1 Kɔr. 6 - Tampulma

O Lawa Ma Titirɛ Di Ma Kina Sɛria

¹ Ma naa ya Yesu nitiŋɛ nan ka ma wa ma dɔŋtima kpak dɔŋa, baŋnɛ maa yaa vɛ kpa la Yesu nitiŋɛ ta wati ba la di ma sɛria? Amaa ma yaa la ba naa vɛ tiŋ Yesure. Chen deŋluu?

² Ma wa zim di wuzu digi Yesu nitiŋɛ ta zi wa di tɛɛnɛ nɔ tim maga sɛriauu? Ma kaa wa ya chen wuzu digi, yɛrɛ ma vɛ koti a di wu wisa sɛria lalaknɔ?

³ Ma wa zim di wuzu digi Yesu nitiŋɛ ta zi wa di malaika tagna sɛriauu? Ma kaa wa ya chen wuzu digi, yɛrɛ ma vɛ koti a di ma nyɛni kina sɛria?

⁴ Ma wa ma dɔŋtima kpak dɔŋa, ma yaa la ba naa vɛ ya Koosa nara di ba di ma sɛria.

⁵ Chen deŋluu? Hiisa wa kpak ma. Ma wa kpak nibin nɛɛgɛ ba naa la zi koti a kɔɔri ma wu wisa a li ma nii?

⁶ Ma naa ya Yesu nitiŋɛ ta yaa kpa dɔŋa a la sɛria bar diili dɛ di ba naa vɛ tiŋ Yesu di ma sɛria.

⁷ Chenani maa kpa dɔŋa a la sɛria bar diili dɛ ti nan, biksi di ma galimu. Ma wa ma dɔŋtima kpak wu digi, hali ba ŋmɛ ma kundɔŋ, ma gil un a nyɛ ba la. Waa bɔɛɛ wa ma kpa dɔŋa a la sɛria bar diili dɛ ti.

⁸ Ma tum tum tagniwa a du dɔŋ ni a la ŋmɛ dɔŋa kina. Chene maa ya a nyɛ ma dɔŋtima ta ni.

⁹ Ma wa zim di nibin tagna wa kizu Koosa koor tii? Ma mur ma titirɛ. Ba naa la tum chɔkumsa tuma a la nyɛ vursa jirima, a la daŋni nihaana yɔri yɔri,

¹⁰ a la ŋmɛ, a kpa malɛ a burgi ba kina, a la nyɔ sin a dɛɛsi, a la chɔk nara sɔna a la fuksi nara a la kpaksi nara kina kpok ni, ba nidigi wa kikoti a zu Koosa koor ti.

¹¹ Ma bɔnɛ funɛ ya chene, amaa lalaknɔ Koosa funɛ chaksi ma tum tagnau a li ma ni. Koosa dɔ ma. Ma wa bu kpak galimsa o wati Yesu Kristo awa Koosa siim weri ti tum daha.

Ma Kpa Ma Bara Aa Nyɛ Koosa Jirima

¹² Ma bɔnɛ yaa ŋɔ dɔŋ ni, “Ya kpak nyinbaanu ya ya kina maga ya daŋniu.” Amaa mu ŋɔ ma di kina maga la ta wer wa ya. Ya wa zi la nɔɔni a nyɛ kin nama dɔ ya.

¹³ Ma bɔnɛ gbanko sɛm dɔŋ ni, “Lo daha diwe nyɛn. Diili daha lo gbanko nyɛn.” Amaa wuzu digi Koosa zi wa chɔk a magau. Ya bara wa nyɛn chɔkumsa tuma daharɛ. Ya kunyan daharɛ a nyɛn. Ya kunyan ti gbanko dɔ ya bara di ya kpa a aa tum a nyɛ un.

¹⁴ Koosa funɛ lɛli ya kunyan ti a li o sou ni. Chene o zi wa kpa o kpok ti a wa lɛli ya gbanko.

¹⁵ Ma wa zim di ma bara ta ya Kristo bara luk pɛksiwaa? Mu kpa Kristo bara luk pɛkha a la lagmi a chɔ nihaan sakaal, chen weruu? Aai.

¹⁶ Ma wa zim di nar wa sakaal chɔ, ba bara ya nibɛgimnɛɛ? Koosa sɛm tɔn ti biksi ya nan wɛ, a ŋɔ, “Nara balɛ lagmi dɔŋ ni a chɔ, a burgi nibɛgim.”

¹⁷ Amaa ba naa wa ya kunyan ti ya nibɛgim, ba siimsa gbanko ya kibɛgimnɛ.

¹⁸ Adaha ma chɔ li doonani chɔkumsi nyɛn. Wu tagin maga naa nara tum, a wa ya ba barawa baa ya chen. Amaa nibine naa la daŋni nihaana yɔri yɔri, o chɔk o titi barawa.

¹⁹ Ma wa zim di ma bara ya Koosa siim weri ti bar nyɛnirɛɛ? Koosa funɛ kpa o siim weri ti a nyɛ ma.

²⁰ Ma wa dɔ ma titi, domi Koosa yau ma o titi. Ma yawi funɛ iiu kinkan. Adaha ma doso a kpa ma bara ta aa nyɛ un jirima.