Tuma 21 - Tampulma

Pɔɔl Fun Kaali Jɛrusalɛm

¹ Ya fun li dooni a kpa ya se a zɔŋ pulum naa vɛ zeni ni ka ni go un. Ba yir un Kɔs. Chɔɔsa funɛ wa pisi, ya fun li dooni a kaali pulum naa ba yir Rood ka ni vɛɛn go o gbanko. Ya fun li dooni a kaali tɔhɔn naa ba yir Patara.

² Ya fun li arŋ ti ni dooni a la zu arŋ naa la daŋni o la Fonisia pulum. Ya fun li Patara ni,

³ a la gali Saiprus pulum naa ni go ka o nyɛn ya ningal ni a la tel Taaya a li Siiriya pulum ni. Bun tima arŋ ti fun chuŋi chen funɛ ya doon kinawa. Ya fun gil arŋ ti,

⁴ a dɛu Yesu nitiŋɛ a nyɛn ba wati wuzu bunɔpɛ. Koosa siim weri ti fun nyɛ ba ŋɔ Pɔɔl ni di o ta la Jɛrusalɛm.

⁵ Arŋ ti funɛ bu saksi di o si, ba wa ba haanasa awa ba bisa fun tiŋ ya a la li ni ti nɔ a gbiri a sumi Koosa.

⁶ Ya fun chausi ba a bu zu arŋ ti ka ba bur kaali dama.

⁷ Ya fun li dooni a tiŋ ni nɔ kaali tɔhɔn naa ba yir Tɔlimeis. Ya fun bu gil arŋ ti dooni a la zaami Yesu nitiŋɛ ta a nyɛn ba wati wuzu bɛgim.

⁸ Chɔɔsa funɛ wa pisi, ya fun bu zu arŋ ti a li dooni a kaali Siizaria. Ya fun gil arŋ ti a la zu Filip dama a nyɛn o wati. Waa yaa funɛ biksi Koosa laaboor weri ti a nyɛ nara ni. O funɛ ya nara banɔpɛ ta digirɛ Yesu nitiŋɛ ba naa nyɛn Jɛrusalɛm ni fun lisi di o nyini ba malɛ ta.

⁹ O funɛ kpak nihabichɛsa nara banaasiwa ba gbaari un ni a biksi nara Koosa laaboor weri ti wɛ. Ba ha wa fun yu baalasa.

¹⁰ Wuzu bilɛ gantɛl ni Koosa witiinsi ta digi fun li Judia pulum a wa. O sɔn funɛ ya Agabus.

¹¹ O fun kaali Pɔɔl wati a la ŋɔ un di o kpa o chɛra kikirisa a nyɛ un. Pɔɔl fun kpa a nyɛ un. Agabus fun kani a kpa un a vɔu o nisa awa o naŋgere a ŋɔ, “Ma nu chenani Koosa siim weri ti fun ŋɔ minu. Chɛra kikirisi nɔ tiina la tel Jɛrusalɛm, Ju tima ba naa nyɛn dooni, zi wa vɔu unu a chi chenani mu vɔu mu titi nan, a kpa un a du ba naa vɛ ya Ju tim nisa ni.”

¹² Ya funɛ nu o sɛm ta, ya wa ba naa funɛ nyɛn dooni, fun sumi Pɔɔl di o ta la Jɛrusalɛm.

¹³ O fun ŋɔ ya, “Yɛrɛ ma nyɛ mu wɛ muksi ma a nyɛ mu bambi buti? N saksɛu di ba kpak min a vɔu ya kunyan Yesu daha. Hali mu saksɛu di mu sou a nyɛ un.”

¹⁴ Ya zim di ya sɛm na wa zi nyɛ o gil laali, ya fun ŋɔ un, “I zimɛɛ di ya kunyana daŋni i ya chen, o deŋlu wa i ya chen.”

¹⁵ Wuzu bilɛ gantɛl ni, ya fun lagmi ya kina a kaali Jɛrusalɛm.

¹⁶ Yesu nitiŋɛ ba naa funɛ nyɛn Siizaria ni, bɔnɛ fun gbaari ya ni a kaali. Ya funɛ la tel Jɛrusalɛm, ba fun te ya suwachak a kpa ya a la baal naa ba yir Manasɔn, dama di ya nyɛn dooni. O funɛ li Saiprus pulum nɛ ka o se su ya kunyan ti a vusi.

