Lewitiki 25 - MUKANDA WA MYIDI MUKULU

Tshidimu tshia kulekela kudima

¹ Maweja-Nangila kuambila Moshe ku mukuna wa Sinayi,

² bua amanyishe bena Izrayele mikenji idi ilonda eyi ne: “Diba dinudi nubuela mu ditunga dindi munupeshe, nulekele kudima bikondu bikuabu mu dina dianyi, bua buloba buikishe.

³ Munkatshi mua bidimu bisambombu, nukune biakudia, nusole mionji yenu ya mvinyo, nunowe binuvua bakune.

⁴ Kadi tshidimu tshia muanda mutekete, ntshijidile mu dina dianyi. Kanukunyi biakudia, kanusolu mionji yenu ya mvinyo,

⁵ kanunowi bidimenene bia tshidimu tshishale, nansha tumuma tua mvinyo tua ku mionji inuvua kanuyi basole. Bualu tshidimu atshi ntshianyi tshia tshijila tshia kuikishisha buloba.

⁶ Nenku nuenu ne bapika benu balume ne bakaji, kabidi bena mudimu ne benyi banudi nabu, nudie anu bidimenene bia tshidimu tshia muanda mutekete atshi.

⁷ Bidimenene abi, nebabidie kabidi kudi bimuna bienu, ne kudi nyama ya tshisuku idi mu ditunga dienu.

Tshidimu tshia kupingajilangana bintu

⁸ “Nuindile bikondu muanda mutekete. Tshikondu tshionsu tshikale ne bidimu muanda mutekete. Mmumue ne: bidimu bionsu nebikale makumi anayi ne tshitema.

⁹ Pashishe dituku dia dikumi dia ngondu wa muanda mutekete, dituku dinene dia kukobolola bantu, nenuele mpungi ya disanka miaba yonsu mu ditunga.

¹⁰ Panudi nuela mpungi nanku, nenumanyishe bantu ne: tshidimu tshia makumi atanu etshi ntshia tshijila, tshia kupikula bena ditunga bonsu. Tshidimu atshi, nebatshinyike ne: ntshidimu tshia ‘Mufikilu’ wa disanka. Tshidimu atshi muntu yonsu nebamupingajile maloba ende. Uvua mupika, bupika buende bujike, apingane kuabu.

¹¹ Nenku padi bidimu bikumbana makumi atanu, nuikale nuenza tshibilu tshia ‘Mufikilu’ wa disanka dinene. Kanukunyi biakudia, kanunowi biakudia bidi bidimenene bia tshidimu tshishale, kanupodi tumuma tua mvinyo tua ku mionji inuvua kanuyi basole.

¹² Kadi nunemeke tshidimu tshia makumi atanu, tshia ‘Mufikilu’ wa disanka dinene adi, bualu ntshia tshijila. Nenku nudie anu bintu bidi bidimenene mu madimi enu.

¹³ “Tshikondu tshia ‘Mufikilu’ wa disanka dinene, nebapingajile muntu yonsu maloba ende.

¹⁴ Paudi usumba, nansha usumbisha budimi kudi mukuenu, kumuenzedi bibi to.

¹⁵ Paudi usumba budimi, nansha ubusumbisha, mushinga wabu ulondeshile bungi bua bidimu bidi nabi budimi abu, bituadije ku tshidimu tshia ndekelu tshia ‘Mufikilu’ wa disanka dinene, ne bua bungi bua bidimu bia kunowa bitshidi bishale bua tuetu kufika ku ‘Mufikilu’ mukuabu.

¹⁶ Mushinga wa budimi udi mua kuikala wa bungi, padi budimi butshidi ne bidimu bia kunowa bia bungi. Mushinga wa budimi udi mua kukepela, padi budimi bushale ne bidimu bikese bia kunowa. Nenku babupane bilondeshile bungi bua misangu ya dinowa.

¹⁷ Kanuenzedianganyi bibi to, nunnemeke meme Maweja-Nangila Mvidi Mukulu wenu.

¹⁸ Nulame meyi anyi ne mikenji yanyi bimpe, nuyikumbaje. Nenku nenusombe mu ditunga dienu talalaa.

¹⁹ Buloba nebuike biakudia bivule. Nenudie nukute, nenusombe ku matshi talalaa.

