Tuma 17 - Tampulma

Pɔɔl Fun Kaali Tɛsalɔnika

¹ Ba fun la gali tɔsa naa ba yir Amifipolis awa Apolonia a la tel tɔhɔn naa ba yir Tɛsalɔnika. Ju tim ta funɛ kpak ba bar lagmi dɛrɛ dooni.

² Pɔɔl yaa fun la jɛɛmi Koosa Ju tim ta bar lagmi dɛɛni nɛɛ. Chendaha ba hiisi wuzu ti funɛ wa tel, o kaali a la zu ba bar lagmi dɛ naa nyɛn dooni. O fun lisi Koosa sɛm tɔn ti bar digi o wa ba di doonmani mun amɔrɛ. Hiisi wuzu bilɛ tiina funɛ vɛɛn wa tel, o fun vɛɛn ya chen.

³ O fun biksi ba di Yesu ya Kristo naa Koosa fun ŋɔ di o zi wa tumu wuzu digi chen a karimi Koosa sɛm tɔn ti bar digi doonani ba fun sɔbi di o zi wa namsiu a sou ka Koosa lɛli un a li o sou ni.

⁴ Ju tim ta bɔnɛ se funɛ suu di chenani Pɔɔl sɛm chen ya wutirɛ a chiŋi o wa Sailas gantɛl ni. Girik tima ba naa funɛ jɛɛmi Koosa awa nihaana ba naa ya nibirige nidamata gbanko funɛ ya chene.

⁵ Ju tima ba naa funɛ ka chen funɛ di handɔta a du Pɔɔl awa Sailas ni. Ba fun lagmi ba naa chiŋi a ya yɔri a li yau ni a nyɛ ba dam tɔhɔn ti. Ba fun lisi di Pɔɔl awa Sailas nyɛn baal naa ba yir Jesɔn dam nɛ a wa chɔk dam ti di ba lisi ba a li zɛmɛ ta suwachak.

⁶ Ba funɛ vɛ na ba, ba fun kpak Jesɔn awa Yesu nitiŋɛ ta bɔnɛ a zaksi ba a la tɔhɔn ti nihɛɛta suwachak a tɛsi a ŋɔ, “Doonani nara nama la, ba yaa muksi narawa kinkan. Lalaknɔwa ba tel ya tɔha,

⁷ a zu Jesɔn dama a nyɛn doon. Ba waa chɔk chiksɛ naa koorsi ta nyuhu tiina Siiza fun kpa nyɛ ya. Hali ba yaa biksi di ba kunyana Yesu ya koorsi ta nyuhu tiina a chi un.”

⁸ Tɔhɔn ti nihɛɛti ta awa zɛmɛ ta funɛ nu ba sɛma, o fun muksi ba kinkan.

⁹ Nihɛɛti ta fun nyɛ Jesɔn awa Yesu nitiŋɛ, ba naa ba kpa wa ba wati, fun bɔ malɛ a nyɛ ba kaali.

Pɔɔl Fun Kaali Bɛrɛa

¹⁰ Dusum funɛ wa biri, Yesu nitiŋɛ ta fun tum Pɔɔl awa Sailas a li tɔhɔn naa ba yir Bɛrɛa. Ba fun la tel doon a la zu Ju tim ta bar lagmi dɛ.

¹¹ Ba naa nyɛn dooni chen, bambe funɛ puku a kaali ba naa nyɛn Tɛsalɔnika ni, domi ba funɛ kpak un ba bambe ni di ba nu chenani Pɔɔl kaa sɛm. Wuzu kam ba yaa fun karimi Koosa sɛm tɔn tiu di ba na chenani Pɔɔl biksi ba chen ya wutirɛ.

¹² Ju tim ta awa nibaala wa nihaan birige, ba naa maga ya Girik tima nidamata, fun nyɛ ba se su Koosa laaboor weri ti.

¹³ Ju tima ba naa funɛ nyɛn Tɛsalonika ni, funɛ nu di Pɔɔl biksi Koosa laaboor weri ti a nyɛ Bɛrɛa tim ta ni, ba bɔnɛ fun wa gbaari Bɛrɛa tim ta ni a lagmi zɛmɛ di ba dam tɔhɔn ti.

¹⁴ Ya niinbisi ta fun vaan lisi ba bɔnɛ a li ba ni di ba wa Pɔɔl kila ni nɔ. Sailas awa Timoti fun kpalimi Bɛrɛa ni.

¹⁵ Ba funɛ tel tɔhɔn naa ba yir Atɛns, Pɔɔl fun tum ba naa tiŋ un chen, ba bur kaali Bɛrɛa di ba la ŋɔ Sailas awa Timoti ni di ba wa gbaari un ni lalaga.

Pɔɔl Fun Nyɛn Atɛns

¹⁶ Pɔɔl funɛ pɔ di ba wa gbaari un ni, o fun gba a go tɔhɔn ti a na di vursu damata funɛ nyɛn dooni.

