stad het in drie dele uitmekaar geval, en die stede van die nasies het ineengetuimel. God het aan Babilon, die magtige, gedink deur aan haar die beker wyn van die gramskap van sy toorn te gee.

Openbaring 17:18

Die vrou wat jy gesien het, is die groot stad wat heerskappy oor die konings van die aarde het.”

Openbaring 17:5

En op haar voorkop was 'n naam geskryf, 'n misterie: “Babilon die Grote, die moeder van die prostitute, en van al die afskuwelikhede van die aarde.”

Openbaring 18:10

Hulle sal uit vrees vir haar foltering op 'n afstand staan en sê: “Wee, wee jou, groot stad, Babilon, magtige stad, binne 'n oomblik het jou oordeel aangebreek!”

Openbaring 18:21

Toe het een sterk engel 'n klip, soos 'n groot maalklip van 'n donkie, opgetel en dit in die see gegooi en gesê: “Net so, met geweld, sal die groot stad Babilon neergegooi word, en sy sal nooit weer gevind word nie.

Openbaring 5:2

Ek het ook 'n sterk engel gesien, wat met 'n harde stem uitroep: “Wie is waardig om die boekrol oop te maak en die seëls daarvan te breek?”