Matayi 26 - MUKANDA WA MYIDI MUKULU

Badi belela Yezu tshifufu tshibi

¹ Pasua Yezu mumane kulongesha malu onsu aa, kuambilaye balongi bende ne:

² — Nudi bamanye ne: tshibilu tshia Dipita dia Maweja-Nangila netshikaleku, papita matuku abidi. Nebafile Muana wa muntu bua bamupopele pa mutshi mutshiamakane.

³ Diba adi bamfumu ba batuangaji ne bakulu ba bena Yuda kudisangisha mu lubanza lua mutuangaji munene, dina diende nKayifa.

⁴ Kupungabu diyi bua kukuatshisha Yezu mu budimu, kumushipesha.

⁵ Bavua bamba ne: — Katuena mua kumukuata matuku a tshibilu nansha. Bualu bantu badi mua kujula tshimvundu.

Mukaji udi wela Yezu manananshi mu mutu

⁶ Yezu uvua mu nzubu mua Simone, muena nsudi, mu Betanya.

⁷ Mukaji kampande kufika kudiye ne mulangi wa albatre, muwule ne manananshi a mushinga mukole. Kuelaye Yezu manananshi aa mu mutu pavuaye ku mesa.

⁸ Balongi ba Yezu bamona nanku, kufikabu munda, bamba ne: — Kunyanga bintu nunku bua tshinyi?

⁹ Kabavua mua kusumbisha manananshi aa ku mushinga mukole, kupesha bapele makuta anyi?

¹⁰ Bu muvua Yezu mumanye tshiyuabu bamba, kubabelaye ne: — Nudi nutatshisha mukaji ewu bua tshinyi? Mmungenzele bualu buimpe.

¹¹ Bualu nenuikale ne bapele matuku onsu. Kadi meme kanuakushala nanyi kashidi to.

¹² Udi mungele manananshi aa pambidi, mmulongolole mubidi wanyi bua kuujika bimpe.

¹³ Ndi nnujadikila bulelela ne: pa buloba bujima, miaba yonsu yalongeshabu Lumu lua Disanka elu, nebalondele bantu bivua mukaji ewu muenze. Nanku bantu nebamuvuluke.

Yudase udi utungila Yezu tshitungu

¹⁴ Diba adi umue wa ku balongi dikumi ne babidi, dina diende Yudase Iskariyote, kuyaye kudi bamfumu ba batuangaji.

¹⁵ Kubakonkaye ne: — Nenumpeshe tshinyi pandi mfila Yezu kunudi? Kubalabu nkanu ya tshiamu tshitoke tshia mushinga mukole makumi asatu, kumupeshabu.

¹⁶ Kutuadija ku diba adi, Yudase kukeba muvuaye mua kufila Yezu kudibu, kamuyi lutatu.

Didia dia Mfumu

¹⁷ Dituku dia kumpala mu tshibilu tshia Mampa kaayi mela buanga, balongi kufika kudi Yezu, bamukonka ne: — Udi musue tukulongoluele didia dia Dipita dia Maweja-Nangila penyi?

¹⁸ Yezu kubandamuna ne: — Nuye mu tshimenga kua muntu kampanda, numuambile ne: “Mulongeshi udi wamba ne: diba dianyi didi pabuipi. Meme ne balongi banyi, netuenzele tshibilu tshia Dipita dia Maweja-Nangila kuebe.”

¹⁹ Balongi kuenza muvua Yezu mubambile. Kulongololabu didia dia Dipita dia Maweja-Nangila.

²⁰ Ku dilolu Yezu kusomba ne balongi dikumi ne babidi ku mesa bua kudia.

²¹ Pavuabu badia, Yezu kuamba ne: — Ndi nnujadikila bulelela ne: umue wa kunudi neanyile mu tshitungu.

²² Balongi kunyingalala bikole. Kukonkabu Yezu ku muntu ku muntu ne: — Mfumu, uudi wamba, mmeme anyi?

²³ Yezu kuandamuna ne: — Utuvua bele nende tshianza mu dilongu dimue, ke yeye wampangila.

²⁴ Muana wa muntu neafue, mudi Mikanda ya tshijila kulongesha bualu buende. Kadi muntu wapangila Muana wa muntu, mmuena diakabi. Muntu awu kabavua nansha mua kumulela to.

²⁵ Yudase uvua upangila Yezu, kumukonka pende ne: — Mfumu wanyi, uudi wamba mmeme anyi? Yezu kumuandamuna ne: — Muudi muambe amu mmomu.

Didia dia Mfumu

²⁶ Pavuabu badia, Yezu kuangata diampa, kuela Mvidi Mukulu tuasakidila, kudikosolola, kudiabanyina balongi bende, ubambila ne: — Angatayi, nudie, etshi mmubidi wanyi.

²⁷ Pashishe kuangataye dikopu dia maluvu a nwinyo, kuelaye kabidi Mvidi Mukulu tuasakidila, kudipesha balongi bende, wamba ne: — Nuayi bonsu bidi mu dikopu edi.

