2 Konings 22:2 - Die Bybel 2020-vertaling

² Hy het gedoen wat reg is in die oë van die Here. Hy het in alle opsigte die pad van sy voorvader Dawid gevolg en nie links of regs daarvan afgewyk nie.

Bybel vir almal

² Josia het dinge gedoen waarvan die Here hou. Hy het gelewe presies soos sy voorvader Dawid.

Afrikaans 1933-1953

² En hy het gedoen wat reg was in die oë van die Here en geheel en al in die weg van sy vader Dawid gewandel en nie regs of links afgewyk nie.

Afrikaans 1983

² Josia het gedoen wat reg is in die oë van die Here. Hy het in alles die pad van sy voorvader Dawid geloop en daar nie links of regs van afgewyk nie.

Contemporary Afrikaans Bible 2023

² En hy het gedoen wat reg was in die oë van die HERE, en in die hele weg van sy vader Dawid gewandel en nie regs of links afgewyk nie.

Die Boodskap

² Wat Josia gedoen het, het die Here baie tevrede gestel. Hy het soos sy voorvader Dawid regeer en dit nie eers oorweeg om iets verkeerds te doen nie.

Nuwe Lewende Vertaling

² Hy het gedoen wat vir die Here reg was en het die voorbeeld van sy voorvader Dawid nagevolg sonder om daarvan links of regs af te wyk.

2 Konings 22:2 Kruisverwysings

1 Konings 11:38

As jy dan luister na alles wat Ek jou beveel, my paaie volg en doen wat reg is in my oë deur my vaste voorskrifte en gebooie na te kom, soos my dienskneg Dawid gedoen het, sal Ek met jou wees en vir jou 'n bestendige huis bou, soos ek dit vir Dawid gebou het. Ek sal Israel vir jou gee.

1 Konings 15:11

Asa het gedoen wat reg is in die oë van die Here, soos sy voorvader Dawid.

1 Konings 15:5

Want Dawid het gedoen wat reg is in die oë van die Here en hy het sy lewe lank nie afgewyk van alles wat die Here hom beveel het nie, behalwe in die geval van Uria, die Hetiet.

1 Konings 3:6

Salomo het gesê: “U self het aan u dienskneg, my vader Dawid, oorvloedige troue liefde bewys, omdat hy voor U geleef het in waarheid en geregtigheid, en ook met opregtheid van hart teenoor U. U het hierdie oorvloedige troue liefde teenoor hom volgehou en aan hom 'n seun gegee wat op sy troon sit, soos dit vandag is.

2 Konings 12:3

Net die offerhoogtes is nie verwyder nie. Die volk het nog steeds geslag en offers verbrand op die offerhoogtes.

2 Konings 14:3

Hy het gedoen wat reg is in die oë van die Here, maar nie soos sy voorvader Dawid nie. Hy het opgetree net soos sy vader Jehoas opgetree het –

2 Konings 16:2

Agas was twintig jaar oud toe hy koning geword het en hy het sestien jaar lank as koning geheers in Jerusalem. Hy het nie gedoen wat reg is in die oë van die Here sy God, soos sy voorvader Dawid nie.

2 Konings 18:3

Hiskia het gedoen wat reg is in die oë van die Here, net soos sy voorvader Dawid gedoen het.

2 Kronieke 17:3

Die Here was met Josafat, omdat hy die vroeëre paaie van sy voorvader Dawid gevolg het. Hy het nie die Baäls geraadpleeg nie,

2 Kronieke 29:2

Hy het gedoen wat reg is in die oë van die Here, net soos sy voorvader Dawid gedoen het.

2 Kronieke 31:20

Op hierdie manier het Hiskia dit gereël deur die hele Juda. Hy het gedoen wat goed, reg en eerbaar was voor die Here sy God.

2 Kronieke 34:1

Josia was agt jaar oud toe hy koning geword het, en hy het een-en-dertig jaar lank as koning geheers in Jerusalem.

Spreuke 20:11

Reeds aan sy dade laat 'n jong man hom ken, of wat hy doen, suiwer en reg is.

Spreuke 4:27

Moenie regs of links afdraai nie, hou jou voet weg van die kwaad.”

Sefanja 1:1

Dit is die woord van die Here aan Sefanja, seun van Kusi, seun van Gedalja, seun van Amarja, seun van Hiskia in die tyd van Josia, seun van Amon, koning van Juda.

Deuteronomium 5:32

“Daarom moet julle dit nougeset nakom, soos wat die Here julle God julle beveel het. Julle mag nie na links of regs afwyk nie.

Josua 1:7

Wees net baie dapper en sterk, sodat jy die hele wet wat Moses, my dienskneg, jou beveel het, nougeset uitvoer. Moenie links of regs daarvan afwyk nie, sodat jy sukses kan behaal oral waar jy gaan.