MAKATANISHO 26 - Biblia Ilagho Jiboie Kwa Wandu Wose

¹ Seji theluji isefwanagha ngelo ya sumesu, na vua isefwanagha ngelo ekuwida, ni huwo koni na ishima ndejimfwane mkelu.

² Njowe isene sababu ndeibonyagha ilagho jingi; eeka sa nyonyi iburukagha isepakiagha.

³ Farasi yakunde mikowa emfunga; punda wakunde kiboko, na mkelu ookunda zobo ya mghongo.

⁴ Kusakemtumbulia mkelu ikoto ja wukelu kuchefwanana nao.

⁵ Mtumbulie mkelu itumbulio ja wukelu, usecheghesha wei oomanya.

⁶ Kumduma mkelu ughenje malagho, ni sa mundu kukudumbua maghu ghake moni, na kukulolia malagho.

⁷ Ikatanisho jidedwagha ni mkelu, jeeka sa maghu gha mkelemeri ghinyororagha ghisene kazi.

⁸ Kumneka mkelu ishima, ni sa kungira igho kikuzenyi.

⁹ Ikatanisho jighorwagha ni wakelu jeeka sa munjwa ghwamdunga mmbongeri valenyi ukighukua.

¹⁰ Mundu umuandikagha mkelu kazi, oofwanana na mkumbi iwanu jishoghonuagha kula mundu.

¹¹ Mkelu uwuriagha maza ra wukelu ghwake ooka sa koshi iwuriagha madaiko ghake.

¹² Baa mkelu kuchumba mundu ukuwonagha moni kukaia waichi sena useichi kindo chingi.

¹³ Mghadi wadaghamba, “Shimba eko chienyi! Shimba ibirie eko chienyi!”

¹⁴ Mghadi wadaghaluka-ghaluka a wulinyi kwake, sa mnyango ghughalukagha abahabenyi rake.

¹⁵ Mghadi wadabegha vindo bakulinyi, nao ulemo ni kuvikumba momu.

¹⁶ Mghadi wadakuwona moni waichi kuchumba wandu mfungade widimagha kutumbulia nicha.

¹⁷ Mundu ukungiragha andenyi ya marashano ghiseko ghake, ooka sa mundu uiwadagha koshi madu ikiida.

¹⁸ Mundu wa isu wadakumba visinde va modo, na mawanu ghibwaghagha wandu;

¹⁹ wokoni na mundu umkaliagha mmbao na kughora, “Naaseka tu,” ooka woruwo.

²⁰ Modo ghukasowa mbande, ghwadarima; na andu kodedana kuseko marashano ghadasia.

²¹ Mundu orashana na wandu wadawusira nganyi, seji maka gha modo na mbande ribonyagha modo ghuhieghe.

²² Kudeda wandu kwasingie, kooka sa madonge gha vindo visingie ghimilikagha na kungia kondenyi kifunyi.

²³ Madedo ghisingie ghidedwagha na ngolo mbiwi, gheeka sa kaure, ishingilo chombo cha wongo.

²⁴ Muji kuwi wadakuvisa andenyi ya madedo ghake ghisingie.

²⁵ Ukakadeda nicha, kusemrumirie; angu ngolo yake eechua kuzamilwa;

²⁶ hata ngera wakufinikira na mikalo, ela kuzama kwake kuchafunukulwa wandunyi.

²⁷ Mundu ukoteragha wazima kina, uchachunuka andenyi, na mundu ubingilishiragha wambenyu igho, jichammburia moni.

²⁸ Mundu ukaliagha mmbao wadazamilwa ni uo; madedo ghiseko na wuloli, ghadanona.