1 WAKORINTHO 3 - Biblia Ilagho Jiboie Kwa Wandu WoseWadumiki wa Mlungu 1 Wanidu, ini seredimieghe kughora nenyo sa wandu wa kiroho; ela niaghora nenyo sa wandu wa mumbinyi na sa wana wakoo andenyi ya Kristo. 2 Neremnyoshereghe mariwa, seremnekieghe vindo vikurie anduangi; angu ndemorevidimagha kungi. 3 Hata idana mwaduagha msevidimagha, angu mwaduagha mumbinyi. Ikakaia mduagha na iriso na kurashana, inyo si wa mumbi nndoki; e hoku mwaawuyabonya sa wandu wa wurumwengu! 4 Mundu ukaghamba, wei “Ini ne wa Paulo” na mzima ughambe, “Ini ne wa Apolo” huwo ndamwaawuyawonyera mooka wa wurumwengu anguwada? 5 Apolo nani? Na Paulo nani? Nechi isi de wadumiki, dimteserie mkarumiria, karakara na seji kula mundu unekelo ni Bwana. 6 Ini nerewaeghe, Apolo ukadunga machi; ela Mlungu nuo uibukishire. 7 Uo uwagha na uo udungagha machi si kindo chingi, ela Mlungu nuo uzoghoragha. 8 Uo uwagha na uo udungagha machi, weekatana; na kula umu uchapata mafungu ghake karakara na kazi yake. 9 Angu isi de wabonyi kazi wa Mlungu, inyo mo mbuwa ya Mlungu, na iaghi ja Mlungu. 10 Ini sa m'baa wa waaghi, karakara na seji niwikilo kwa mvono ghwa Mlungu, naaghie msingi, na mundu mzima uaagha aighu yaro. Kula mundu ndemanye seji uaghagha aighu yaro. 11 Angu ndekuwadie mndungi udimagha kuagha msingi ghungi mzima, kuchumba ghuja ghoni ghuaghilo, nagho ni Jesu Kristo. 12 Idana mndungi ukaagha aighu ya msingi ugho, dhahabu, feza, magho gha zoghori mbaa, angu midi, nyasi, angu matasa, 13 kazi ya kula mundu ichawoneka worinyi; angu jija Ituku jichaifunukua, kwa kukaia ichafunukulwa kwa modo. Na modo ghuchaitima kazi ya kula mundu uibonyere. 14 Ngera kazi ya mndungi oreiaghieghe aighu ya ugho msingi yadua, uo mundu uchapata malipo. 15 Ngera kazi ya mndungi yahia, uo mundu uchapata hasara; hata ngera uo moni uchakia, ela ni sa kufufunuka modo. 16 Welee, ndemmanyire inyo mo hekalu ya Mlungu, na angu Roho wa Mlungu wadakaia andenyi konyu? 17 Ngera mndungi wainona hekalu ya Mlungu, nao moni uchanonwa ni Mlungu. Angu hekalu ya Mlungu yaelie; na hekalu iyo ni inyo mmbeni. 18 Mndungi usakekukalia moni. Ngera mndungi aghadi konyu waghesha wei oko na hikima ya ngelo iri, ndewuye mkelu, eri upate kukaia na hikima. 19 Angu hikima ya wurumwengu ughu ni wukelu kwa Mlungu. Sa iji iandikilo, “Wawiwada awo wiko na hikima andenyi ya mikalo yawo.” 20 Na sena, “Bwana waichi wori maghesho gha awo wiwadie hikima ni gha duu.” 21 Kwa wundu ughu, mndungi usakekukasa na wadamu; angu vilambo vose ni venyu; 22 ngera ni Paulo, Apolo, angu Kefa; ngera ni wurumwengu, irangi, angu kifwa; ngera ni ngelo ihi, angu ngelo ichagha, vose ni venyu; 23 nenyo mo wa Kristo, na Kristo ni wa Mlungu. |