Nehemia 9:26 - Die Bybel 2020-vertaling

²⁶ “Maar hulle was opstandig, het teen U in opstand gekom. Hulle het die rug op u wet gedraai. U profete, wat hulle tereggewys het om hulle na U terug te bring, het hulle vermoor. Hulle het hulle skuldig gemaak aan ernstige godslastering.

Bybel vir almal

²⁶ “Maar hulle was hardkoppig, hulle was opstandig teen U. Hulle wou nie doen wat U wil hê nie. U profete het hulle gewaarsku en het gesê hulle moet terugkom na U toe, maar hulle het die profete doodgemaak. Hulle het vir U beledig.

Afrikaans 1933-1953

²⁶ Maar hulle het wederstrewig en opstandig geword teen U en u wet agter hulle rug gewerp; en u profete wat hulle gewaarsku het, om hulle na U terug te bring, het hulle gedood en groot, afskuwelike dinge gedoen.

Afrikaans 1983

²⁶ Maar hulle het opstandig geword en teen U in verset gekom, hulle het u wet verwerp en u profete doodgemaak wat hulle gewaarsku het om na U terug te kom. Hulle het skandelike dinge gedoen.

Contemporary Afrikaans Bible 2023

²⁶ Maar hulle was ongehoorsaam en het teen U in opstand gekom en u wet agter hulle rug gewerp, en u profete gedood wat teen hulle getuig het om hulle na U te bekeer, en hulle het groot ergernisse bewerk.

Die Boodskap

²⁶ Maar die Israeliete was ongehoorsaam en opstandig teen U. Hulle het hulle nie aan u opdragte gesteur nie. Hulle het u boodskappers doodgemaak omdat hulle u volk gewaarsku het om U opreg te dien. Hulle het skandelike dinge aangevang.

Nuwe Lewende Vertaling

²⁶ “Ten spyte hiervan was hulle ongehoorsaam en opstandig teen U. Hulle het u wet verwerp. U profete het hulle probeer oortuig om na U toe terug te keer. Maar hulle het hulle doodgemaak en godslasterlike dinge gedoen.

Nehemia 9:26 Kruisverwysings

1 Konings 14:9

ja, omdat jy meer kwaad gedoen het as almal wat voor jou was, en jy gegaan en vir jou ander gode gemaak het, gegote beelde, om My uit te tart, en omdat jy My verwerp het,

1 Konings 18:13

Is daar nie vir my heer vertel wat ek gedoen het toe Isebel die profete van die Here uitgemoor het nie? Ek het 'n honderd man van die Here se profete weggesteek, vyftig hier en vyftig man daar, in grotte, en hulle van brood en water voorsien.

1 Konings 18:4

Toe Isebel die profete van die Here uitgeroei het, het Obadja 'n honderd profete geneem en hulle weggesteek – vyftig man in 'n grot – en hulle van brood en water voorsien.

1 Konings 19:10

Hy het geantwoord: “Ek het my volle ywer getoon vir die Here, die God van alle magte, want die Israeliete het u verbond verlaat, u altare het hulle afgebreek en u profete met die swaard om die lewe gebring. Ek alleen het oorgebly, en hulle soek my lewe om dit te neem. ”

2 Konings 21:10

Die Here het by monde van sy diensknegte, die profete, gesê:

2 Konings 21:11

“ Omdat Manasse, die koning van Juda, hierdie afstootlike dinge gedoen het – hy het meer kwaad gedoen as alles wat die Amoriete voor hom gedoen het, en hy het ook Juda laat sondig met sy afgodsbeelde –

2 Kronieke 36:16

Hulle het egter telkens die gek geskeer met die boodskappers van God en sy woorde versmaai, terwyl hulle met sy profete die spot gedryf het, totdat die Here se woede teen sy volk opgelaai het, totdat geen herstel meer moontlik was nie.