¹⁷ O yaa fun la zu Ju tim ta bar lagmi dɛ a biksi ba awa ba naa vɛ ya Ju tima a la jɛɛmi Koosa, Yesu wɛ. O biksi ti fun nyɛ ba wa un di amɔrɛ. O gbanko yaa fun la yawa a ŋɔ ba naa chiŋɛɛ di ba nu o sɛm ta.

¹⁸ Nibiksɛ ba naa ba yir Ɛpikurian awa Stɔik wa Pɔɔl gbanko funɛ di amɔrɛ. Ba bɔnɛ fun ŋɔ dɔŋ ni, “Nyu bilim tiin nɔ wa zim chenani o biksi chen mun.” Ba bɔnɛ ka fun ŋɔ dɔŋ ni, “O chi o biksi vursa a naa hɔɔra nyɛ a jirima wɛwa.” Ba funɛ sɛm chene, domi Pɔɔl funɛ biksi ba Yesu wɛ awa chenani Koosa fun lɛli un a li o sou ni.

¹⁹ Tɔhɔn nihɛɛta yaa lagmi a li kuŋkule nyuhu naa ba yir Arɛɔpɔgus ni. Nibiksɛ ta fun kpa Pɔɔl a kaali ba suwachak a ŋɔ un, “Ya maga daŋni i ŋɔ ya i biksi fali ŋɔ wɛu.

²⁰ Ya ha wa nu un. Chendaha yaa daŋni ya zim o mun.”

²¹ Atɛns tima awa hɔɔra ba naa nyɛn dooni, maga funɛ kpa ba saha magawa a sɛm sɛma awa biksi fali ti tiŋ gantɛl a wa chen wɛ.

²² Pɔɔl fun chiŋi dooni a ŋɔ nihɛɛti ta awa nibiksɛ ta, “Ma Atɛns tima, mu zimu di ma daŋni vursau kinkan.

²³ Mu funɛ valu a go ma tɔhɔn ti a na ka ma nyɛ a jirima. Hali mu fun na digi ka nandigi sɔbi un ni, ‘Koosa naa ya vɛ zimi nɛɛnɛ.’ Koosa naa ma nyɛ jirima a vɛ zimi nan, o wɛwa mu kaa ŋɔ ma nan.

²⁴ Koosa funɛ naami tɛɛnɛ nɔ maga awa kin naa maga nyɛn un ni a dɔ o wa buudaha. Chendaha o wa koti a nyɛn dam naa nibinsa sa a nyɛ un ni.

²⁵ Waa kpa miisa a nyɛ kihiisɛ maga ni a la nyɛ nibinsa kin naa maga ba daŋni. O wara daŋni kundɔŋ a li nibinsa wati ba zi nyɛ un.

²⁶ Koosa funɛ te naami nibaal bɛgimnɛ. O tuhu nɛɛ nibinsa maga li a purigi a pisi a su tɛɛnɛ nɔ maga. O fun te lisi ba bar nyɛni wɛ awa saha naa ba zi li dooni a zi naami ba.

²⁷ O funɛ ya chene, chen ni ba zi na nyinbaanu a dɛu un a na. O wa ya wa bol dɔŋ ni.

²⁸ Nandigi funɛ sɔbi chen wɛ saha digi a ŋɔ, ‘Koosa kpa o kpok ti a du ya ni, chen ni ya zi koti nyɛnu.’ Ma walɛ ta digi funɛ sɔbi a ŋɔ di, ‘Ya ya o bisiwa.’

²⁹ Chenani o fun sɛm chen ya wuti, ya wa zi lisi di nara zi kpa salma akoo aniita koo buŋkul a naami vura wa nɛha ni a ŋɔ di waa chen.

³⁰ Hali saha nɔ Koosa wa fun lɛrgi ba naa vɛ zim o wɛ diŋsa, amaa o fun ŋɔ ba naa nyɛn bawu maga ni lalaknɔ di ba gil ba tum tagna a bur tiŋ un.

³¹ O fun lisi a wuzu naa o nyɛ naa o fun lisi chen wa di tɛɛnɛ nɔ tim maga sɛria. Koosa fun lɛli Yesu a li o sou ni di o biksi ya di waa ya naa la zi tum chen.”

³² Nihɛɛti ta awa nibiksɛ ta bɔnɛ nu ka Pɔɔl sɛm di Koosa funɛ lɛli Yesu a li o sou ni, ba funɛ mɔmsi un. Bɔnɛ ka fun wa ŋɔ un, “Ya daŋni i bur wa biksi yau a gbaari.”

³³ Doone Pɔɔl fun gil ba.

³⁴ Ba naa funɛ nyɛn dooni chen bɔnɛ nyɛ ba se su Koosa a chiŋi Pɔɔl gantɛl ni. Ba bɔnɛ sɔna funɛ ya Diɔnisius naa ya tɔhɔn nihɛɛti ta digi, awa Damaris naa ya nihaan.