Josua 20:9 - Die Bybel 2020-vertaling

⁹ Dit was die stede waaroor daar ooreengekom is vir al die Israeliete en vir die •vreemdelinge wat tydelike verblyf tussen hulle het, om heen te vlug, elkeen wat sonder opset 'n lewe geneem het, sodat hy nie sal sterf deur die hand van die bloedwreker voordat hy voor die volksvergadering verskyn het nie.

Bybel vir almal

⁹ Dit was die stede wat hulle gekies het. 'n Israeliet en 'n vreemdeling wat tussen die Israeliete woon, kon na 'n asielstad vlug wanneer hy 'n persoon doodgemaak het, maar hy wou dit nie doen nie, dit was 'n ongeluk. Dan kon die naaste familielid van die persoon wat dood is, hom nie doodmaak voordat die volksvergadering besluit het of hy skuldig is of nie.

Afrikaans 1933-1953

⁹ Dit is die stede wat bepaal was vir al die kinders van Israel en vir die vreemdeling wat onder hulle vertoef; sodat elkeen wat per ongeluk 'n mens doodgeslaan het, daarheen sou kan vlug en nie hoef te sterf deur die hand van die bloedwreker voordat hy voor die vergadering gestaan het nie.

Afrikaans 1983

⁹ Dit was die stede waarop ooreengekom is. Enige Israeliet, of enige vreemdeling tussen die Israeliete, wat onopsetlik die dood van 'n ander veroorsaak het, kon na so 'n asielstad toe vlug sodat hy nie deur 'n bloedverwant van die oorledene doodgemaak word sonder dat hy deur 'n vergadering verhoor is nie.

Contemporary Afrikaans Bible 2023

⁹ Dit was die stede wat bestem is vir al die kinders van Israel en vir die vreemdeling wat onder hulle vertoef, sodat elkeen wat iemand onverhoeds doodmaak daarheen kan vlug en nie deur die hand van die bloedwreker sterf nie, totdat hy voor die vergadering gestaan het.

Die Boodskap

⁹ Dit was die toevlugstede wat aangewys is vir die Israeliete, asook enige uitlanders wat saam met hulle in die land gebly het. Enigeen wat iemand per ongeluk doodgemaak het, kon daar gaan skuil vir beskerming teen die familie van die persoon wat doodgemaak is. Hulle kon daar bly terwyl hulle op ’n openbare verhoor gewag het.

Josua 20:9 Kruisverwysings

Numeri 35:13

Van die stede wat julle afstaan, moet ses vir julle asielstede wees.

Numeri 35:15

Vir die Israeliete, vir •vreemdelinge en vir bywoners tussen julle moet hierdie ses asielstede daar wees, sodat enigiemand wat 'n persoon onopsetlik doodgemaak het, daarheen kan vlug.

Josua 20:4

Iemand kan dan na een van hierdie stede vlug, en by die ingang van die stadspoort gaan staan en sy saak stel ten aanhore van die oudstes van daardie stad. Hulle moet hom by hulle in die stad opneem en vir hom 'n plek gee, sodat hy by hulle kan woon.

Josua 20:6

Hy moet in daardie stad bly totdat hy voor die volksvergadering verskyn het vir 'n beslissing, en daarna tot die dood van die hoëpriester wat in dié dae daar sal wees. Dan mag die een wat 'n lewe geneem het, terugkeer, teruggaan na sy dorp en sy huis, na die dorp waarvandaan hy gevlug het.’ ”

Josua 20:8

Oorkant die Jordaan, oos van Jerigo, het hulle afgestaan: Beser in die woestyn, op die plato van die stam van Ruben se grondgebied; Ramot in Gilead, uit die stamgebied van Gad; en Golan in Basan, uit die stamgebied van Manasse.