²⁰ “Kadi bumue nenukonkangane ne: ‘Bu mutudi katuyi badime, katuyi banowe mu tshidimu tshionsu tshia muanda mutekete, netupete biakudia bikumbane anyi?’

²¹ Kadi meme Maweja-Nangila ndi ngamba ne: mu tshidimu tshisambombu, nennuvudijile biakudia bia bungi, bikumbane bua bidimu bisatu.

²² Nenku tshidimu tshia muanda mukulu, nenukune biakudia kabidi. Kadi nenuikale nudia anu biakudia bivua bishale bia tshidimu tshisambombu atshi. Nenuikale ne biakudia bikumbane bidi binufikisha too ne ku dinowa dia biakudia bia mu tshidimu tshia tshitema.

Dipingaja maloba kudi benawu

²³ “Kanuena mua kusumbisha buloba bua kashidi to, bualu buloba mbuanyi meme Maweja-Nangila. Nuenu nudi anu bena tshimuangi, benyi badi basombe mu ditunga dianyi meme.

²⁴ Nenku mu ditunga dionsu dindi nnupesha, nenuelele mikenji idi mua kuambuluisha muntu bua apikule madimi ende.

²⁵ “Padi muanenu musue kusumbisha budimi buende, bua dikenga didi dimukuata, anu muena diku ke udi ne mushindu wa kupikula budimi abu.

²⁶ Padi muntu awu kayi ne muena diku diabu, udi mua kubupikula, akebe yeye mene mushindu wa kudipikuilabu nkayende.

²⁷ Nenku neapingajile uvua musumbe budimi abu makuta, bilondeshile bungi bua bidimu bidi bishale too ne ku tshidimu tshia ‘Mufikilu’ mukuabu wa disanka dinene. Padiye upingaja makuta, udi wangata budimi buende.

²⁸ Padi muena budimi kayi ne mushindu wa kubupikula, nebushale kudi uvua mubusumbe too ne ku ‘Mufikilu’ wa disanka dinene. Padi tshidimu atshi tshikumbana, uvua musumbishe budimi buende abu neabuangate.

²⁹ “Padi muntu upana nzubu wa mu tshimenga tshikolesha ne bimana, kapitshishi tshidimu tshijima bua kumupikula to.

³⁰ Padiye kayi umupikula tshidimu atshi, nzubu awu neashale kashidi kudi uvua mumusumbe, kabidi ne kudi ndelanganyi yende. Nenku nzubu awu kabena mua kumupingaja, nansha bobu bafikile mu tshidimu tshia ‘Mufikilu’ wa disanka dinene to.

³¹ Kadi nzubu idi miasa mu misoku idi kayiyi ne bimana bikolesha, badi mua kuyipanyisha mushindu udibu bapanyisha maloba. Badi mua kupikula nzubu wa mushindu ewu tshidimu tshionsu tshidibu basue. Kadi tshidimu tshia ‘Mufikilu’ wa disanka dinene, badi ne bua kupingaja nzubu awu anu kudi muenaye.

³² “Kadi bena Levi, badi mua kupikula nzubu yabu idi miasa mu bimenga biabu bia bena Levi diba dionsu didibu basue.

³³ Nansha bobu basumbe nzubu awu kudi muena Levi mukuabu, mu tshidimu tshia ‘Mufikilu’ wa disanka dinene, badi ne bua kuangata nzubu awu kudi muntu uvua mumusumbishe. Bualu nzubu ayi ke tshintu tshimue tshidi bena Levi natshi mu ditunga dia bena Izrayele.

³⁴ Kadi madimi onsu a bena Levi adi ku mpenga kua bimenga biabu, kabena mua kuapanyisha to, bualu mmamane kushala kashidi anu mu dina dia bena Levi.

Bintu bisombesha bapela

³⁵ “Padi muanenu, nansha muenyi udi mu ditunga dienu, muikale mu dikenga, kayi ne mushindu wa kukumbaja bionsu bivuaye munulaye, numuambuluishe bua asombe nenu bimpe.

³⁶ Kanumutatshishi bua kulomba tshia kasombela to. Nuntshine meme Maweja-Nangila. Numuambuluishe bua asombe nenu bimpe.

³⁷ Nuenu bamusombeshe makuta, kanuena mua kulomba tshia kasombela to. Nuenu bamupe biakudia, kanumulombi bua anupingajile, usakidila ne nsakidilu to.