Pɔɔl Fun La Zaami Jems Jɛrusalɛm Ni

¹⁷ Yesu nitiŋɛ ba naa nyɛn Jɛrusalɛm ni fun la ya du num num ni.

¹⁸ Chɔɔsa funɛ wa pisi, ya wa Pɔɔl fun kaali a la zaami Jems. O wa Yesu nitiŋɛ nihɛɛti ta maga funɛ lagmi dɔŋa a kani.

¹⁹ Pɔɔl fun zaami ba maga a ŋɔ ba chenani maga Koosa fun suŋi un di o tum a nyɛ ba naa vɛ ya Ju tim ni.

²⁰ O funɛ sɛm peti, Jems awa nihɛɛti ta fun pɛgi Koosa chenani o tum chen daha. Ba fun ŋɔ Pɔɔl ni, “Ya niinbe, i zimu di Ju tima ba naa nyɛn bar nɔ, tusugsa funɛ nyɛ ya se su ya kunyan ti a kpak un ba bambe ni kinkan di ba tiŋ ba chiksɛ ta.

²¹ Nara funɛ ŋɔ ba chenani i yaa biksi Ju tima ba naa nyɛ ba se su ya kunyan ti ka ba nyɛn bar boli ni di ba ta bu tiŋ ba chiksɛ ta. I gbanko yaa biksi bau di ba ta bu teŋsi ba bisa a ta bu tiŋ ba nawaalsi ta nyinbaan.

²² Nara nama zi nu i wɛu a daŋni ba wa zaami hin. Ya wara daŋni i wa ba wa di amɔrɛ kpok.

²³ Adaha tiŋ chenani ya kaa ya ŋɔ hin. Nara banaasi nyɛn ya ni a vɔu vɔwi a nyɛ Koosa ni di ba zi tiŋ unu nɛnɛ a gbaari.

²⁴ Kpa i titi a gbaari ba ni a nyɛ nara chaksi ma wa ni ni a funi ma nyuuna a biksi nara di Koosa la chaani ma bambe ni o suwachak ni. Bɔ a nyɛ ma maga ni, chen ni nara maga zi zimu di chenani ba sɛm i wɛ chen wa ya wuti. Ba gbanko zi zimu di i ha wa gil ya chiksɛ ta tiŋi.

²⁵ Ya funɛ piin sɔbi tɔnu a nyɛ ba naa vɛ ya Ju tim ni a nyɛ ba se su Yesu. Ya funɛ ŋɔ bau di ba ta di vursi diwe a ta se nɛmɛ naa ba vɛ kɔrigi o li chɛl a ta tum chɔkumsi tuma.”

²⁶ Chɔɔsa funɛ wa pisi Pɔɔl fun la gbaari nara tima ni a nyɛ nara chaksi ba wa ni ni a biksi nara di Koosa la chaani ba bambe ni o suwachak ni. Doone ba fun la zu Koosa bar jɛɛmi dam ti a ŋɔ Koosa dam kɔkɔɔrsi ta ni di wuzu bunɔpɛ wuzu ba zi wa kɔɔri kɔɔra a nyɛ Koosa ni a biksi nara di chenani o funɛ chaani ba bambe ni chen mak o bɔu.

Ju Tima Fun Kpak Pɔɔl Koosa Bar Jɛɛmi Dam Ni

²⁷ Wuzu bunɔpɛ ta funɛ wa dugli peti, Ju tima ba naa funɛ li Azia pulum, bɔnɛ fun na Pɔɔl a li Koosa bar jɛɛmi dam ti ni. Ba fun nyɛ ba naa maga nyɛn dooni chen dam a la kpak un.

²⁸ Ba fun tɛsi a ŋɔ, “Ma Ju tima, ma wa suŋi ya. Baal naa ya kpak nan, waa ya naa yaa biksi nara bar damati ni di Ju tim ta, ba chiksɛ ta awa Koosa bar jɛɛmi dam nɔ ya yɔrirɛ. Hali lalaknɔ o kpa ba naa vɛ ya Ju timwa a wa zu bar nɔ a chɔk doonani Koosa fun lisi a nyɛ o titi ni chen.”

