Tuma 26 - Tampulma

Pɔɔl Fun Kok O Titi Agripa Suwachak Ni

¹ Agripa fun ŋɔ Pɔɔl ni, “I kpak nyinbaanu a zi kok i titi.” Pɔɔl fun viigi o nin a ŋɔ,

² “Koor Agripa, mu tuha sɔɔni di mu kok mu titi i suwachak ni a li chenani maga Ju tim ta fiksi min chen zinan ni.

³ I zimu nɛnɛ chenani Ju tim ta nyɛn awa chenani ba yaa lagmi dɔŋ ni a sɛm ba amɔrɛ sɛma. N sumi hinu di i kpak kanyita a kinu mu wati.

⁴ “Ju tim ta maga zim chenani mu fun nyɛn mu sɛmbiri pulum awa Jɛrusalɛm ni a li mu bichɛsi ni.

⁵ Ba zimu di mu ya Farisi tim nidigirɛ a li o piili ni. Ba waa kpak si sɛm a jɛɛmi Koosa a kaali kinkin tima. Ju tima ba naa nyɛn bar nɔ daŋni, ba zi ŋɔ hinu di chenani mu sɛm chen ya wutirɛ.

⁶ Koosa funɛ vɔu vɔwiu a nyɛ Ju tim ta nawaalsi ta ni saha digi a ŋɔ o zi wa lɛli nisitɛu a li ba sou ni. Mu kpak bambi bɛgimu a li chenani o fun sɛm ba chen ni. Chendaha i di mu sɛria zinan ni.

⁷ Ya buuri nara fidalɛ ba naa maga yaa jɛɛmi Koosa, kpak bambi bɛgimu a li vɔwi ti ni. Koor Agripa, Ju tim ta fiksi minu i suwachak ni zinan, domi mu gbanko kpak bambi bɛgimnɛ un ni.

⁸ Pɔɔl fun burgi a ŋɔ Ju tima ba naa funɛ chiŋi dooni, ‘Ma Ju tima, o bɔmu di ma se su di Koosa zi wa lɛli nisitɛu a li ba sou ni. Yɛrɛ o bɔm ma ni chen?’

⁹ “O fun burgi a bu ŋɔ Agripa ni, ‘Mu fun lisi di mu zi kpak unu mu bambi ni kinkan di mu chɔk Yesu Nazarɛt nar sɔn.

¹⁰ Koosa dam kɔkɔɔrsi ta funɛ nyɛ min kpok di mu kpaksi Koosa nara ba naa nyɛn Jɛrusalɛm ni, nidamata a tɔ ba dɛ. Ba funɛ di ba sou sɛria, mu gbanko fun la nɔɔni a nyɛ ba.

¹¹ Mu fun gba a go Ju tim ta bar lagmi dɛɛna a lɛrgi Koosa nara ba naa nyɛn dooni, diŋsa a kpaŋi mu titi di mu nyɛ ba bur a li Yesu nyinbaan tiŋi ni. Ba fun nyɛ mu paan si kinkan ka mu kaali tɔ bar bole di mu la nyɛ ba namsi dooni.’ ”

Pɔɔl Fun Ŋɔ Agripa Chenani O Si Su Yesu

¹² “Wuzu digi Koosa dam kɔkɔɔrsi ta fun sɔbi tɔn a nyɛ min di mu kpa la nyɛ Ju tima ba naa nyɛn Damaskus ni. Tɔn ti funɛ ŋɔ ba di ba suŋi min mu la kpaksi Yesu nitiŋɛ ba naa nyɛn dooni.

¹³ Koor Agripa, nha funɛ wa tel sal baan nyuha, mu funɛ nyɛn nyinbaan ni a wa dugli Damaskus. Kundɔŋ fun vaan nyiksi a li buudaha ni a chaani du mu wa ba naa la val chen ni. O funɛ chaaniu a kaali nha.

¹⁴ Ya maga fun chesi tɛɛnɛ ni. Mu fun nu ta ka o ŋɔ min a li Ju tim ta sɛm ni, ‘Sɔɔl, baŋnɛ ii namsi min chen ni? I nyɛ i titi dɛŋarɛ a chi nuwal naa yaa galimi a pa o kunyan chen.’

¹⁵ Mu fun pɛɛsi un, ‘Mu kunyana, anti ya hin?’ O fun ŋɔ min, ‘Min ya Yesu naa i namsi chen.

¹⁶ Si a chiŋi. Mu wa i watiu di mu wa lisi hin i ya mu tumtumna. Mu daŋni i la ŋɔ nara niu chenani i wa min pu dɔŋa zinan awa kin nawara mu zi biksi hin.

