Ezela 1 - Mukanda wa Nzambi Dihungila Dikulukulu ne Dihungila Dihia-dihia 2003

Mukenji wa Kolesha

¹ Mu tshidimu tshia kumudilu tshia Kolesha, mukelenge wa Pelasa, bua kushikishabo dî dia Yehowa diakambeye mukana mua Yelemiya, Yehowa wakatabulusha mutshima wa Kolesha, mukelenge wa Pelasa; nunku yeye wakela mukenji ku nseke yonso ya bukelenge buandi, wakaufunda kabidi ne,

² Kolesha, mukelenge wa Pelasa, udi Wamba ne, Yehowa, Nzambi wa mu diulu, wakumpa makelenge onso a ha buloba; nyeye wakungelela mukenji bua meme kumuashila nsubu mu Yelushalema, udi mu buloba bua Yuda.

³ Nzambi ikale ne yonso wa bantu bandi bonso udi munkatshi muenu, aye ku Yelushalema mu buloba bua Yuda, bua kuashila Yehowa, Nzambi wa Isalele, nsubu, bua yeye udi Nzambi udi mushikame mu Yelushalema.

⁴ Yonso udi ushala mu muaba wonso udiye mushikame, bantu ba mu muaba wandi bamukuatshishe ne argent ne or ne biuma bikuabo ne nyama, ha mutu ha bintu bidi mitshima yabo misue kufila bua nsubu wa Nzambi wa mu Yelushalema.

Dihingana Diabo mu Yelushalema

⁵ Hashishe bakajuka kudi ba ku mutu kua biota bia batatu ba mu Bena Yuda ne bia batatu ba mu Bena Benyamina, ne bakuidi ne Bena Lewi, buonso buabo mene bakadi ne mitshima mitabulushibue kudi Nzambi, bua kuyabo bua kulongolola nsubu wa Yehowa udi mu Yelushalema.

⁶ Bonso bakadi bashikama nʼabo bakakolesha maboko abo ne bintu bia argent ne bia or ne biuma bikuabo ne nyama ne bintu bia mushinga mukole, ha mutu ha bionso biakasuabo kufila.

⁷ Mukelenge Kolesha kabidi wakalua ne malonga akadi mu nsubu wa Yehowa akalua nʼau Nebukadenesâ ku Yelushalema, akadiye muteke mu nsubu wa nzambi wandi.

⁸ Kolesha, mukelenge wa Pelasa, wakalua nʼau mikale mu tshianza tshia Miteledata, mulami wa tshibutshilu, wakâbala kudi Sheshebasâ, muntu munene wa mu Yuda.

⁹ Ebu mbungi buau buakabalabo: malonga a or makumi asatu ne malonga a argent tshinunu ne tuele makumi abidi ne tshitema

¹⁰ ne mpanza ya or makumi asatu ne mpanza ya argent nkama inai ne dikumi ne malonga makuabo tshinunu.

¹¹ Malonga onso a or ne a argent akadi binunu bitanu ne nkama inai. Sheshebasâ wakalua nʼau onso, hakumuka bakadi mu buhika ku Babulona bua kuyabo ku Yelushalema.