²⁹ Ba funɛ piin te na Pɔɔl awa Trofimus naa li Ɛfɛsus ni ka ba lagmi a gba tɔhɔn ti ni. Ba fun baa di Pɔɔl kpa un a wa zu Koosa bar jɛɛmi dam ti. Chendaha ba fun ŋɔ chen.

³⁰ Ba naa funɛ dam chen nidamata fun pisi a su tɔhɔn ti maga. Ba naa funɛ ka a vɛ li dam ti tuha fun chɔ la lagmi dɔŋ ni a li doonani ba kpak Pɔɔl chen a suŋi ba ba lɛrgi un a li sal. Nara tima wa Pɔɔl fun kaali, ba naa la il Koosa bar jɛɛmi dam ti fun vaan far bulzɔɔnɔ.

³¹ Zɛmɛ ta funɛ saksi di ba kpu Pɔɔl chene, nandigi fun chɔ a la zini a ŋɔ Roman tim lanjimasa nihɛɛ nyuhu tiin ni di Jɛrusalɛm tim maga funɛ damu.

³² O wa o lanjimasa awa ba nihɛɛta fun vaan chɔ tu a la doonani zɛmɛ ta tuk Pɔɔl chen. Zɛmɛ ta funɛ na lanjimasa nihɛɛ nyuhu tiin ti ka o wa o lanjimasi ta wa, ba fun gil Pɔɔl tuki.

³³ Lanjimasa nihɛɛ nyuhu tiin ti fun ŋɔ o lanjimasi ta ni ba kpa zɔglɛ abalɛ a vɔu Pɔɔl a burgi pɛɛsi zɛmɛ ta, “Anti ya baal nɔ? Baŋnɛ o tum?”

³⁴ Nara tima bɔnɛ fun tɛsi a ŋɔ wu digi. Ba bɔnɛ ka fun tɛsi aa sɛm kundɔŋ. Chɛɛm ti fun lagmi dɔŋ ni o vɛ nu chenani ba sɛmi. Nan daha o fun ŋɔ o lanjimasi ta ni di ba kpa Pɔɔl a la zu ba dam kpok naa nara vɛ zu yɔri.

³⁵ Saha naa ba wa un fun la tel naŋgere bar nɔsɛ ta, zɛmɛ ta funɛ zaksi dɔŋa a gbaari di ba la pu Pɔɔl a la un. Lanjimasi ta fun zer un a tɛ buudaha ni, chen ni ba zi kpa unu a tel ba dam kpok ti.

³⁶ Zɛmɛ ta funɛ chɛɛmi kinkan a ŋɔ, “Ma nyɛ ya kpu un.”

Pɔɔl Fun Kok O Titi Zɛmɛ Suwachak Ni

³⁷ Lanjimasi ta awa Pɔɔl funɛ la dugli zuuli, Pɔɔl fun burgi a ŋɔ lanjimasi ta nihɛɛ nyuhu tiin ti ni, “I zi nyɛ mu sɛm hin wu digiuu?” O fun ŋɔ un, “Mu wa zim di i sɛm Girik tim sɛm tau.

³⁸ Wuzu bu mɛna gantɛl ni Ijipt tim baal digi fun wa lagmi nara tusugsa naasi a li nyabaan ni a nyɛ ba laal kicheme di ba chem ya. Mu funɛ baa di i wa un ya nibɛgimnɛ.”

³⁹ Pɔɔl fun ŋɔ un, “Ju tima lul min tɔ birigi naa ba yir Taasus a li Sailisia pulum ni. Mu sumi hinu, nyɛ mu sɛm a nyɛ zɛmɛ ta ni.”

⁴⁰ Lanjimasi ta nihɛɛ nyuhu tiin ti fun nyɛ un nyinbaan. Pɔɔl fun chiŋi naŋgere bar nɔsɛ nyuhu ti ni a viigi o nin di zɛmɛ ta gil chɛɛma. Ba fun moori ka o sɛm sɛma a nyɛ ba a li Ju tim sɛm ni.