¹⁷ Mu zi tim hin ba naa vɛ ya Ju tima watiu a yisi hin a li ba wa Ju tim ta nisa ni.

¹⁸ O chi ba naa vɛ ya Ju tima, ya nyulumwa a nyɛn birsi ni domi sintana dɔ ba. Mu zi nyɛ i la lisi ba a li birsi ti niu a lɛli ba se, chen ni Koosa zi wa dɔ bau. Waa la zi gil ba tum tagna a nyɛ ba a gbaari ba naa o fun lisi a nyɛ o titi ni chen, domi ba se su min.’ Mu kunyan ti fun sɛm chen peti a kaali.”

Pɔɔl Fun Ŋɔ Agripa Chenani O Mɔɔli Koosa Laaboor Weri

¹⁹ “Koor Agripa, mu funɛ tiŋ naa li Koosa tɔhɔn ti ka mu na un a chi mu deesi, nɔ.

²⁰ Mu funɛ te biksi Koosa laaboor weri ti a nyɛ Damaskus tim ni a zi kaali Jɛrusalɛm awa Judia pulum awa ba naa vɛ ya Ju tima a la biksi doonma ni. Mu fun biksi ba di o lawa ba gil ba tum tagnau a bur tiŋ Koosa a tum tum were di ba biksi nara chenani ba tum.

²¹ Mu biksi nɔ daha, Ju tim ta fun kpak min a li Koosa bar jɛɛmi dam ti ni a daŋni ba kpu min.

²² Koosa la suŋi min saha maga. Chenani mu chiŋi i suwachak ni a li ba naa ya nibin birige awa ba naa vɛ ya nibin birige suwachak ni a kok mu titi nan, waa la suŋi min. Mosis awa Koosa witinsi ta fun sɔbi a li Koosa sɛm tɔn ti ni a biksi chenani nara zi wa ya naa Koosa vɔu di o zi wa tum wuzu digi chenu. Ba sɛma awa chenani mu sɛm ya kibɛgimnɛ.

²³ Ba funɛ sɔbiu a ŋɔ di nara wa kpu un, Koosa zi lɛli unu a li o sou ni, chen ni Ju tim ta awa ba naa vɛ ya Ju tima zi na nyinbaanu a gil ba tum tagna a bur a tiŋ un. Nan chi fitinne a chaani ba ni a li birsi ni.”

²⁴ Pɔɔl funɛ kok o titi chene, Fɛstus fun teŋ o nɔ a tɛsi a ŋɔ, “Pɔɔl, i zima kinkan nyɛ i zu galɛŋa.”

²⁵ Pɔɔl fun ŋɔ un, “Festus naa nara nyɛ jirima, mu wara zu galɛŋa. Mu kpak alaafɛu ka mu sɛma ya wuti.”

²⁶ Pɔɔl fun burgi a ŋɔ koor Agripa ni, “Koor Agripa, i zim chenani mu sɛm chen munu. Chendaha mu kpak bambi a sɛm hin. Nara fu zi ŋɔ hin kin nama wɛu, domi a wa funɛ sogli a ya.

²⁷ Koor Agripa, mu zim di i si su chenani Koosa witinsi ta fun sɔbi a li Koosa sɛm tɔn ti ni chenu.”

²⁸ Agripa fun ŋɔ un, “Mu lisi di sɛm tam nɔ i sɛm min nan i daŋni mu ya Yesu nitiŋirɛ.”

²⁹ Pɔɔl fun ŋɔ, “Mu na nyinbaan a sɛm sɛm tama koo sɛm damata, mu zi sumi Koosau di i wa ba naa maga nyɛn bar nɔ nan zi burgi Yesu nitiŋɛu a chi chenani mu ya Yesu nitiŋi, amaa mu wa zi sumi un di ba tɔ ma dɛ a chi chenani ba fun tɔ min dɛ chen.”

³⁰ Doone Agripa awa o haan, Bɛrnisi, awa Fɛstus fun si li. Ba funɛ li peti chene ka nara tima maga pisi.

³¹ Nibin birige nara batora ta funɛ li sal, ba fun ŋɔ dɔŋ ni, “Pɔɔl ha wa tum tum tagin naa la zi nyɛ ba tɔ un dɛ koo a di o sou sɛria.”

³² Agripa fun ŋɔ Fɛstus ni, “O fu vɛ sumi hin di i nyɛ ba kpa un la koorsi ta nyuhu tiina Siiza wati o di un sɛria, i fu zi nyɛ o lau.”