YESAYA 32 - Susula Malalaok Hehelu Palak Ma Hehelu Beuk

Manek fo manatao ndoos ma matetuk

¹ Mete leona, te neukose fain-na losa, manek esa, ana paleta no ndoos ma matetuk, ma leoina mauli-malangan-nala, lakalala'ok ndoos ma matetuk-ka.

² Sila esa-esak, sama leo ani-sangu mamana nasulu-nahapan. Sila sama leo lee fo, ana faa nai moo solokaek-ka, sama leo batu matuaina manai dae tuuk-ka, mamana susulun-na.

³ Hataholi fo, ana hapu nita, neukose ta nasunguk matan-na fa, ma hataholi fo ana hapu namanene, neukose ana taoafik.

⁴ Hataholi fo makahulun-na, ala tunga ka'da nasa botoliin-nala, neukose ala tai-dodoo lalelak, ma hataholi maa bo'dek-ka, neukose ana hapu kokolak no mangale'dok.

⁵ Hataholi nggoak-ka, ta nananafa'dak, nanafe ha'da-holomata so'on, ma manatipu-daik-ka, ta nananafa'dak, manatao tunga ndoon-na fa.

⁶ Hataholi nggoak-ka, ana kokolak dede'a nggoak, ma ana tutu'u eno mangalauk. Ana tao su'di beek-ka, do nafa'da su'di beek-ka, nalupa nakamumulu-nakamamaek neu Manetualain. Ana beita fe nita nana'ak neu hataholi kamala'ak-ka, do neninuk neu hataholi manamaa ma'dak-ka.

⁷ Boema hataholi manatipu-daik esa, ana dudu'a-dodoo hata fo mangalauk. Ana sanga enok, soaneu tao soe hataholi nuu taa-hata taak-ka, nenik dede'a-kokola pepekok, ma ana kena-ka'is soaneu hapu sila haak-ka.

⁸ Tehu hataholi ha'da-palii malole-a, tutu'u hata fo malole, ma ana tao malole boe.

Naketu-nala'dik ma tao nabebeu

⁹ Mamanene leon, hai ina-inak fo so'dan-nala malole, ma ta hapu toto'a-tataak fa!

¹⁰ Besak ia, emi bole mame'da mita tetu-temak-ka, tehu fafa'kama, bei teuk esa seluk bai soona, neukose ketu emi namahehenam-ma, nana neukose emi ta da'di ketu-seu angol fa, ma ta hapu buna-boa fe'ek boen.

¹¹ Losa hatematak ia, emi so'dam-ma malole, ma ta hapu toto'a-tataak fa. Tehu besak ia, emi dele ngge'be-ngge'be no bibii-namata'uk-ka! O'duheni emi bua papakem-ma, fo pa'a si'di lafa lapik neu emi tala'dam-ma.

¹² Kii-makaleleu emi tina maoe-maisim-mala, ma emi osi angol fo, boan-nala makadotok sila,

¹³ nana makatemak ma makatema dila-nggauk-ka, ala moli lai Au leoinang-nga daen dale. Hei, kii-makaleleu emi umam fo, hataholi-la mamana namahoko-seteleen-na, ma kota fo, henuk no makalupu-makaseek-ka!

¹⁴ Nakalenak uma manek-ka, neukose nanala'o elak, ma nusak-ka polon fo, makalupu-makaseek ndia, ana da'di nee-nee lino-linok. Pupukuk ma uma puni madema naneak-kala, lakatetepak lo dae bafan-na, losa dodoon-na.

¹⁵ Tehu neukose, Manetualain mai la'iesa seluk no koasan-na. Soona neukose moo soloka'ek-ka, da'di tina maoe-maisik, ma neukose tina-la, sama leo nula.

¹⁶ Neukose hapu dale ndoos, ma manatao ndoos ma matetuk-ka, nai nusak-ka lala'en-na.

¹⁷ Basa hataholi-la, neukose tao hata fo la'en, nalosa hapu so'da-molek ma tetu-temak losa dodoon-na.

¹⁸ Manetualain anan-nala, neukose latapo'i leme toto'a-tataak-ka mai, ma laso'da lai mamanak fo nee-nee lino-linok, ma mole-dame

^19-20 Maua-manalek nanseli, ba'eneu emi basa-basam-mala, nanahu emi bubu'u-palusam hapu oe, ma emi bana-manum hapu la'a na'u nai mamanak lala'en-na, no nee-nee lino-linok. Tehu emi musum-ma, neukose sama leo nula, fo u'da batu-a tuni la'en, ma sila kotan-na, neukose nanatao nakalulutuk.