Nehemia 9:18

Selfs toe hulle 'n gegote kalf gemaak en gesê het, ‘Dit is jou God wat jou uit Egipte laat optrek het,’ en hulle hulle skuldig gemaak het aan ernstige godslastering,

Nehemia 9:29

U het hulle gewaarsku, om hulle na u wet terug te bring. Maar hulle was vermetel, hulle het nie na u gebooie geluister nie, en teen u bepalings het hulle gesondig, teen dit wat 'n mens moet doen, sodat hy daardeur kan leef. Hulle skouers het onversetlik gebly, hulle nekke styf, hulle het nie geluister nie.

Nehemia 9:30

“ Baie jare lank was U geduldig met hulle, het U hulle gewaarsku deur u Gees by monde van u profete, maar hulle het nie gehoor gegee nie. U het hulle oorgegee in die hand van die volke van ander lande.

Psalms 50:17

Jy is die een wat vermaning haat, en my woorde verwerp.

Jeremia 16:11

Dan moet jy vir hulle sê, ‘Omdat julle voorouers My verlaat het,’ is die uitspraak van die Here, ‘en agter ander gode aangeloop het, hulle gedien en voor hulle in aanbidding gebuig het. Hulle het My verlaat; my wet het hulle nie nagekom nie.

Jeremia 2:30

“Tevergeefs het Ek julle kinders geslaan; teregwysing het hulle nie aanvaar nie. Julle swaarde het julle profete verslind, soos 'n leeu wat verskeur. ”

Jeremia 2:7

Ek het julle gebring na 'n land met boorde, om die vrugte en die goeie daarvan te geniet. Maar julle het ingekom en my land verontreinig; van my eiendom het julle iets afstootliks gemaak.

Jeremia 32:23

Hulle het gekom en dit in besit geneem, maar hulle het nie na u stem geluister nie en u voorskrifte het hulle nie gevolg nie. Hulle het niks gedoen van alles wat U hulle beveel het om te doen nie. Toe het U hulle al hierdie onheil laat beleef.

Jeremia 42:19

“Die Here het oor julle uitspraak gelewer, oorblyfsel van Juda, ‘Moenie na Egipte gaan nie!’ Julle moet goed besef dat ek julle vandag gewaarsku het;

Klaagliedere 3:42

Ons het oortree; ons was opstandig. U het ons nie vergewe nie.

Esegiël 20:21

“ ‘ “Maar die kinders was opstandig teen My. My vaste voorskrifte het hulle nie gevolg nie; my bepalings het hulle nie nougeset nagekom nie – bepalings wat die mens moet uitvoer, sodat hy daardeur kan leef – en my Sabbatte het hulle ontheilig. Ek het dit oorweeg om my woede oor hulle uit te stort, om my toorn op hulle te laat uitwoed in die woestyn.

Matteus 21:35

Maar die landbouers het sy slawe gegryp, een afgeransel, 'n ander een doodgemaak, en nog een gestenig.

Handelinge 7:52

Wie van die profete is nie deur julle vaders vervolg nie? Ja, hulle het diegene doodgemaak wat die koms van die Regverdige vooraf aangekondig het. Julle het nou sy verraaiers en moordenaars geword.

Deuteronomium 32:14

met die dikmelk van beeste, die melk van kleinvee, ook met die vet van slaglammers, ramme uit Basan, ook bokramme, en met die fynste koringmeel. En druiwebloed het jy gedrink – gistende wyn.

Deuteronomium 32:15

“ Jesurun het vet geword en agterop geskop. Jy het vet geword, rond geword, eiesinnig geraak. Hy het die God wat hom gemaak het, versaak, die Rots wat hom verlos, met minagting behandel.

Rigters 10:6

Die Israeliete het weer gedoen wat verkeerd is in die oë van die Here. Hulle het die Baäls en die Astartes gedien, en ook die gode van Aram, van Sidon, van Moab, van die Ammoniete en van die Filistyne. Hulle het die Here verlaat en Hom nie gedien nie.