Psalms 25 - Die Bybel 2020-vertaling Die Bybel 2020-vertaling
Psalms 25

¹ Van Dawid. Na U, Here, hunker ek.

² My God, op U vertrou ek; laat my tog nie beskaamd staan nie; laat my vyande nie oor my jubel nie.

³ Ja, niemand wat op U wag, sal beskaamd staan nie; maar hulle wat sonder rede ontrou is, sal beskaamd staan.

⁴ Here, maak u paaie aan my bekend; leer my u weë.

⁵ Lei my deur u waarheid en leer my, want U is die God wat my red; op U wag ek die hele dag.

⁶ Dink aan u barmhartigheid en u troue liefde, Here, want dit is van altyd af daar.

⁷ Aan die sondes van my jeug en my oortredings moet U nie dink nie; dink aan my in u troue liefde, omdat U goed is, Here.

⁸ Die Here is goed en reg, daarom leer Hy sondaars die pad.

⁹ Mag Hy verdruktes lei in wat reg is; mag Hy hulle sy pad leer.

¹⁰ Al die paaie van die Here is troue liefde en waarheid vir hulle wat hou by sy verbond en sy bepalings.

¹¹ Ter wille van u Naam, Here, vergewe my sondeskuld, want dit is groot.

¹² Wie is die mens wat vir die Here ontsag het? Die Here leer hom die pad wat hy moet kies.

¹³ Sy lewe verloop voorspoedig en sy nageslag sal die land besit.

¹⁴ Die Here neem hulle wat vir Hom ontsag het, in sy vertroue, en sy verbond is daar om hulle te onderrig.

¹⁵ My oë bly altyd op die Here, want dit is Hy wat my voete uit die vangnet bevry.

¹⁶ Draai U na my en wees my genadig, want ek is eensaam en magteloos.

¹⁷ Die benoudheid van my hart is oorweldigend; lei my uit my kwellinge.

¹⁸ Sien tog my ellende en my swaarkry raak en vergewe al my sonde.

¹⁹ Kyk na my vyande, hoe baie hulle geword het; en hoe fel hulle my haat.

²⁰ Beskerm tog my lewe en red my; laat my nie beskaamd staan nie, want ek skuil by U.

²¹ Mag onskuld en opregtheid oor my wag hou, want ek wag op U.

²² Bevry Israel, o God, van al sy benoudheid.