KUZOYA 1 - Biblia Ilagho Jiboie Kwa Wandu Wose

Kuumbwa kwa wurumwengu

¹ Aho kuzoenyi, Mlungu oreumbieghe mlungunyi na ndoenyi.

² Ndoenyi ndekorekoghe na fwana ingi, angu kilambo chingi. Kira cherekoghe aighu ya machi ghimilie, na Roho wa Mlungu ukakaia ukisela-sela aighu ya machi.

³ Mlungu ukaghamba, “Mwengere ndeghukaie”, na mwengere ghukakaia.

⁴ Mlungu ukawona angu ghwaboie; ukaghutanya mwengere na kira.

⁵ Mwengere ukaghuwanga, “Dime” na kira ukachiwanga “Kio”. Kukakaia nakenyi, kukakaia nakesho, ituku ja imbiri.

⁶ Mlungu ukaghamba, “Mawingu ndeghikaie ghadi na ghadi ya machi, ghighiwaghanye mafungu awi.”

⁷ Mlungu ukabonya mawingunyi, nao ukaghitanya agho machi gherekoghe mawingunyi nandonyi na agho gherekoghe mawingunyi naighu. Nao ikakaia wokoni.

⁸ Nao Mlungu ukakuwanga aho mawingunyi, “Mlungunyi.” Kukakaia nakenyi, kukaia nakesho, ituku ja kawi.

⁹ Mlungu ukaghamba, “Machi ghiko mlungunyi nandonyi ndeghitumbanyike chiaimweri, na ndoe iomie iwoneke.” Nao ikakaia wokoni.

¹⁰ Mlungu ukawanga andu kuomie “Ndoenyi,” na agho machi gheretumbanyikieghe ukaghiwanga, “Bahari.” Mlungu ukawona angu vaboie.

¹¹ Niko Mlungu ukaghamba, “Ndoe ndeibuse midi, miwalwa ifunyagha mbeu, na midi ya matunda ghiko na mbeu, kula mudi ghwa mbari yaro.” Nao ikakaia wokoni.

¹² Ndoe ikabusa midi, miwalwa ifunyagha mbeu kwa vichuku varo, na midi ivagha matunda ghiko na mbeu raro andenyi, kula ghumu kwa mbari yaro. Mlungu ukawona angu vaboie na ndighi.

¹³ Kukakaia nakenyi, kukakaia nakesho, ituku ja kadadu.

¹⁴ Mlungu ukaghamba, “Miengere ndeikaie aighu mawingunyi, ipate kutanya kio na dime, na kuwonyera alama, vimu, matuku, na miaka;

¹⁵ nayo ikaie aighu mawingunyi, ilangalishireghe ndoenyi.” Nao ikakaia wokoni.

¹⁶ Nao Mlungu ukabonya miengere mibaa iwi, ugho mwengere m'baa ghuibonyere dime nguma, na ugho mtini ghubonyere kio nguma, ukabonya na nyerinyeri wokoni.

¹⁷ Mlungu ukaiwika iyo miengere aighu mawingunyi gha mlungunyi, ipate kuilangalishira ndoenyi,

¹⁸ ibonye nguma na dime hata na kio wori, nayo itanye mwengere na kira. Nao Mlungu ukawona angu vaboie.

¹⁹ Kukakaia nakenyi, kukaia nakesho, ituku ja kana.

²⁰ Mlungu ukaghamba, “Machi ndeghichuo nyamandu riko moyo kwa wungi, na nyonyi nderiburuke aighu ya ndoenyi, mbeonyi.”

²¹ Mlungu ukaumba nyamandu mbaa reobosha ra machinyi, na ivo vose viko moyo vighendagha andenyi machinyi kwa mbari raro, na nyonyi ra mbari rose. Mlungu ukawona angu vaboie.

²² Nao ukavirasimia ukaghamba, “Venyi mchurikie mchuo baharinyi, na nyonyi nderichurikie ndoenyi.”

²³ Kukakaia nakenyi, kukaia nakesho, ituku ja kasanu.

²⁴ Mlungu ukaghamba, “Ndoe ndeifunye nyamandu riko moyo kwa mbari raro, mfugho rose na shimandu riavuagha, na nyamandu ra mbari rose ra isakenyi.” Nao ikakaia wokoni.

²⁵ Nao Mlungu ukabonya nyamandu ra mbari rose ra isakenyi, na mfugho kwa mbari raro, na kula shimandu iavuagha andoenyi kwa mbari raro. Mlungu ukawona vose kukaia vaboie.

²⁶ Niko Mlungu ukaghamba, “Ndedim'bonye mdamu kwa fwana yedu cheni, ufwanane na isi, wipate kukaia na nguma aighu ya samaki ra baharinyi na aighu ya nyonyi ra mbeonyi; aighu ya mfugho rose, na aighu ya ndoenyi kose putu, na kula shimandu iavuagha andoenyi.”

²⁷ Nao Mlungu ukaumba mdamu kwa fwana yake cheni, kwa fwana ya Mlungu ukawiumba mundu wa womi na wa waka.

²⁸ Mlungu ukawirasimia ukaghamba, “Venyi mchurikie, mchure ndoenyi kose, nayo muibonyere nguma, mkaie na nguma aighu ya samaki ra baharinyi, na nyonyi ra mbeonyi, na kula nyamandu iko ndoenyi kose.”

²⁹ Nao Mlungu ukaghamba, “Olenyi namneka midi yose ivagha mbeu iko ndoenyi, na kula mudi ghuko na mbeu andenyi ya matunda gharo, vikaie vindo venyu.

³⁰ Na nyamandu rose riko ndoenyi, nyonyi ra mbeonyi na kula shimandu iavuagha andoenyi, kula kilambo chiko na miruke ya irangi, navineka nyasi na malemba mawishi kukaia vindo.” Nao ikakaia wokoni.

³¹ Mlungu ukazighana kula kilambo uchibonyere, nao ola ukawona vose vaboie na ndighi. Kukakaia nakenyi, kukakaia nakesho, ituku ja karandadu.