Mat. 4 - Tampulma

Sintana Fun Zaamsi Yesu

¹ Wuzu digi Koosa siim weri ti fun te Yesu suwachak a kaali kɔha. Sintana funɛ daŋni o la pu Yesu dooni a zaamsi un.

² Yesu wa fun di diwe dooni wuzu fumnaasi ka lɔsa fun kpak un kinkan.

³ Sintana fun wa zaamsi un a ŋɔ, “I sir ya Koosa be, nyɛ buŋkul na burgi diwe i di.”

⁴ Amaa Yesu wa fun la nɔɔni a ŋɔ un, “Ba funɛ sɔbiu a li Koosa sɛm tɔn ti ni saha digi a ŋɔ, ‘Nibine tiŋ Koosa ŋɔ wa ya kibirigi a kaali diwe naa o di.’ ”

⁵ Ba fun li dooni ka sintan ti fun kpa Yesu a la zini zɔŋ Koosa bar jɛɛmi dam mampil nyuhu ni a li Jɛrusalɛm ni,

⁶ a ŋɔ un, “I sir ya Koosa be, li mampil nɔ nyuhu ni a chel tɛɛnɛ ni. I zim di ba funɛ sɔbiu a li Koosa sɛm tɔn ti ni a ŋɔ, ‘O malaikasi ta go hinu. O zi ŋɔ au di a kpa a nisa a chak hin, chen ni i chiksi tɛɛnɛ ni, i naŋgere wa zi huusi.’ ”

⁷ Yesu fun ŋɔ un, “Ba gbanko funɛ sɔbiu a li Koosa sɛm tɔn ti ni a ŋɔ, ‘O wa lawa i zaamsi i kunyan Koosa.’ ”

⁸ Ba fun bu li dooni, ka sintan ti fun kpa Yesu a zini bi ziŋziŋi nyuha a biksi un tɛɛnɛ maga tɔsa awa a jirima kinkan.

⁹ Sintan ti fun ŋɔ un, “I gbiree a jɛɛmi min, n zi nyɛ i wa dɔ a magau.”

¹⁰ Yesu fun ŋɔ un, “Sintana, kila a ka min. Ba funɛ sɔbiu a li Koosa sɛm tɔn ti a ŋɔ, ‘Kijɛɛmi i kunyan Koosa a tum aa nyɛ o duŋduŋ ni.’ ”

¹¹ Sintan ti funɛ nu o sɛm ta, o fun kaali a ka un. Doone Koosa malaikasa fun wa suŋi Yesu.

Yesu Fun Piili A Biksi Nara

¹² Wuzu digi ba fun kpak Jɔn a tɔ un dɛ. Yesu funɛ nu chenani yɛɛ, o fun si a kaali Galili pulum.

¹³ O funɛ wa li Nazarɛt a gali a la nyɛn tɔha naa ba funɛ yir Kapɛrnaum ni. Tɔha nɔ funɛ nyɛn Galili bɛɛŋ nɔ nɛɛ. Zɛbulun awa Naftalai tima koora funɛ dɔ un.

¹⁴ Yesu fun la dooni di chenani Koosa witiina Azaaya fun sɔbi a li Koosa sɛm tɔn ti ni chen ya wuti.

¹⁵ O fun ŋɔ, “N daŋni mu sɛm ma Galili pulum bar digi naa Zɛbulun awa Naftalai tima koora dɔ wɛwa. O nyɛn Jɔɔdan jibaŋ kinkin ti tɛɛnɛ nɛɛ a la bɛɛŋ zen ti wati. Ba naa vɛ ya Ju tima nidamata nyɛn dooni.

¹⁶ Ma waa vɛ zim Koosa a la tum tum tagna saha maga. O chi ma nyɛn birsi nɛɛ, amaa lalaknɔ chɔɔsa pisu ma wati.”

¹⁷ Saha ti kpa la Yesu yaa fun la biksi nara a ŋɔ ba, “Ma gil ma tum tagna a burgi tiŋ Koosa nyinbaan. Saha ti duglɛu di Koosa dɔ nara.”

Yesu Fun Yir Nyinkpaksa Nara Banaasi

¹⁸ Yesu funɛ val Galili bɛɛŋ nɔ ni, o fun na nara balɛ, Simɔn awa o niinbe Andiru ka ba yo cham bɛɛŋ ti ni.

¹⁹ Yesu fun yir ba a ŋɔ, “Ma si a wa tiŋ min. Ma tum ya nyinsa kpaksirɛ hali wa zinan, amaa lalaknɔ mu kpa tum fali a nyɛ ma di ma nyɛ nara wa tiŋ min.”

²⁰ O fun vaan sɛm chen, ba fun gil ba chamna a si tiŋ un.

²¹ O funɛ bu kaali suwachak tama, o fun na niinbisa ba nara balɛ, Jems awa Jɔn, Zɛbɛdi bisa. Ba wa ba nyana funɛ nyɛn ba arŋ tuhu ni a kɔɔri ba chamna. Yesu fun a yir ba.

²² Ba fun vaan gil ba nyana awa arŋ ti aa tiŋ un.

Yesu Funɛ Biksi A La Tiibi Wichɔɔrsa

²³ A saha tirɛ Yesu fun a gba Galili maga a zu ba bar lagmi dɛɛna aa biksi nara Koosa laaboor weri naa o zi wa dɔ ba wɛ. O gbanko funɛ tiibi wichɔɔrsa bawu maga ni a nyɛ ba.

²⁴ O laaboora fun pisi a su pulum naa ba funɛ yir Siiriya chen, chen ni ba naa funɛ nyɛn dooni, ba fun kpa wichɔɔrsi ta a wa di o tiibi fun nyɛn ba. Alizin tagna funɛ kani nara tima bɔnɛ nyuhu ni, kigbimgbiŋsa ka fun nyɛn ba bɔnɛ ni, ba bɔnɛ nisa awa naŋgere ka fun siti. Yesu fun tiibi ba maga.

²⁵ Zɛmɛ kinkan fun tiŋ un a li Galili pulum awa Dɛkapɔlis pulum, Jɛrusalɛm, Judia, awa Jɔɔdan mɔɔga jibaŋ digi ni.