Yezekiyele 35 - MUKANDA WA MYIDI MUKULU

Mvidi Mukulu udi ukanyina bena Edome

¹ Maweja-Nangila kungambila ne:

² — Muntu, tangila ku buloba bua Edome budi ne mikuna, utandishe bantu badi basombamu.

³ Ubambile ne: telejayi! Maweja-Nangila Mvidi Mukulu udi unumanyisha ne: “Nennunyoke nuenu bena Edome, nnuleja bukole buanyi. Nennyange ditunga dienu dishale tshipela.

⁴ Bimenga bienu nebishale makolu. Ditunga dienu nedinyanguke kashidi. Nenumanye ne: meme ndi Maweja-Nangila.

⁵ Kuonsu eku nuvua anu bakine bena Izrayele. Pavua baluishi babu babatshimune, bua kubanyoka bua bubi buabu, nuenu nuvua amu nubakengesha ne mvita.

⁶ Nanku meme Maweja-Nangila Mvidi Mukulu udi ne muoyi nennunyoke. Bualu mashi a bantu banudi bashipe adi akeba badi mua kuasombola. Bualu nuvua bashipe kanuyi nupingana panyima. Nanku nebanushipe penu.

⁷ Nennyange ditunga dienu dia Edome, nendishiye tshipela, nshipe muntu yonsu udi upitshilamu.

⁸ Nenguwuje mikuna yenu ne bitalu bia bantu badi bafuila mu mvita pa mikuna, mu bibandabanda ne mu mpongu.

⁹ Nenshiye ditunga dienu tshipela kashidi. Muntu kakusomba kabidi mu bimenga bienu to. Nanku nenujadike ne: meme ndi Maweja-Nangila.

¹⁰ “Nuenu bena Edome nuvua nufuuna ne: ‘Netudie bukalenga mu Izrayele ne mu Yuda. Nebikuate matunga abidi aa, nansha Maweja-Nangila usombamu.’

¹¹ Kadi meme Maweja-Nangila Mvidi Mukulu udi ne muoyi, nennunyoke, bilondeshile tshinyangu, lubabu ne lukinu, binuvua nukengesha nabi bena Izrayele. Padi bantu banyi bamona mundi nnunyoka, nebamanye ne: meme ndi nganyi.

¹² Nanku nenumanye ne: meme Maweja-Nangila ndi mumvue bipendu bienu panuvua nuamba ne: ‘Mikuna ya Izrayele nyetu! Ikadi minyanguke, nanku netuyikuate!’ ”

¹³ Nudi bambunde, kadi meme tshiena mupue bipendu bienu muoyi to.

¹⁴ “Meme Maweja-Nangila Mvidi Mukulu ndi ngamba ne: Nennuvingutule bua kusankisha bena matunga onsu adi pamue nenu.

¹⁵ Nuvua nusanka panuvua numona muvuabu bakengesha bena Izrayele bantu banyi. Nanku nennuenzele penu mushindu awu. Nebanyange mikuna yenu ne ditunga dienu dijima. Nanku, bantu bonsu nebamanye ne: meme ndi Maweja-Nangila.”