²⁸ Bualu mmashi anyi, adi ashindika ndondu udi Mvidi Mukulu utua ne bantu, adibu bapuekesha bua kujimijila bantu bonsu mibi yabu.

²⁹ Ndi nnujadikila ne: kutuadija ku mpindiewu, tshiakunua kabidi nwinyo ewu, too ne ku dituku dinganua nenu nwinyo mupiamupia mu Bukalenga bua Tatu wanyi.

³⁰ Kuimbabu misambu ya tshibilu. Pashishe kuyabu ku mukuna wa Olive.

Yezu udi wambila Petro ne: neumvile

³¹ Ke Yezu kuambila balongi bende ne: — Butuku ebu, nenunyeme bonsu, nunshiye nkayanyi. Bualu mu Mikanda ya tshijila mbafunde ne: “Nenshipe mulami wa mikoku, yoyi neitangalake.”

³² Kadi meme mumane kubika ku lufu, nenye kunuindila mu Ngalileya.

³³ Ke Petro kumuandamuna ne: — Nansha bonsu banyema, bakushiya, kadi meme tshiakunyema to.

³⁴ Yezu kumuambila ne: — Ndi nkujadikila bulelela ne: butuku ebu, tshitala katshiyi tshianji kusama, wewe newikale mumane kunwila misangu isatu ne: tshiena mumumanye to.

³⁵ Petro kumuambila ne: — Kashidi tshiakukuvila ne: tshiena mumumanye to. Nansha bua lufu, netufue nebe. Balongi bakuabu bonsu kuamba kabidi amu nanku.

Mu lupangu lua Ngetsemani

³⁶ Ke Yezu ne balongi bende kufika mu lupangu ludibu binyika ne: Ngetsemani. Kubambilaye ne: — Sombayi apa. Ntshidi mpengama kuaka bua kutendelela.

³⁷ Ke Yezu kuya ne Petro, kabidi ne bana babidi ba Zebede. Kutuadijaye kubungama ne kupampakana.

³⁸ Nanku kubambilaye ne: — Muoyi wanyi udi ne dibungama dia lufu. Shalayi apa. Kanuladi tulu to. Tuikale batabale bonsu.

³⁹ Yezu kupengama katantshi, kudiela mpala panshi, utendelela, wamba ne: — Tatu wanyi, pikalabi mua kuenzeka, ungumushile dikopu edi dia dikenga. Kadi bienzeke muudi musue wewe, kabienzeki mundi musue meme.

⁴⁰ Yezu kupingana kudi balongi bende, kubasangana balale tulu. Kukonkaye Petro ne: — Kanuvua ne bukole bua kushala nanyi batabale nansha bua diba dimue bua tshinyi?

⁴¹ Tabalayi. Tendelelayi, bua kanubuedi mu mateyi. Muoyi wa kuenza bimpe nudi nawu, kadi bukole bua kubikumbaja, kanuena nabu.

⁴² Ke Yezu kuya kutendelela ku luseke musangu muibidi, wamba ne: — Tatu wanyi, bu dikopu edi kadiyi mua kumuka kundi, tshiyi mudinue, bienzeke amu muudi musue!

⁴³ Kupinganaye tshiakabidi kudi balongi bende, kubasangana balale bikole. Mesu abu avua maneme bujitu.

⁴⁴ Yezu kubashiya kabidi, kuya kutendelela ku luseke musangu muisatu, wambulula amu miaku ya momumue.

⁴⁵ Pashishe kupinganaye kudi balongi bende, kubambila ne: — Nutshidi anu balale, bikishe? Monayi diba didibu bafila Muana wa muntu mu bianza bia bantu babi ndimane kukumbana.

⁴⁶ Jukayi! Tuyayi! Tangilayi, muntu udi umfila kudibu, nyeye awu!

Badi bakuata Yezu

⁴⁷ Patshivua Yezu wakula nanku, Yudase, umue wa ku dikumi ne babidi, kufika ne bantu bavule, bikale ne miele, kabidi ne mitshi. Ke bamfumu ba batuangaji ne bakulu ba bena Yuda bavua babatuma.

⁴⁸ Nanku Yudase uvua mupangile Yezu, ukavua mumane kumanyisha bantu ne: “Ungatua mishiku awu, ke yeye unudi nukeba, numukuate!”

⁴⁹ Ke Yudase kufika diakamue kudi Yezu, umuela muoyi: — Mfumu, muoyi awu! Pashishe kumutuaye mishiku.

⁵⁰ Yezu kumuamba ne: — Mulunda wanyi, tshiudi musue kuenza, utshikumbaje lukasa. Nanku bavua Yudase nabu kusemena kudi Yezu, kumukuata, kumulama bikole.

⁵¹ Umue wa ku bavua ne Yezu kupatula muele wende, kutapa muena mudimu wa mutuangaji munene, kumukosa ditshi.

⁵² Ke Yezu kumuamba ne: — Pingaja muele webe mu tshibubu. Bualu yonsu watula muele, neafue ku muele.