³⁸ Meme ke uvua munupatule mu ditunga dia Ejipitu, munufikishe mu ditunga dia Kenaane, bua ngikale Maweja-Nangila Mvidi Mukulu wenu.

Dipatula dia bantu mu bupika

³⁹ “Padi muanenu mu dikenga, yeye mudieyeka kunudi bua kunuenzela mudimu, kanumuenzeji mudimu bu mupika to.

⁴⁰ Kadi enze mudimu, apete difutu, bu mudi muena mudimu, nansha bu mudi muenyi udi ku nzubu kuenu, upeta. Anukuatshile mudimu too ne ku tshidimu tshia ‘Mufikilu’ wa disanka dinene.

⁴¹ Tshidimu atshi, numulekele, aye ne bana bende kuabu. Numupingajile kabidi madimi ende.

⁴² Nenku kabena mua kupana bena Izrayele, bu mudibu bapana bapika to. Bualu mbantu banyi, bamvua mupatule mu ditunga dia Ejipitu.

⁴³ Kanuena mua kubakengesha to. Nuleje ne: nudi nuntshina meme Mvidi Mukulu wenu.

⁴⁴ “Panudi basue kupeta bapika balume nansha bakaji, nuye kubakeba anu mu bisamba bikuabu bidi pabuipi nenu.

⁴⁵ Bapika abu, nudi mua kubasumba kabidi ku bana ba bantu benyi badi basomba mu ditunga dienu, nansha mu balela ba benyi abu, badibu balelela mu ditunga dienu. Bantu bonsu aba badi mua kushala bantu benu.

⁴⁶ Benyi abu, nebashale bupianyi bua bana benu. Nebabangate bua bashale bapika babu kashidi. Kadi muntu nansha umue wa kunudi, kena mua kukengesha muanabu muena Izrayele to.

⁴⁷ “Padi muena Izrayele mu dikenga, yeye mudieyeka kudi muenyi udi mupetele biuma mu ditunga dienu, nansha kudi muntu mukuabu wa mu diku dia benyi,

⁴⁸ badi mua kumupikula kudi muena Izrayele umue wa ku bana babu ba tatuende.

⁴⁹ Padiye kayi ne muanabu wa tatuende udi mua kumupikula, nebamupikule kudi tatuende mukuabu, nansha kudi muana wa tatuende mukuabu, nansha kudi muanabu wa mu diku. Nansha yeye muine udi mua kudipikula padiye ne mushindu.

⁵⁰ Kadi padiye musue kudipikula, pamue ne muntu uvua mumusumbe, babale bungi bua bidimu bidi bipite, katshia bamusumbe too ne ku tshidimu tshia ‘Mufikilu’ wa disanka dinene. Nebapuekeshe mushinga wa kudipikula bilondeshile bungi bua bidimu bidiye mulale mu bupika. Nebatshinke difutu dia mudimu uvuaye mukuate bilondeshile difutu didi muena mudimu upeta ku dituku ku dituku.

⁵¹ Padi bidimu bitshidi bia bungi bua kufika ku tshidimu tshia ‘Mufikilu’ wa disanka dinene, neapingaje tshitupa tshinene tshia makuta a mushinga uvuabu bamusumbe nawu.

⁵² Kadi padi bidimu bishala bikese bua kufika ku tshidimu tshia ‘Mufikilu’ wa disanka dinene, muena Izrayele awu neapingaje makuta mashadile, bilondeshile bungi bua bidimu bidi bishale abi.

⁵³ Kadi padi muntu awu musue kushala mu nzubu mua uvua mumusumbe, ikale bu muena mudimu udibu bafuta ku tshidimu ku tshidimu. Kadi nutangile bimpe bua mfumuende kamukengeshi to.

⁵⁴ Padi muena Izrayele awu kayi mua kudipikula, nansha kabayi mua kumupikula yeye ne bana bende, nebabapatule mu bupika tshidimu tshia ‘Mufikilu’ wa disanka dinene.

Meme ndi Maweja-Nangila Mvidi Mukulu wenu

⁵⁵ “Eyowa, bena Izrayele mbantu banyi, bamvua mupatule mu ditunga dia Ejipitu, bua meme kuikala Maweja-Nangila Mvidi Mukulu wabu.