⁵³ Kuena mumanye ne: ndi mua kubila Tatu wanyi, Yeye kuntumina amu mpindiewu batumibue bende bapite pa bisumbu dikumi ne bibidi bua kungambuluisha.

⁵⁴ Kadi meme muenze nanku, malu adi mu Mikanda ya tshijila neakumbane bishi? Bualu mu mikanda amu mbafunde ne: bienzeke amu nanku.

⁵⁵ Diba mene adi Yezu kukonka bantu ne: — Nuvua ne bua kufika ne miele ne mitshi bua kunkuata meme anyi? Ndi muivi anyi? Mvua ndongesha matuku onsu mu nzubu wa Mvidi Mukulu, kadi kanuena bankuate to.

⁵⁶ Kadi bionsu abi mbienzeke bua kukumbaja miaku ya bambi idibu bafunde mu Mikanda ya tshijila. Ke balongi bende bonsu kumushiya, kunyema.

Badi baya ne Yezu mu Tshipangu tshikulu

⁵⁷ Bavua bakuate Yezu, kuyabu kumufila kua Kayifa, mutuangaji munene, mu nzubu muvua balongeshi ba mikenji ne bakulu ba bena Yuda basangile.

⁵⁸ Petro uvua ulonda Yezu pa bule, too ne ku lupangu lua mutuangaji munene. Kubuelaye mu lubanza. Kusombaye pamue ne bena mudimu bavua balama tshiibi, bua kumona muakosabu tshilumbu.

⁵⁹ Bamfumu ba batuangaji ne bena Tshipangu tshikulu bonsu, bavua bakeba bualu bua dishima bua kudingila Yezu, bua bamone mua kumufundila tshibawu tshia lufu.

⁶⁰ Kadi nansha muvua bantu bavule bafike bua kumudingila malu, kabakapeta bualu nansha bumue to. Ku ndekelu bantu babidi kufika,

⁶¹ bamba ne: — Muntu ewu uvua wamba ne: “Ndi mua kupula nzubu wa Mvidi Mukulu ewu, kumuibakulula mu matuku asatu.”

⁶² Ke mutuangaji munene kujuka, kukonka Yezu ne: — Kuena wandamuna anyi? Malu adi bantu aba bakujadikila ngwowu anyi?

⁶³ Kadi Yezu uvua amu mupuwe. Ke mutuangaji munene kukonka Yezu ne: — Mu dina dia Mvidi Mukulu udi ne muoyi, ndi nkulomba bua utuandamune, uditshipe. Udi Kristu, Muana wa Mvidi Mukulu anyi?

⁶⁴ Ke Yezu kumuandamuna ne: — Muudi muambe amu mmomu. Kadi ndi nnujadikila ne: kutuadija ku mpindiewu nenumone Muana wa muntu musombe ku dia balume dia Mvidi Mukulu wa bukole buonsu. Nenumumone kabidi upueka mu mavuba a mu diulu.

⁶⁵ Ke mutuangaji munene kudipanda bilamba, wamba ne: — Mmupende Mvidi Mukulu! Katutshiena tukengela bajadiki ba bualu ebu kabidi to! Nudi bumvue amu mpindiewu mudiye mupende Mvidi Mukulu.

⁶⁶ Nudi nukosa tshilumbu tshiende bishi? Kumuandamunabu ne: — Muntu awu mmuena tshibawu! Tshiende ndufu!

⁶⁷ Pashishe bamue kumufuila mate mu mpala, kumututa bisusu. Bakuabu kumukuma mapi,

⁶⁸ bamba ne: — Wewe Kristu, utshinke, utuambile: udi mukutute nnganyi?

Petro udi uvila Yezu

⁶⁹ Petro uvua mu lupangu, musombe pambelu. Muena mudimu mukaji kusemena kudiye, umuamba ne: — Wewe kabidi uvua ne Yezu, muntu wa mu Ngalileya awu.

⁷⁰ Kadi Petro kuyila, bantu bonsu bateleja, wamba ne: — Tshiena mumanye buudi musue kuamba.

⁷¹ Pashishe Petro kuya ku tshiibi tshia lupangu. Mukuabu mukaji muena mudimu kumumona, kuambila bantu bavua kaba aku ne: — Muntu ewu uvua ne Yezu wa mu Nazarete.

⁷² Ke Petro kuyila tshiakabidi, ujadika ne: — Ndi nditshipa ne: Tshiena mumanye muntu ewu to.

⁷³ Kunyima kua katupa, bavua muaba awu, kusemenabu kudi Petro, bamuamba ne: — Bulelela udi umue wa kudibu. Tudi bumvue ku ngakuilu webe kuudi ufuma!

⁷⁴ Ke Petro kuamba ne: — Bu meme nshima, Mvidi Mukulu annyoke! Ndi nditshipa ne: tshiena mumanye muntu ewu nansha! Amu diba adi, tshitala kusamatshi.

⁷⁵ Petro kuvuluka tshivua Yezu mumuambile ne: “Tshitala katshiyi tshianji kusama, newikale mumane kunwila misangu isatu ne: tshiena mumanye muntu awu to.” Ke Petro kupatuka, wenda udila bikole.